Read icen BaKolosi 2 Bible Online

BaKolosi 2 - icen bible

BaKolosi 2

¹Imi shim ni irēn yin anyɛk fi in se ne nek iyin, nɛ banet Adakunom fɛ́ ba se na aLaudikiya, ngma ni nshɛrɛp bafi ikuus fɛ́ da ba man nyim ni imi awo.

²In nye anɔng, nek in ka ba gbinding mo. Ama fɛ́ áyɛ bá mi kana moon ni ishim, nɔng ba bin sɛ kutsik irēn, nɔng ba di ki rēn ikyɛng fɛ́ Adakunom kin nɛt, fɛ́ ba yes Anet-Isheshek.

³Ni wu fi in di sɛ yit ngma kudot kutsitsɛng ni irēn fi ku tsang se ni nɛt.

⁴In tsin ki tak yin anɔng, kɔn akak bi ki wɔrɔk yin na arɔtɔt anu.

⁵Ngma ne fi da in se gung ni iyin ni irɔm awo, in se gung ni iyin ayɛt abik. In bi iyɛ ikan ifok, fok kutseet yin se gyat ni itup ijɛng yin na atsak fi i bɛ́ yin na Anet-Isheshek.

⁶Iyin mi shan yin Anet-Isheshek aYeso[1], a sot aTisa yin, anɔng, ya yin kashon ni kusot kufiri ni wu.

⁷Ta yin aney, kana nok yin ni wu, nyeseng yin na agap ni inɔɔk atsak tɛ ba kin ki tees yin mo. Shining yin ni kusot inesek ifeng na Adakunom.

⁸Nye yin yɛɛt, kɔng akak bi ki sak in ni isam ni irèn kuyiring ice wu, fi ku yet itees banet awe ifɛ́ abap, ni ikuus itees nggɔn naban-abik azatse kang, na aza itees Anet-Isheshek.

⁹Ayɛt Anet-Isheshek, ngma nse Adakunom di sot kusum ni wu.

¹⁰Wat iyin, ba mi ki nɔk yin atsitsak kutset ayɛt kufiri yin na Anet-Isheshek, fɛ́ a yet ice naton akaakyɛ igwɔm ni kukyem.

¹¹Ayɛɛt wu fɛ́ ba ki ya yin katse bà, iya katse ifas e yeng da i yet kuri iyɔng fɛ́ banet nyes ni mbɔk awo, tit iya katse iyɔng fɛ́ ba nye na Anet-Isheshek.

¹²Abaptisma yin se ti i ku yin gung na Anet-Isheshek, ba tɛ ba ki nɛt yin ni wu, ba tɛ ba ki donong yin gung ni wu ni irèn inɔɔk atsak yin ni kukyem Adakunom, fɛ́ a donong Anet-Isheshek ni irɛk.

¹³Yame, iyin tsang yet yin nkom me ashon Adakunom, nse yin yet nfi inɛn, Adakunom kin tsang ki nɔk yin nse nfas awo. Awɛt Adakunom ne a ki nɔk yin kutset kufas ni izen fi inɔ yin kufiri na Anet-Isheshek, a ki fuut yit ngma anɛn yit.

¹⁴Yame, ba tsang ki ya yit ni ishɔt, nek i shorop yit ntsi aMusa, awɛt Adakunom tun ngma ánɛn fɛ́ a tsang ki ya yit ni ishɔt e. A tekak ina ni ikum.

¹⁵Na anɔng, a di buruk agap akaakyɛ kuri nabik, a tonong dɛt-dɛt fok iwu mi ya agap naton kukyem ni igwɔm, ni irèn itekak wu ni kum.

¹⁶Nek anɔng, i bi won yin akak ki te yin ntsi naton ikyɛng fi i da ya yin, ke idɔng fi i da sɔ yin awo, ke ni irèn itosok amok ntsi nkak, ke amok iyɛrɛ nfɛn nfas, ke kunom aSabat ayi.

¹⁷Ina yet nawu nkyɔrɔk fi in bi bɛ, atitup e yet Anet-Isheshek.

¹⁸I bi won yin akak fɛ́ a nyes ifeng ayɛt imen ice mbɔɔs, ni iya batomaza ntong, na a ki buruk yin izang yin awo. Kuri anet yɔng, nɔɔs tsik-tsik ayɛt nabos fi iwu mi di, ni kuyiring ishim ice wu, i ku saas na tsot kukaa ni ishim iyɛ ifɛ́ abap.

¹⁹Anet kuri ayɔng, mi tɛn ice wu, ni ice me fi iyet Anet-Isheshek. Anet-Isheshek wu fɛ́ a nesek kurɔm agap, na ra kutomong na atsip na di monoso nkap irɔm, na saas ku rasak ni kukyem Adakunom.

²⁰Yɔkɔnɔng fi i mi kus yin nɛ Anet-Isheshek, i mi won yin nggɔn naban-abik azatse kang, akyɛ sak i ti ni nasap yin ace yin ni ikuus nggɔn bà ti i resek yin mo gung ni iba yɛ?

²¹“I bi ra awo! I bi rɛs awo! I bi bereng awo!”?

²²Kuri ntsi in nang cɛɛt naton nkyɔrɔk yɔng fi da in mak fɔɔn awo. Nek ines ni kuyiring anet awe, ni itees wu.

²³Ni itumung e, i se na yisi banet tɛ ntsi me bɛ kutsitsɛng, ibɛ́s ni ite iyɛ, ni imen nhwyɛ ayɛt iya ntong, awɛt ngma ne anɔng, i yet mbɔɔs kyɛk. Banet ka zoot nrɔm bà kyɛk, atsak e yet, kuri ntsi me nang bɛ́ agap ikyikak fi i da tɛnɛng anet ni kpa ni izen imara irɔm awo.