Read icen BaFisa 2 Bible Online

BaFisa 2 - icen bible

BaFisa 2

¹Iyin kin tsang kus yin ayɛt iras nkyɔrɔk nduk e nɛ anɛn yin,

²fi i kin tsang di sot yin yame, ni izen fi i tsang kuus yin nggɔn azatse kang, na agwɔm yɔng fɛ́ a ya igwɔm naton itseng azatse, kabik fɛ́ ka se ni kutomong yɔkɔnɔng ayɛt ayɛ bayɔng fɛ́ ba ras iduk e.

³Ngma yit in kin se yit ti iba yaame, in ras yit nkyɔrɔk fi nrɔm na ayɛ anɛn yit tsɛsɛk, nek nse kusot anɛn yit, i se gbing ni in nyim yit ne kafa kawe Adakunom kpaf ti nshɛrɛp banet.

⁴Awɛt nek kudot ishim fɛ́ Adakunom bɛ̀ nek iyit, nɛ kurúm angmishish wu,

⁵a ki nɔɔk yit kutset nɛ Anet-Isheshek, ngma fi in tsang kus yit ayɛt idun yit, ayet nek itek de fɛ́ ba ki sheshek yin mo.

⁶Nek kusot yit ayɛt Anet-Isheshek aYeso, Adakunom ki donong yit gung ni wu, a ki nɔk yit karɔ isonong ni wu azɔng azanɛn,

⁷nɔng ni kuzam fi ku bi bɛ́, a bi di tonong kurúm itek wu, ni irèn ishim fɛ́ a tonong ayɛt Anet-Isheshek aYeso.

⁸Nek ni itek de fi i di sɛ yin isheshek, ni inɔɔk atsak, a yet nek fi iyin awo, a yet kunang Adakunom,

⁹a yet nek kutomong ikikak awo, kɔng akak bi tsot kugwɔm.

¹⁰Nek iyit yet yit kutomong ibɔk Adakunom, a ki nye yit ayɛt Anet-Isheshek aYeso nek in ras yit ntomong ntek, nyɔng fɛ́ Adakunom man sak in di ras yit kutomong.

¹¹Nek anɔng, yiring yin fok iyin yet yin Ícɛn-iduk ni kutes, bayɔng fɛ́ baYahuda “bafɛ́ katse” ki yes yin, “bafɛ́ avit katse”, fi mbɔk banet ras kurɔm e.

¹²Yiring yin fok ni izen e yɔng, iyin kin se yin atsitse na Anet-Isheshek, vit ayɔng fɛ́ a ki fa yin ti nnon mben aIsrela, i kin yet yin batsen ayɛt irosom kushi fɛ́ Adakunom man nye, vit iyin ni ite iyɛ, vit iyin na Adakunom azatse kang.

¹³Awɛt kyɔrɔng fi i se yin ayɛt Anet-Isheshek aYeso, iyin fi i tsang se yin yik-yik, ba mi bɛ́ ni iyin bakat nek nasok Anet-Isheshek.

¹⁴Nek iwu ice wu yet kukyang yit, iwu fɛ́ a mi sak bafaa me sot azining, a mi yirik kubat, ni ikyɛng yɔng fi i kaba yit, fi ibɛ́s ni ifà,

¹⁵ni kurɔm wu, a di tun agap ntsi nɛ agbat ifɛ̀ ni nkyɔrɔk in se gbing na ba ras. A nye anɔng, nek a di nok banet bafaa me na ba sot anet azining afas, na anɔng kukyang di sɛ.

¹⁶Ni kurɔm kuzining e, a di bɛ ni inosong-ashi nek banet bafaa me sak na Adakunom ayɛt iku wu ni ikum, a di fɛt ifà me.

¹⁷A bɛ́ a ki shara yin kusot kukyang, iyin fi i tsang se yin yik-yik, nɛ bayɔng fɛ́ ba se bakat.

¹⁸Na Anet-Isheshek, baYahuda nɛ Ícɛn-iduk in di sɛ yit irèn sak na Ada ni irèn Kabik kazining e.

¹⁹Nek anɔng, yɔkɔnɔng, iyin ti i yet yin batsen nɛ bafɛ́ amatse awo, tit nnon mben gung nɛ banet Adakunom, bafɛ́ ari Adakunom,

²⁰bayɔng fɛ́ ba nok iba azaton itis fɛ́ batom-aYeso nɛ batan ta, fɛ́ Anet-Isheshek aYeso ice wu yet kuta itsok itu kutek ayɛt inok e.

²¹Naton wu wu fi inok e ngma kusum kana moon mo, i di rasak sak isot kutu ajɛrɛ fɛ́ ba mi sak nek aTisa.

²²Ni kusot fi i se yin ayɛt wu, ba tsin ki nok yin mok ni isot yin karɔ fɛ́ Kabik Adakunom dí sosok.