Read icen 2 BaKorinti 6 Bible Online

2 BaKorinti 6 - icen bible

2 BaKorinti 6

¹Ayet kutomong fi in se yit ne gung ni iwu, in ra yit awon ni yin, i bi won yit itek fi i mi sɛ yin na Adakunom ni i sot abap awo.

²Nek iwu fɛ̀, “Ni izen itonong angmishish hom, in mi da fok, in kin da sɛ mo atuk isheshek.” Di yin, izen isɛ angmishish e yeng; yɔkɔnɔng wu ayet izen isheshek e.

³Iyit di tes yit ikyɛng ikpas ni irèn akak awo, kɔn ba bi ki sɛ yit ni inɛn ni itomong yit.

⁴Na akaakyi irèn tɛ bafi itomong Adakunom, in mi sak yit ni iyɛ yit fok: Ke ayɛt mgbang, ke ayɛt izot, ke ayɛt iyɔm,

⁵ke ayɛt itosok, ke ayɛt inyang, ke ayɛt idoro nhwyɛ, ke ayɛt itomong, ke ayɛt avit nda natuk, ke ayɛt nzong.

⁶Ke ayɛt kusot kucɛ́l, ke ayɛt irēn, ayɛt akabɔk, ayɛt nggɔn ntek, ayɛt iras kutomong na Kabik aJɛrɛ, ayɛt atitup ishim;

⁷ayɛt kucɛɛt atsak, ayɛt kukyem Adakunom; nɛ ares itsom atsak ni ibɔk kuyak nɛ ni imen yit.

⁸Ayɛt iratek fɛ́ ba ki nesek yit ni ibyes fɛ́ ba ki nyes yit e, ayɛt mbɔɔs fɛ́ ba ki nyes yit e ni itere fɛ́ ba ki nyes yit e. Ba mi ki sok yit tɛ bafi mbɔɔs, ngma na anɔng iyit nyeseng yit naton atsak yit;

⁹Banet ki rēn yit gyat, ngma na anɔng, ba ki sok yit tɛ bayɔng fɛ́ ba ka ba rēn awo, tɛ bayɔng fɛ́ ba tsin kus, di yin, in tsin ya yit kashon ni kutset, tɛ ba tsin ki nesek yit mgbang, ngma na anɔng ba mi ki fɛs yit awo.

¹⁰Tɛ bayɔng fɛ́ ba se ayit kafa kawe, ngma na anɔng in se yit ayit ifeng, tɛ bakan ngma na anɔng, in sas banet dot sosok barum, tɛ bayɔng fɛ́ ba se vit ikyɛng, ngma na anɔng in bɛ̀ yit kaakyi ikyɛng.

¹¹Iyin banet aKorinti, iyit mi ki tak yin weshek, in mi ki tarak yin ayɛ yit.

¹²Vit iyit ni ikikak ifi irade sak ni yin, iyin ba i rayin dang tarak ayɛ yin sak ni yit.

¹³Ni ikyɛng fi imi ki nye yin ne, won ni in cɛɛt ni iyin ti nnon yin, tarak ayɛ yin sak ni yit.

¹⁴I bi mon yin ice na bafi nhwyi awo. Nek akyɛ fi i mon kusot kutabat ni kusot anyas ɛ? Ke akyɛ fi imoon mgbey ni nhwyi yɛ?

¹⁵Akyɛ ifidang fɛ́ Anet-Isheshek bɛ̀ nɛ aShetan ɛ? Ke akyɛ de fi imoon bafi ikuus nɛ bafi nhwyi ɛ?

¹⁶Akyɛ fi i mon karɔ isosok Adakunom nɛ karɔ nabannom ɛ? Nek iyin ba in yet yit karɔ isosok Adakunom atset; ti Adakunom di fɛ̀, “In da sot gung ni bá, in da kat nate ba; in da sot Adakunom bá, wat iba da sot banet hom.”

¹⁷Nek anɔng, wuruk yin nate bafi nhwyi, Azɔk Bazɔk Adakunom fɛ̀, kana kam yin ni iba, i bi ra yin ikyɛng fi i se gbiridik awo, nɔng in da ki shan yin ni mbɔk nfaa.

¹⁸Ama anɔng, imi da sot ada yin, ni iyin sot yin nnon hom, namatek na nanamang e, aTisa wu a fɛrɛng anɔng.