Read icen BaGalati 4 Bible Online

BaGalati 4 - icen bible

BaGalati 4

¹Ikyɛng fi in shim in fɛ̀ yet, ke anet iya itekari me rēn yet nggon, a se zɛɛt na asam awo, ngma ni fi ngma nkyɔrɔk e yet nfuu.

²A rēn resek mo nawop bayɔng fɛ́ ba tsin kuyɛrɛ nɛ bayɔng fɛ́ ba tsin ku ta sak izen fɛ́ atek mi sak ninyɛn.

³I se kpaf anɔng, ni izen fi in rēn yet yit nnon, in se yit ni isam nawop nabik fɛ́ na ya igwɔm azatse kang.

⁴Awɛt fi izen e bi i nye kpaf, Adakunom tom na Arim wu sak azatse, ni irèn kutes abining, na nawop ntsi,

⁵nek na a di bisik bayɔng fɛ́ ba se nawop ntsi me, nɔng in da bin sɛ yit kukyem isot nnon Adakunom.

⁶Nek iyin yet yin nnon wu, Adakunom mi ki tom yin na Kabik Arim wu na ayɛ yin, Kabik e yes, “Abba! Ada!”

⁷Nek anɔng, ngɔn ti i yet asam kong awo, tit arim wu. Nek i yet arim wu, Adakunom mi da sak i sot anet iya itekari me bà.

⁸Ayame fi i tsang rēn yin Adakunom awo, in yet yin basam ni bɔk nabannom nakak fɛ́ da na kyem ikyi ikak awo.

⁹Awɛt yɔkɔnɔng i rēn yin Adakunom, ke ni in fɛ̀, Adakunom ki rēn yin, akyɛ sak i shim i ti bun yin ni bɔk igwɔm nabik azatse kang fɛ́ da na bɛ́ kukyem awo yɛ? Akyɛ sak i shim i ti bun yin ni isam na ko yɛ?

¹⁰Iyin nɔng ites yin nhwyɛ yin ni tosok nnom nkak, ni nfɛn nkak ni izen, nɛ ayɛ.

¹¹Iyin di tes yin nnyim, i di se ti ngma mgbang fi in sɔ nek iyin yet abap.

¹²In ra awon ni yin ábaruneng, kuus yin nggɔn hom, nek imi mi sot ti iyin. Vit inɛn fi i mi di ra yin ne.

¹³Iyin rēn yin fok, nek kurɔk fi ku di daam ko ku ki sak in ki shara yin mo ifɛ̀ itek.

¹⁴Ngma ni fi kurɔk hom ki se yin ti imara ni yin, iyin da i tonong yin ibyɛs kɛ iraye awo. I di shan yin ti in yet atomaza Adakunom, ti imi wu in yet Anet-Isheshek aYeso me ni ice wu.

¹⁵Akyɛ sɛ ifeng yin e yɛ? Imi rēn fok, ki in fi fɛ̀ ni yin ni turung yin ayisi yin ni di nesek yin, ki i fi kyem yin, ki i nye yin anɔng.

¹⁶Yɔkɔnɔng i mi sot afidang ifa yin nek in ki tas yin atsak ɛ?

¹⁷Banet e yɔng tsɛt ba sɔ ice yin sak abak bá, ayet nek kuyiring kutek awo, ikyɛng fɛ́ ba tsɛt yet na ba ki kam yin, nɔng i da ka ba nɔɔk yin nhwyɛ yin.

¹⁸I se yɛɛt na ba ki nɔk yin nhwyɛ, ki in se ni irèn itek, won ni i se anɔng kaakyi izen, da ma in se gung ni iyin ninyɛn awo.

¹⁹Naban nnon yin, bayɔng fi in tsin ti in sɔ mgbang tɛ irus ites ma izen fi nse aKristi tonong ni kusot yin,

²⁰a di se kin in fi in se gung ni yin, ki in shesheng kutɔ hom, nek a di se zii natoon yin.

²¹Di tak yin, iyin fi i shim i kuus yin ntsi, iyin rēn yin ikyɛng fi ntsi me cɛɛt awɛ?

²²Nek i se ni jɛk fok, aIbrahim kin bɛ̀ nnon namatek e nafaa, kazining ka fɛ́ asam abining wu, ka fɛ́ afaa me ne awashak abining wu.

²³Arim wu fɛ́ a ne na asam abining e, ba kin sɛ ika ni irèn fɛ́ ba di mɛɛ, awɛt arim wu yɔng fɛ́ a ne na awashak abining e, ba kin ku tes nek kushii fɛ́ Adakunom man nye.

²⁴Ikyɛng deng se tɛ nawu fi in shim in di yit, banyining bafaa me nyeseng naton irosom kushii asa faa me. Irosom kushii kuzining ne ni Ihwyanang aSinai, a bi tes nnon fɛ́ na bi yet basam, ku nyeseng naton aHagar.

²⁵AHagar nyeseng akuce Ihwyanang aSinai ni mben Arabiya, anɔng e nyeseng naton kuwɔp aRushelima afɛ́ atut, nek a se ni isam ni nnon wu.

²⁶Awɛt aRushelima fɛ́ a se naton, ayɔng se washak, iwu fɛ́ a yet nggɔ yit.

²⁷Nek i se ni jɛk ye, “Nye iyɛ ikan, ngɔn akuma, ngɔn fi i man tes awo, ta kutɔ gbɛrɛy ni ifeng. Ngɔn fi da i man mara irus kutes awo, nek nnon abining fɛ́ amatek mi ku won, na wat, na fɛ́ abining fɛ́ a se gung ne amatek wu.”

²⁸Nek anɔng ábaruneng, kpaf ti aIshaku, iyin yet yin nnon kushii fɛ́ Adakunom nye.

²⁹Ni izen e yɔng, nggon fɛ́ ba tes ni irèn fɛ́ ba mi di mɛɛ me, zoot kayɔng fɛ́ ba tes ni irèn ízɔk abik. Idɔng ites anɔng ni nnu nang.

³⁰Awɛt ifɛ̀ Adakunom kin fɛ̀ anɛ? “Ro yin asam abining e nɛ arim wu, nek arim asam abining da kyem na a ya itekari gung ni nnon abining awashak awo.”

³¹Nek anɔng ábaruneng, da iyit yet yit nnon asam abining awo, tit nnon abining awashak e.