Read icen BaFilipi 3 Bible Online

BaFilipi 3 - icen bible

BaFilipi 3

¹Ni igang e, ábaruneng, nye yin iyɛ ikan ayɛt aTisa! I di se mi gbang ni in woso ki jɛk yin e naton nkyɔrɔk nang awo, nek in da ki gyerep yin.

²Nye yin yɛɛt na ákabu yɔ́ng, ánet anyas yɔ́ng, bayɔng fɛ́ ba di ban fok ma ba ya anet katse, a da nɛ sɛ isheshek.

³Nek ayet iyit ba fi in bɛ yit izizɔ me ifɛ́ atsak ifɛ́ banet Adakunom, bayɔng fi in ya yit Adakunom ntong ayɛt Abik, fi in tsot yit kugwɔm ayɛt Anet-Isheshek aYeso, fi da ite iyɛ yit se ni nkyɔrɔk irɔm awo,

⁴ki in fi in shim, imi ice min in bi nkyɔrɔk irɔm fi ki in kyem in di te yɛndɛng ni na. Ke akak di fok a bi nkyɔrɔk ite yɛndɛng ni irɔm, imi ku wat ni ina.

⁵Ba di ya katse ni kunom kufi nkara, nggon mben aIsrela, afi izɔrɔk aBanyami, atutup afɛ́ aYahuda; abak ikuus ntsi, in yet aFarasi,

⁶naton iyɛ ingash nggɔn yit, in nesek bafi ikuus aYeso izot; naton kusot tabat kufi ikuus ntsi aMusa, in se vit inɛn.

⁷Awɛt ngma ikyɛng fi i tsang yet ibarang ni mi, i mi sok ide imi wey nek Anet-Isheshek.

⁸Ikyɛng fi i kyɛk yet, imi mi sok kaakye se kaben fi in da mara ide ni iratek makiyi fi i se ayɛt irēn Anet-Isheshek aYeso aTisa hom, nek iwu fi in mi wobok kaakye. In mi sok kaakye sot abap, nɔng in da bin di sɛ Anet-Isheshek,

⁹ni in se kufiri ni wu, da ni in bɛ́ kusot kutabat kunaan fi ku nes ni ntsi awo, tit kusot kutabat yɔng fi ku nes ayɛt inɔɔk atsak na Anet-Isheshek, kusot kutabat fi ku nes na Adakunom ni irèn inesek atsak.

¹⁰In shim in rēn Anet-Isheshek ni kukyem idoro ifaben wu ni kufiri isɔ mgbang gung ni iwu, ni in sot nagbɔng ni iwu ayɛt iku wu,

¹¹na anɔng, in te iyɛ, in bi sɛ idoro ifaben.

¹²Da fok imi mi kyem in sɛ ngma nkyɔrɔk e nang awo, ke in mi kyem in shining nyif awo, tit in se na anyɛk sak ashon nɔng in da tekap ikyɛng e dɔng fɛ́ Anet-Isheshek aYeso kin tekap akuce hom.

¹³Ábaruneng, da imi tsin sok ice hom fok in mi tsang tekap ide awo. Awɛt ikyɛng izining de fi in ras: In nye burum ni ikyɛng fi i mi got ni in imuu-ice ni idɔng fi i se ashon,

¹⁴in nye nyɛk sak ni igang e nɔng in da bin sok izang azanɛn fɛ́ Adakunom ayɛt Anet-Isheshek aYeso di yes nek ide.

¹⁵Ngma yit fi in mi kop yit, won ni in yere yit nkyɔrɔk e anɔng. Awɛt ke bakak bɛ́ kuyiring fi ku se zɛɛt, Adakunom wu a da ki nɔɔk yin awɛshɛk naton e.

¹⁶Igbat e yet fok, won ni ya yit kashon azaton ikyɛng fi in mi tsang sɛ yit.

¹⁷Ábaruneng, mon yin ice ni nshɛrɛp banet fɛ́ ba tsin mɛɛs nggɔn hom, di te yin ayisi na bayɔng fɛ́ ba tsin sot kpaf ni nggɔn fi in ki won yin e.

¹⁸Kpaf ti fi in mi di mɛɛ ni in ki taas yin, in shim in ti in ki tak yin na na yisi, banet dot kusot ba yet kufi iraan iku itekak Anet-Isheshek ni ikum.

¹⁹Igang bá yet iwey, iya ntong bà yet nafa bá, ba tsot izɔk ba se ayɛt nkyɔrɔk nsum bá. Áyɛ bá se naton nkyɔrɔk azatse kang.

²⁰Awɛt iyit yet yit nnon mben azanɛn. In bɛ́ yit iyɛ ingash kubɛ́ Anet-Isheshek yit fɛ́ a bi ne azanɛn, aTisa yit aYeso Kristi,

²¹iwu fɛ́ a bɛ kukyem, a bi sak kaakyi ikyɛng nawop wu, a bi shesheng nrɔm yit fin in se gbɛrɛk, nɔng in bin sot nfi ízɔk ti ku fuu.