Read icen 2 BaKorinti 9 Bible Online

2 BaKorinti 9 - icen bible

2 BaKorinti 9

¹I se gbing-gbing ma in ki jɛk yin ne naton inesek nek bafi ikuus awo.

²Nek imi rēn iyɛ ingash fi i bɛ̀ yin, fi i mi di sak in mi tsot kugwɔm nek iyin ashon banet aMasedoniya, in ka ba tak fok banet Akaya mang kana nye neme ni iyɛ ida ifi inesek e. Iyɛ ingash yin, tsi i rumung kudot banet bà.

³Awɛt in tsin tom baruneng bang, kɔn itsot kugwɔm fi in mi nye yit akuce yin, ni i sot ifɛ́ abap ni icɛɛt e, yɔk in shim yit ni i kana nye yin gyam kpaf ti ikyɛng fi in mi fɛ̀.

⁴Ke da anɔng awo, ke bakak ayɛt banet aMasedoniya di run kama sak azɔng, ba bɛ́ ba sɛ imi kana nye yin awo. Imi bi sɔ nsum nek itsot anu fi in mi tsang ra akuce yin, ama anɔng, imi azi hom kyɛk fi in bi sɔ nsum e awo, ma gung ni iyin.

⁵Nek anɔng, in di i se gyat ni in tung yirik baruneng bang sak azɔng ni yin, nɔng ba bin tusung ikyɛng fi i mi fɛ̀ i da nesek yin, anɔng e da tonong ishim iyɛ yin ayet inesek e, vit agbing ni de.

⁶Yiring yin fok: ngma anet fɛ́ a tuus ija wu ni imak, a bi tusung nayak imak wu, ngma ayɔng fɛ́ a tuus ni mbɔk washak, a bi tusung nayak wu sherek.

⁷Kaangan na nɔk ikyɛng fɛ́ a mi sak ni iyɛ wu a da nɔk, vit karut ke agbing-gbing awo, nek Adakunom shim anet fɛ́ a nesek ni ishim iyɛ.

⁸Adakunom kyem a ki nɔk yin kunang ira ikyɛng fi itsɛt yin washak, nɔng kaakyi izen i da sɛs yin ngma ikyɛng fi itsɛt yin nek i di ya yin kashon gbingding bakak.

⁹Kpaf ti i di se ni ijɛk ye, “A mi nesek bakan ni kubɔk washak, wat kunang wu bi nkum awo.”[5]

¹⁰Adakunom wu a nesek anet ikap ija, iwu wu a tɛ nesek akaangan nayak. Nek anɔng, a da ki nɔk yin ija fi i da tuus yin, a da tɛ sak ija yin ni i rasak, na anɔng wu a da te inesek ishim iyɛ da ki barang yin mo itek ayit kutomong kutek yin.

¹¹A da ki te yin awɛng na akaakyi irèn nɔng i da nesek yin ni kubɔk washak, nɔng banet dot bin tere Adakunom ni izen fi in ka ba kabasa yin ares e.

¹²Nek kutomong inesek ti ku kang, yet itarasa kudaam banet kyɛk awo, ibɛ́s ni itere Adakunom na banet dot.

¹³Kuri inesek yeng ni ifok ifɛ yin, mi tonong kuri banet fi i yet yin. Anɔng e, da sak banet dot di nɔɔk Adakunom iratek. Nek inesek e sak ishara ifɛ́ Anet-Isheshek ayɔng fi iyin di nɔɔk yin atsak. Ama anɔng, kuri kuwashak e kang fi iyin ka ba ra yin ne ni nshɛrɛp banet.

¹⁴Yɔkɔnɔng ba tsin ki ra yin awon, ni iyɛ ingash kudi yin, nek kunang Adakunom fi ku wat kaakyɛ.

¹⁵Won in tere yit Adakunom nek kunang kang fi ku wat agap icɛɛt.