Read icen BaFisa 5 Bible Online

BaFisa 5 - icen bible

BaFisa 5

¹Nek i mi sot yin nnon fɛ́ Adakunom shim, kuus yin nggɔn wu ni kusot yin.

²Nye yin kusot ayɛt ishim, kpaf tɛ fɛ́ Anet-Isheshek ki tonong yit ishim, a nɔɔk ice wu nek iyit, ti inabak-akuce fɛ́ a bɛ́ nkɔn ntek sak na Adakunom.

³Awɛt ba bi fok ikyi ikak ti kujang, kɛ kaakyi kuri nggɔn in gbɛk-gbɛk e, kɛ kuhwye nate yin awo, nek anɔng e se gyat na banet ajɛrɛ bafɛ́ Adakunom awo.

⁴Ama anɔng, i bi cɛɛt yin kucɛɛt nsum kɛ kucɛɛt ishɔp kɛ aduk kuro awo, anɔng e se kpaf awo, akuce anɔng, nesek yin ifeng sak na Adakunom.

⁵Rēn yin ane: vit afi kujang kɛ afi kutomong ku gbɛk-gbɛk kɛ afi kuhwye fɛ́ a se kpaf na anet iya nabannom ntong, fɛ́ a bi ya itekari ni igwɔm Anet-Isheshek ni ifɛ́ Adakunom.

⁶Da akak bi ki wɔrɔk yin ni itang anu awo, nek kuri nkyɔrɔk yɔng fɛ́ kafa kawe Adakunom di tisik naton ágbakasak ánet.

⁷Nek anɔng, i bi moon yin ice ni iba awo.

⁸Nek iyin kin tsang se yin na ahwyi, awɛt yɔkɔnɔng i mi sot yin mgbey ayɛt aTisa. Nye yin kusot ti nnon mgbey

⁹(nek ikyɛng fi mgbey tes yet; nggɔn ntek, ni kusot kutabat nɛ atsak)

¹⁰tsɛsɛk yin ikyɛng fi i da tɛrɛk aTisa iyɛ.

¹¹Ikyi ikak bi ki moon yin ni ntomong abap ahwyi awo, akuce anɔng, tarak yin ina.

¹²Nek iyet ikyɛng nsum, na ba cɛɛt nkyɔrɔk fɛ́ ba ras ni nɛt.

¹³Awɛt ngma ikyɛng fɛ́ ba tarak ni mgbey, se wɛshɛk,

¹⁴nek mgbey e na fi in tonoso kaakye wɛshɛk. Nek anɔng fɛ́ ba di fɛ̀ ye, “Shiming, ngɔn anet nda, dorok ayɛt bafaben, Anet-Isheshek da ta mgbey wu naton ngɔn.”

¹⁵Nek anɔng, nɔ yin nhwyɛ yin, ni kusot fi i se yin ne, i bi sosok yin tɛ ashɔp awo tit tɛ batsitsɛng,

¹⁶ra yin kutomong gyat ne kaakyi kawat fi sɛ yin, nek nnom e yet nmaane.

¹⁷Nek anɔng, i bi sot yin ishɔp awo tit rēn yin akyɛ de fɛ́ aTisa shim ɛ.

¹⁸I bi feng yin ni kutsit awo, nek anɔng e bɛ́s ni nggɔn ibeseng. Akuce anɔng, won Kabik Adakunom ka ki shining yin.

¹⁹Cɛɛt yin na bafidang ayɛt abom itere, nɛ abom fɛ́ a nes na abik, tere yin aTisa na abom fɛ́ a nes na ayɛ yin.

²⁰Nesek yin Ada Adakunom ifeng nek kaakyi ikyɛng ni iyerek aYeso Kristi.

²¹Nabasa yin ace yin na bafidang, nek iratek fi i nesek yin Anet-Isheshek.

²²Banyining, nabasa yin ace yin sak na bamatek yin ti i tsin nye yin aTisa ne.

²³Nek amatek wu a yet ice abining, kyɔn tɛ Anet-Isheshek di yet ice bafi ikuus, kurɔm wu, fi iwu wu a yet Anet-Isheshek e.

²⁴Kyɔn tɛ bafi ikuus di nasap ice na Anet-Isheshek, anɔng wu banyining ba di nasap ace bá na bamatek bá na kaakyi irèn.

²⁵Bamatek, tonoso yin banyining yin ishim, kyɔn tɛ Anet-Isheshek di tonong bafi ikuus ne. A nɔɔk ice wu nek iba

²⁶nɔng a ka ba te mo jɛrɛ, a ka ba kusu ni ikusu ashi ni ifi ifɛ̀.

²⁷A nye anɔng, nɔng a da bin nabak ice wu ne, bafi ikuus fɛ́ ba nɛp, vit karìk kɛ ikɔɔt, kɛ ibeseng ikak ayi, tit banet ajɛrɛ vit ibeseng.

²⁸Kpaf anɔng fi i se gyat bamatek na ba shim banyining bá ti nrɔm bá. Ngma anet fɛ́ a shim abining wu, a tsin shim ice wu yɔng.

²⁹Nek vit anet fɛ́ a ki mang rawu kurɔm wu, tit na nesek iko nayak na nye iko, kyɔn tɛ Anet-Isheshek di nye na bafi ikuus wu,

³⁰nek ngma yit in yet yit nkap irɔm wu.

³¹“Nek anɔng, anet da won ada wu ni nggɔ wu, na kana moon na abining wu, na bafaa me sot kurɔm kuzining.”[6]

³²Ifɛ̀ deng yet ifi inɛt makiyi awɛt imi cɛɛt naton Anet-Isheshek nɛ bafi ikuus.

³³Ngma na anɔng, won kaakye azining yin na a shim abining wu tɛ a da shim ice wu, na abining e nesek amatek wu iratek.