Read icen 2 BaKorinti 4 Bible Online

2 BaKorinti 4 - icen bible

2 BaKorinti 4

¹Nek anɔng, ayet fok in bɛ̀ yit kutomong fɛ́ Adakunom ki nɔɔk yit nek angmishish wu, nek anɔng in da te yit nwaa awo.

²In mi kana kam yit ni ntomong inɛt nfi nborok ni nsum. In da tin boroso yit banet awo, ke ni in wɔrɔsɔ yit banet ni ifɛ̀ Adakunom awo tit in itas atsak wɛshɛk, na anɔng wu kaangan di ki di atsak yit nanu ashon Adakunom ayit iyɛ wu.

³Ki ishara ifɛ̀ itek deng fi in se yit ne se ni ifam, i se ni ifaam na bayɔng fɛ́ ba se ni ibeseng.

⁴Kaban-nnom azatse kang mi ka ba te ngmaat ayɛ bà tɛ bafi nhwyi, ba tɛ ba di mgbey ifɛ̀ itek ízɔk Anet-Isheshek fɛ́ a yet nawu Adakunom awo.

⁵Nek ikyɛng fi in shara yit yet in di tonong yit ace yit awo tit aYeso Kristi fɛ́ a yet aTisa yit, wat iyit yet yit basam fɛ́ ba tsin ki ra yin kutomong akuce wu.

⁶Nek Adakunom kin fɛ̀, “Won mgbey ni iron ayɛt ahwyi.”[1] A mi te mgbey e tsin ron ayɛt ayɛ yit, ni in nesek yit irēn mgbey Adakunom fi in se na ayisi aYeso Kristi.

⁷Ngma na anɔng, in bɛ̀ yit kurúm kang ayɛt atsung irɔp, nɔng ba di ki tonong fok agap aratek-aratek nes na Adakunom da ni yit awo.

⁸Ba ki nesek yit izot na kaakye abak, ngma na anɔng ba mi kyem ba ki fɛlɛ yit awo; ba ki bushung yit nkap, ngma na anɔng in mi nɔɔk yit nwaa awo;

⁹ba ki nesek yit iyɔm, ngma na anɔng Adakunom mi te burum ni iyit awo. Ba tɛn na ba ki carak yit sak aben, ngma na anɔng in kus yit awo;

¹⁰in sok yit iku aYeso ni irɔm kaakyi izen nek kutomong aYeso, nɔng ayɛt anɔng banet bin di sɛs kutset fi ku nes na aYeso.

¹¹Nek iyit fi in se yit ni kutset, kaakyi izen in se yit nanu iku nek aYeso, nɔng banet di ki sɛs kutset fi ku nes na aYeso ni irɔm yit fi in kus yit.

¹²Nek anɔng iku se ni kutomong nate yit, awɛt ni kutset se ni kutomong nate yin.

¹³I se ni ijɛk ni ifɛ̀ Adakunom ye, “Imi shan atsak, yɔk anɔng in di fɛ̀.”[2] Ayet fok in bɛ̀ yit kuri kabik ishan atsak kazining, anɔng fi in di shan yit atsak, nek anɔng in tsin di cɛɛt yit.

¹⁴In rēn yit fok iwu fɛ́ a kin donong aTisa yit aYeso, a bi ki donong yit gung na aYeso, a bi tse ni iyit ngma ni iyin nanu ashon wu.

¹⁵Ba nye nkyɔrɔk nang ngma nek itek yin, nɔng ki kunang Adakunom bin di barasa isɛs banet, ida ban di barasa ifeng banet dot, ba da bang tere Adakunom.

¹⁶Nek anɔng, in nesek yit nwaa awo. Ngma ni fi nrɔm yit nang fɛ́ banet yɛrɛ mi gyɔt, ngma na anɔng na kabik yit woso isɛs agap atut na katson.

¹⁷Nek mgbang fi in tsin sɔ yit kyɔrɔng, in tsin ki nye yit sak kusot nta ayɛ na ayɛ fi ku se ashon makiyi, fɛ́ vit ikyɛng fɛ́ ba di ki mara ina.

¹⁸Ki in tun yit ayisi ni nkyɔrɔk fɛ́ ayisi tsin yɛrɛ, in di ki nak yit iyɛrɛ in yɔng fɛ́ ayisi kyem a di awo, nek nkyɔrɔk fi in tsin yɛrɛ yit tsin gosok, awɛt in yɔng fi da in yɛrɛ yit awo yet in yɔng fɛ́ da in bi nkum awo.