Read icen BaGalati 6 Bible Online

BaGalati 6 - icen bible

BaGalati 6

¹Ábaruneng, ki i iyit yin akak ni inɛn, iyin fi ise yin ni nggɔn abik Adakunom, bun yin ni wu ni irèn ayɛt nhwyɛ. Awɛt nye yin yɛɛt ni ice yin, kɔng iyin ba ni di kpas yin ni imara me bá.

²Di sɛs yin bafidang ni ndaam bà, nek ayet anɔng e me fi i di ki shining yin itees Anet-Isheshek.

³Ke akak di fok iwu kyem ikikak, da a ne a kyem e awo, a tsin wɔrɔk ice wu.

⁴Won kaangan na a mas nggɔn wu a da di, na anɔng wu fɛ́ a di ki nye kukaa ni ice wu, da nek imaas ice wu ne akak awo,

⁵nek kaangan mi sok acet wu.

⁶Ngma ayɔng fɛ́ a mi shan itabak ifɛ̀ Adakunom, won na kaba ngma ikyɛng itek fɛ́ a sɛ na ayɔng fɛ́ a ku tees mo.

⁷I bi wɔrɔk yin ice yin awo, vit anet fɛ́ a da kyem a tonong Adakunom itsɛ́ng. Ngma ikyɛng fɛ́ anet tup, ide fɛ́ a da tusung.

⁸Ayɔng fɛ́ a tuus nek a di tɛrɛk ishim irɔm wu iyɛ, ayɛt ishim irɔm e ye fɛ́ a bi tusung ikyɛng fi i bi ku tsa sak iku; awɛt ayɔng fɛ́ a tuus nek a di tɛrɛk Kabik Adakunom iyɛ, a bi tusung ice wu kutset vit nkum.

⁹Won in bi rɔn yit ayɛt iras ntomong ntek awo, nek na akpaf izen, in bi tusung yit nkyɔrɔk ntek ki da in rɔn yit awo.

¹⁰Nek anɔng, ki in sɛ yit izen, won in nye itek sak na banet ngma kusum, amak e bayɔng fɛ́ ba se ni irèn ikuus.

¹¹Di yin atin ijɛk aratek fi in tsin ki jɛk yin ne ni kubɔk hom!

¹²Bayɔng fɛ́ ba tsɛt ba di te gbing-gbing fok ba ki ya yin katse, ba nye anɔng fok ba di tsot kukaa. Ikyɛng fi i sak ba di nye anɔng yet nek nnyim kɔng ba bi ka ba nɔɔk izoot nek kucɛɛt itekak Anet-Isheshek.

¹³Vit akak ayɛt bayɔng fɛ́ ba mi ka ba ya katse me ice bá fɛ́ a nyes ikyɛng fi ntsi me fɛ̀, ngma na anɔng na ba di ban fok na ba ki ya yin katse, nɔng ba bin sɛ ikyɛng fɛ́ ba di ki tsot kukaa ni irɔm yin.

¹⁴Ko ni kuro, won kukaa hom bi se ni ikikak awo tit ni itekak aTisa yit aYeso Kristi, ni wu fɛ́ ba mi tekak kazatse ni mi, ba mi di tekak imi na kazatse.

¹⁵Ke iya katse, ke vit iya katse yet ikikak awo. Ikyɛng fɛ́ ba tsɛt kyɛk yet inye ifas.

¹⁶Won kusot kukyang nɛ angmishish, na a sot afɛ́ bayɔng fɛ́ ba kuus itabak yeng, sak ni aIsrela Adakunom.

¹⁷Ni igang e, da akak bi di sak kudaam awo, nek kurɔm hom ngma kusum, ku bi izizɔ fi in ses nek aYeso.

¹⁸Ábaruneng, won itek aTisa yit aYeso Kristi ni i sot ayɛt abik yin. Anɔng.