Read icen BaFisa 1 Bible Online

BaFisa 1 - icen bible

BaFisa 1

¹Kufumung kang ne ni bɔk aBulus, atom Anet-Isheshek aYeso ni ishim Adakunom, sak ne bafi ikuus fɛ́ ba se ne Afisa[1], bayɔng fɛ́ ba mi nyeseng tsìk ni kuus Anet-Isheshek aYeso:

²Won itek, ni kukyang fi ku nes na Ada yit Adakunom, nɛ aTisa aYeso Kristi, ni ku sot gung ni yin.

³Itere ni i yet ifɛ̀ Adakunom, ada aTisa yit aYeso Kristi, iwu yɔng fɛ́ a mi ki te yit awɛng, ne akaakyi kuri awɛng abik fɛ́ a se naton aza, nek kusot yit ayɛt Anet-Isheshek.

⁴Nek iwu mang ki kasa yit ayɛt Anet-Isheshek dang na nye kazatse, nɔng in da sot yit jɛrɛ, vit inɛn anu ashon wu. Nek ishim wu,

⁵Adakunom mang sak gyam, ni in sot yit nnon wu nek ikyɛng fɛ́ aYeso Kristi nye. Anɔng e se kpaf ni ikyɛng fi iwu shim.

⁶A nye anɔng, nek in di tere yit ízɔk itek wu, fɛ́ a ki nɔɔk yit ninang, ayɛt Ari wu fɛ́ a shim.

⁷Ni wu ba mi ki bisik yit nek inosong nasok wu, in sɛ yit ifuut anɛn, kpaf ni kurúm itek fɛ́ Adakunom bɛ̀,

⁸fɛ́ a mi ki nɔɔk yit shɛrɛk, ngma ni kutsitsɛng makiyi ni irēn nkyɔrɔk.[2]

⁹Nek iwu shim nin rēn yit, Adakunom mi ki tonong yit kushim wu fi ku tsang se ni nɛt, kuyɔng fi ku mi sɛ ishining ayɛt Anet-Isheshek.

¹⁰Ikyɛng fɛ́ Adakunom mi sak e, bi shining ni izen fi i se kpaf: a bi moon ngma nkyɔrɔk fi i se azanɛn, ni nyɔng fi in sɛ azatse, ni ice anet azining, fɛ́ ayet Anet-Isheshek.

¹¹Ayɛt wu fɛ̀ Adakunom ki kasa yit mo, ni in sot yit banet ice wu. A ki myak yit gyam nek anɔng fɛ́ a kin sak, na a nye kaakyi ikyɛng ni tseng kpaf ni kushim wu,

¹²nɔng iyit fi in yet yit bafi imɛsɛng ayɛt ite iyɛ na Kristi, in da sot yit bafi itere ízɔk Adakunom.

¹³Iyin se yin ayɛt Anet-Isheshek bà, nek izen fi i kin fok yin ifɛ̀ atsak, ifɛ̀ itek fi i nesek isheshek, ama fi i di nɔɔk yin atsak, ba ki te yin izizɔ nagang wu, Kabik aJɛrɛ fɛ́ ba kin nye kushii me.

¹⁴Kabik aJɛrɛ me yet ikyɛng fin tsin tin bamang yit, nfi ngma iya itekari fɛ́ Adakunom mi ki nɔɔk yit fɛ́ a tonoso gbing-gbing fok in bi ya yit ide, ma izen fɛ́ Adakunom bi bisik ngma nnon wu, sak itere ízɔk wu.

¹⁵Nek anɔng, nkum izen fi imi kin fok inɔɔk atsak yin na aTisa aYeso, ni ishim fi iyin bɛ̀ yin sak na banet Adakunom ngma,

¹⁶in mi won inesek ifeng nek iyin awo, ni in yiring ni iyin ayɛt awon hom,

¹⁷in woso ra awon fok Adakunom aTisa yit aYeso Kristi, Ada Azɔk-Bazɔk, ki nɔɔk yin kutsitsɛng abik[3] ni itarak ice abik, nɔng i da ku rēn yin mo yɛɛt-yɛɛt.

¹⁸In ras awon fok, Adakunom na ki tarak yin ayisi iyɛ yin, nɔng i da bin rēn yin ite iyɛ fɛ́ ba ki yes yin nek iye, i da rēn yin kurúm ízɔk iya itekari fɛ́ ba mi sak nek banet Adakunom[4],

¹⁹ni rēn yin kugap wu fi ku got agap imara fi ku se ayɛt bayɔng fɛ́ ba nɔɔk atsak. Kukyem e yɔng yet kuzining ni kugap e

²⁰fɛ́ Adakunom kin di ra kutomong na Anet-Isheshek ni izen idonong wu ni irɛk, a ku nɔk karɔ isonong ni bɔk iyak wu azanɛn,

²¹kashon hwyeng-hwyeng ne bágwɔm ngma nɛ bafi kukyem nɛ bafɛ́ agap nɛ bátisa. Iyerek fɛ́ Anet-Isheshek bɛ̀, se kashon na akaakyi iyerek fɛ́ ba nesek, da nkum ni kuzam ku kang kyɛk awo, ngma ni kuyɔng fi ku bi bɛ́.

²²Adakunom mi sak kaakye na átas atak wu, a mi ku sak na a sot ice naton kaakye nek ngma bafi ikuus,

²³fɛ́ a yet kurɔm wu, ishining wu, fɛ́ a shining kaakye ngma kusum.