Read icen BaFilipi 1 Bible Online

BaFilipi 1 - icen bible

BaFilipi 1

¹Kufumung kang ne na aBulus nɛ aTimoti, basam Anet-Isheshek aYeso. Ba jɛk iko sak na banet Adakunom ngma fɛ́ ba ka ba moon na Anet-Isheshek aYeso na aFilipi, ngma nɛ bafi iyɛrɛ bafi ikuus nɛ bashɔn bafi ikuus:

²Won itek ni kukyang fi ku nes na Ada yit Adakunom nɛ aTisa yit aYeso Kristi, ni ku se ni yin.

³In nesek ifeng sak na Adakunom in kaakyi izen fi in yiring ni yin.

⁴Na kaakyɛ awon fi in ras nek iyin ngma, in ras awon ni iyɛ ikan

⁵nek imoon ice yin ni itaas ifɛ̀ itek e me deng, neme ni kunom imɛsɛng e sak atut,

⁶in rēn tsɛngtsɛng fok, ayɔng fɛ́ a mi tumung kutomong kutek ayɛt yin, da ya kashon ni iko sak igang e, ma kunom fɛ́ Anet-Isheshek aYeso bi bɛ́s wu.

⁷I se gyat imi ni in fok anɔng yɔk ngma yin, nek i se yin ayɛt iyɛ hom. Nek ke ni in se ni nyang ke ni in tsin tɛnɛng ni itonong atsak ifɛ̀ itek e ayi, ngma yin i te yin kufiri ni imi ayɛt itek Adakunom e.

⁸Adakunom wu a da kyem a tak iyɛ ingash fi in bɛ́ mok iyin kusum, ti kuri ishim fɛ́ Anet-Isheshek aYeso bɛ́ ni yit.

⁹Awon hom yet, fok ishim yin ni bang rasak, nɔng irēn yin ta aney ayɛt irèn iyɛrɛ,

¹⁰nɔng i da kyem i di kam yin ikyɛng fi idung se gyat, nek i di nye yin kusot kucɛ́l, vit ibeseng sak kunom ibɛ́ Anet-Isheshek,

¹¹ni i shining yin ni nggɔn kusot kutabat fi in nes na aYeso Kristi nek iratek ni itere Adakunom.

¹²Ábaruneng, in shim ni rēn yin yɔkɔnɔng fok, ikyɛng fi ite ni imi, ibang bɛ́ ni iya kashon ifɛ̀ itek e.

¹³Anɔng e mi bɛ́ na awɛshɛk na bafi itosok kari igwɔm ngma nɛ nshɛrɛp banet fok imi se ni nyang nek Anet-Isheshek.

¹⁴Nek inyang fi in tsin ya ide, baruneng ayɛt aTisa dot mi sɛ agap iyɛ ishara Ifɛ̀ Adakunom gbagba, vit nnyim.

¹⁵I yet atsak fok, bakak shara Ifɛ̀ Anet-Isheshek nek kuhwye ni ifup, awɛt bakak shara ni kuyiring kutek.

¹⁶Bafɛ́ ama me shara ayɛt ishim, ba rēn fok ba di sak azeng nek itɛnɛng ifɛ̀ itek e.

¹⁷Wat bafɛ́ ashon e, shara Ifɛ̀ Anet-Isheshek mok ishim iyɛ bà, vit atsak ayɛt e, ba di fok ba di ki tusung kudaam ni imi mo ni nyang.

¹⁸Awɛt kudaam e yet akyɛ? Ikyɛng fi idung sas yet fok na kaakye irèn, won na ba shara Anet-Isheshek, ke ayɛt kuyiring mbɔɔs kɛ kufɛ́ atsak ayi. Nek anɔng wu fi in di bi iyɛ ikan. Ey, in da ya kashon ni iyɛ ikan,

¹⁹nek imi rēn fok, ayɛt awon yin ni igbingding fɛ́ Kabik aYeso Kristi nesek, ikyɛng fi i te ni mi da bɛ ni iwuruk hom.

²⁰In bi iyɛ ngash ni ite iyɛ fok, in da sɔ nsum awo, tit nkum yɔkɔnɔng sak ashon in da yit iyɛ makiyi nɔng Anet-Isheshek da sɛ iratek ni kusot hom, kɛ ni in se ni kutset kɛ ni in ku ayi.

²¹Wɔn imi, kutset yet ni in se ayɛt Anet-Isheshek, iku yet awɛng.

²²Ki in da bang sot ni kutset, i da sot in da ya kashon ni kutomong kutek. Ngma na anɔng, ingan de fi in da kasa de yɛ.

²³Nkyɔrɔk nfa me di te nate: A di se ki in tseng in tsin sot na Anet-Isheshek, mok anɔng e wu a dung sas imi;

²⁴awɛt nek itek yin, i se yɛɛt ni in bang se ni kutset.

²⁵Iyɛ hom mi di tonong tsɛngtsɛng fok, in da bang sot, in da ya kashon ni iyin ngma, nɔng i da rasak yin ni bɛ yin iyɛ ikan ayɛt atsak yin,

²⁶nɔng ayɛt kusot kufiri hom ni iyin, ifeng yin ayɛt Anet-Isheshek aYeso da bang shining dot nek imi.

²⁷Ayɛt akaakyi ikyɛng: won kusot yin ni ku tseng kpaf ni ifɛ̀ itek Anet-Isheshek. Ama anɔng, kɛ ni in kyem in bi in ki di yin kɛ ni in fok ifɛ̀ natoon yin ayi, ikyɛng fi in shim in fok yet, i mi tup yin atak gak ni se yin bazining na abik, na ra yin itsom te anet azining nek inɔɔk atsak yin ni ifɛ̀ itek e

²⁸bafi ifa ni iyin bi ki shirik yin awo, anɔng e da ka ba tonong fok ba da ka ba ngɔɔt. Awɛt iyin bi sɛ yin isheshek ni bɔk Adakunom ikyɛng wu.

²⁹Nek ikyɛng itek fɛ́ a ki nye yin ne yet fok ni nɔk yin atsak na Anet-Isheshek kyɛk awo, tit fok ni i sɔ yin mgbang nek iwu,

³⁰ayet iyin yɔng i tsin bɔrɔng yin kyɔn ti fi i kin di yin, ite ni imi, fi i tsin foos yin fok in se ni de yɔkɔnɔng ana.