Read icen BaKolosi 4 Bible Online

BaKolosi 4 - icen bible

BaKolosi 4

¹Bátékari, bereng yin basam yin gyat. Ka ba nyes yin nkyɔrɔk ntek. Yiring yin fok, ibɛ yin Atekari azanɛn bà.

²Nabak yin ace yin ni iras awon, ya yin kashon ni iyɛrɛ, ni inesek ifeng.

³Ki ras yit awon bà, nɔng Adakunom da ki tarak yit irèn ishara katsak naton aKristi, in di tas yit ikyɛng e dɔng fi i tsang se ni nɛt, idɔng fi i te ba di sak mo ni nyang.

⁴Di sɛ yin mo na awon, nɔng in da bin shara ide wɛshɛk, kyɔn ti i di se.

⁵Sot yin ni kutsitsɛng ni irèn kusot na bafɛ́ amatse; ras yin kutomong ne kaakyi kawat fi i sɛ yin.

⁶Won kucɛɛt yin ni ku shining ni itek, ni ku ta tɛ ba di zaat ntɔk, nɔng i da bin rēn yin irèn fi i di ki bun yin ni ifɛ̀ sak na kaangan ba.

⁷ATikikus da ki tak yin kaakyɛ fi in di se. Iwu yet aruneng fɛ́ ba di te iyɛ́, anet itomong ayɛt atsak, afi ifiri yit ni itomong aTisa.

⁸In tsin ku yirik sak ni yin nɔng a ki tak yin fok in se yit anɛ, na bang ki te yin gbagba.

⁹A da bɛ́ gung nɛ anet yin aOnisimus, aruneng itomong atsak fɛ́ ba shim. Ba da ki tak yin ngma ikyɛng fi in di se yit ayɛt e azeng.

¹⁰Afidang inyang hom Aristakus, ki te show yin, nɛ aMarkus arunyining aBarnabas. (Iwu fi in man ki jɛk yin naton wu, fok kɛ a bɛ ni yin ni ku shan yin ni mbɔk nfifaa.)

¹¹AYeso fɛ́ ba ku yes aJustus, ki te show yin bà. Iba wu kyɛk fɛ́ ba yet baYahuda ayɛt bayɔng fɛ́ ba se ni itomong igwɔm Adakunom ni imi, ba mi di sak imen iyɛ makiyi.

¹²Anet yin Apafaras, asam Anet-Isheshek aYeso, ki te show yin. Iwu yɔng a se ni igigashang ira awon nek iyin, nɔng i da tup yin atak gak ayɛt kushim Adakunom, kyem yin ni ite iyɛ agap.

¹³Imi da kyem in nɔɔk kanu kuri kutomong fɛ́ Apafaras se ne nek iyin nɛ bafɛ́ aLaudikiya, nɛ aHirapolis.

¹⁴Afidang yit abok aLuka, nɛ aDemas ki te show yin.

¹⁵Di te show yin baruneng yit fɛ́ ba se na aLaudikiya, nɛ aNimfa, nɛ bafi ikuus fɛ́ ba nyiis ari wu.

¹⁶Ama fi i mi fa yin kufumung kang, te nyɛk yin na ba fa iko sak na bafi ikuus fɛ́ ba se na aLaudikiya ni iyin fa yin kuyɔng fi ku ne ni ba bà.

¹⁷Tak yin Akipus fok, “Na te nyɛk na gang kutomong fɛ́ Atisa mi ku nɔk.”

¹⁸Imi aBulus, wu in ki jɛk yin ashow yong ni kubɔk hom. Yiring yin ni inyang fɛ́ ba di rosom mo. Won itek Adakunom ni se gung ni yin.