Read icen BaGalati 2 Bible Online

BaGalati 2 - icen bible

BaGalati 2

¹Ama ayɛ kusɔk abe anaas, in ti ngarak sak ni aRushelima, ni kutseet ku kang, in se nɛ aBarnabas, in bereng aTitus.

²In tse azɔng nek Adakunom di tonong fok ni in tse. In nyim na bashɔn ikuus kyɛw, in ka ba tas ishara ifɛ̀ fi in ras Ícɛn-iduk e, kɔn anyɛk fi in se ne kɛ anyɛk fi in mi tsang nye bi sot abap.

³Ngma ne anɔng, aTitus fi in tse ni iwu, vit akak fɛ́ a ku te mo gbing-gbing fok ma ba ku ya katse, ngma ni fi iwu ne na aGirik.

⁴Kucɛɛt iya katse me ne nek, baruneng mbɔɔs bakak fɛ́ ba nɔɔs nate yit ni nɛt nek i ki inye gang yit, nek na ba ki beseng yin kuwashak fi in bɛ̀ yit ayɛt aKristi Yeso. Ba shim ba ki sak yit ni in sot yit basam,

⁵iyit ka ba nang yit kawat ko gyet awo, nek in ki tɛnɛng yin mo atsak ifɛ̀ itek e.

⁶Awɛt bayɔng fɛ́ ba ka ba sok fok ba yet agbat e, ke na ba yet akyɛ, nek Adakunom ras ishɔt iyɛrɛ ayisi awo, ba barang ikikak ni itees hom awo.

⁷Awɛt iba ice ba, ba di gyat fok Adakunom mi di nɔɔk kutomong ishara ifɛ̀ itek sak ni Ícɛn-iduk, kyɔn tɛ ba di nɔɔk aBitrus sak na baYahuda.

⁸Nek Adakunom a nye kutomong na aBitrus tɛ atom aYeso sak na baYahuda, iwu azining e fɛ́ a nye kutomong ni imi tɛ atom aYeso sak ni Ícɛn-iduk.

⁹Izen fɛ́ ba aYakubu nɛ aBitrus nɛ aYohana, iba fɛ́ ba ka ba sok fok tɛ aberek bafi ikuus e, di itek Adakunom fi ira kutomong ni imi, ba ki ki shan yit na aBarnabas ni mbɔk nfa. Ba fɛ̀ ey iyit ni in tseng yit ni Ícɛn-iduk, ni iba tse na baYahuda.

¹⁰Ikyɛng izining fɛ́ ba shim ni in nye yit yet, ni in yiring yit na bakan, ikyɛng izining e dɔng fi iyɛ hom ngash nek ira me.

¹¹Ni izen fɛ́ aBitrus bɛ́ ne Antakiya, in ku kɔn ayisi na ayisi fok ikyɛng fɛ́ a nye se kpaf awo.

¹²Ni imɛsɛng e, a tsang yas gung nɛ bafi ikuus bafi Ícɛn-iduk. Awɛt izen fɛ́ aBitrus di bafi ikuus bafi icɛn baYahuda fɛ́ aYakubu ka ba yirik sak azɔng, nnyim ku yit, a wat a rawu kuyak nɛ bafi Ícɛn-iduk e.

¹³Nek anɔng, nshɛrɛp bafɛ́ aYahuda me kpa nye nggɔn iyɛrɛ ayisi fɛ́ aBitrus se ne. Nggɔn iyɛrɛ ayisi bá me sak ba di te aBarnabas natse.

¹⁴Ni izen fi in di, ikyɛng fɛ́ ba se ne mi wuruk ayɛt atsak ifɛ̀ Adakunom, in fɛ̀ na aBitrus ashon bá ngma ye, “Ngɔn yet afɛ́ aYahuda, awɛt i ne i kuus nggɔn bafi Ícɛn-iduk. Akyɛ sak fi ngɔn shim i di te nyɛng na bafi Ícɛn-iduk fok gbing-gbing fok ma ba nye tɛ baYahuda yɛ?”

¹⁵“Iyit fi in yet yit baYahuda ni irɔm, da ‘bafi inɛn Ícɛn-iduk’ awo,

¹⁶in rēn yit fok, anet kyem a se ikanang ashon Adakunom nek ikuus ntsi awo, tit ni irèn inɔɔk atsak na aYeso Kristi. Nek anɔng, iyit te yit inɔɔk atsak yit ayɛt Anet-Isheshek aYeso, nɔng in bin se yit ikanang shon Adakunom nek inɔɔk atsak yit ayɛt Anet-Isheshek, dang ikuus ikyɛng fi ntsi fɛ̀, nek vit anet fɛ́ a kyem a sɛ ikanang ashon Adakunom nek inyes yit ikyɛng fi ntsi fɛ̀.

¹⁷“Ki, ni in rèn tsɛt yit ba ki kanang yit ashon Adakunom nek kusot yit ayɛt Anet-Isheshek, ayɛt anɔng, ba ki se yit tɛ bafi inɛn, anɔng e tonong fok Anet-Isheshek run kama inɛn ɛ? Koba!

¹⁸Ki in ti in kpa inok ikyɛng fi in man fo ide, idɔng tonong fok imi yet anet iburusu ntsi.

¹⁹Ayet ntsi me wu fi in di sak in ku, in di sɛ ihwyet ni itekap nawop ntsi me, nɔng in bi di sɛ kutset ayɛt Adakunom.

²⁰Ba mi di tekak gung ne Anet-Isheshek, imi wu in tin yet atset awo, tit Anet-Isheshek wu fɛ́ a se ni kusot ayɛt hom. Kutset fi in se ne ni irɔm kang, in tsin sot nek inɔɔk atsak fi in bɛ̀ na Arim Adakunom, iwu fɛ́ a di tonong ishim, a nɔɔk ice wu nek imi.

²¹Imi kyem in wobok itek Adakunom ni ifam awo, nek ke ba fɛ̀ ba kyem ba sɛ kusot kutabat ashon Adakunom nek ikuus ntsi, ki iku Anet-Isheshek sot abap!”