Read icen BaFisa 3 Bible Online

BaFisa 3 - icen bible

BaFisa 3

¹Nek anɔng imi aBulus, afi inyang nek Anet-Isheshek aYeso, akuce yin bafi Ícɛn-iduk

²imi rēn fok iyin mi fok yin itek fɛ́ Adakunom di nɔk, nek ira kutomong nek iyin.

³Ikyɛng inɛt fɛ́ ba di tonong e na nabos e, se kpaf ni ikyɛng fi in mi ki shɛbɛk yin e ni ijɛk.

⁴Ni izen fi iyin fa yin ide, na anɔng fi iyin da rēn yin kutsik irēn hom ayɛt ikyɛng inɛt Anet-Isheshek.

⁵Idɔng fɛ́ ba kin won dang tonong bafi nzam fi in mi gosok, kyɔn tɛ fɛ́ Kabik Adakunom mi tonong batom ajɛrɛ nɛ batan wu ne.

⁶Ikyɛng inɛt e yet fok, ayɛt ishara ifɛ̀ itek, bafi Ícɛn-iduk yet bafi iya itekari gung nɛ bafi aIsrela, ba yet nkap kurɔm kuzining ngma bá, ba bɛ̀ kanu kafuba ayɛt ikyɛng fɛ́ Adakunom mang nye kushi me, ayɛt Anet-Isheshek aYeso.

⁷Imi sot afi ishara ifɛ̀ itek e deng, nek kunang itek fɛ́ Adakunom di nɔk, ayɛt kukyem wu fi ku tsin ra kutomong ni imi.

⁸Ngma fi imi wu fi in dung rat ayɛt banet Adakunom, ngma na anɔng, ba di nɔk itek e deng: nɔng in di shara sak ni Ícɛn-iduk, itek fi i wat agap kuyiring yit, in mi sɛ yit ide na Anet-Isheshek,

⁹ni in nɔɔk kaangan mgbey azaton ikyɛng inɛt e, fɛ́ Adakunom kin fam ide na ayɛ ama, iwu fɛ́ a nye kaakyi ikyɛng.

¹⁰Kushim wu yet fok yɔkɔnɔng, bafi ikuus ba fɛ̀ ba da tonoso ndiri-ndiri kutsitsɛng kutsik Adakunom sak na bágwɔm nɛ bafi kukyem aton aza.

¹¹Adakunom nye anɔng kpaf ni ishim wu ifɛ́ ayɛ na ayɛ, fi i sɛ ishining ayɛt Anet-Isheshek aYeso aTisa yit.

¹²Nek kusot yit ayɛt wu, ni inɔɔk atsak yit ni wu, fi in di ki tsees yit ashon Adakunom ni iyɛ izining nɛ agap iyɛ.

¹³Nek anɔng, in tsin ra awon ni yin, da nkap yin bi te gbɛrɛk nek izot fi in se ne nek iyin awo, mgbang e da ki bɛ́ yin ni itek.

¹⁴Nek anɔng, in sas akut aben ashon Adada,

¹⁵iwu fɛ́ bafɛ́ azanɛn nɛ azatse di sɛs iyerek bá.

¹⁶In ra awon fok ayɛt kudot itek wu, a ki nɔɔk yin agap abik ayɛt ayɛ yin,

¹⁷nɔng Anet-Isheshek bin te itis ayɛt ayɛ yin nek inɔɔk atsak yin. In ra awon fok, ni ibang te yin aney, nɔng ishim yin da te agap,

¹⁸nɔng i di sɛ yin agap ni nshɛrɛp banet Adakunom, nɔng i di rēn yin kuyikyik, ni kuzamang, ni kutsik ishim Anet-Isheshek.

¹⁹Nɔng i da rēn yin ishim aKristi fi i wat agap irēn, nɔng i da bin shining yin ni nkyɔrɔk fi in nes na Adakunom.

²⁰Won iwu fɛ́ a nyes kashon ni ikyɛng fi in ku risim yit, ni idɔng fi in yiring yit, kpaf ni kukyem wu fi ku se ni kutomong ayɛt yit,

²¹won na a sɛ ízɔk nate bafi ikuus nɛ na Anet-Isheshek aYeso, ni kuzam kuka sak ni kuya, ayɛ vit igang! Anɔng.