Read icen 1 BaTesaloni 3 Bible Online

1 BaTesaloni 3 - icen bible

1 BaTesaloni 3

¹Nek anɔng, fi in di yit, in da kyem in tot yit awo, in di yit i se gyat ba ki won yit na Atena me aziyit.

²In yirik yit aTimoti, aruneng yit nɛ afidang yit ni tomong Adakunom ayɛt ishara ifɛ̀ itek ifɛ́ Anet-Isheshek, na bɛ́ a ki gyerep yin, na bang gbinding inɔɔk atsak yin,

³kɔn ndiri-ndiri mgbang nang bi sak akak na won irèn. Iyin rēn yin tsɛngtsɛng fok i se gbing ni in sɔ yit ina.

⁴Atsak e yet fok, nizen fi in se yit azɔng ni yin, in sɔ ni in ki tas yin fok ba da ki nesek yit izot. I kin te kpaf anɔng, ti iyin da rēn yin.

⁵Nek anɔng, fi in kyem in yit ice min awo, in sak na ba bɛ ba di rip kukyang inɔɔk atsak yin. Nnyim hom yet fok nyen afi imara me mi ki kɔrɔk yin, a mi te kutomong yit sot abap.

⁶Awɛt aTimoti yɔng a ne azɔng narɔ yin, a ki bɛ́ yit ni ifɛ̀ itek naton atsak ni itonoso ishim yin. A fɛ̀ ni yit fok iyiring yin ni yit gyet awo, ye fok a ki se yin ki i mi ki di yit, kyɔn ti fi iyit di foos yit ikɔk idi yin bà.

⁷Nek anɔng, ábaruneng, ngma ni mgbang ni izot fi in se yit ne, in sɛs yit agap iyɛ nek inɔɔk atsak yin.

⁸Yɔkɔnɔng wu in da bang sɛ yit nta kusot e, ayet fok iyin rēn se yin ni nyeseng gak ni kuus Adakunom.

⁹Akyɛ kuri ifeng fi in da nye yit Adakunom ne nek itɛrɛk iyɛ fi in bɛ̀ yit nanu ashon wu nek iyin ɛ?

¹⁰Kunom na katuk, in ras yit awon makiyi fok in sɛ yit irèn in ti ki di yin, nɔng in ki nɔɔk yin ikyɛng fi i se vit ayɛt inɔɔk atsak yin.

¹¹Won Adakunom nɛ Ada yit ikyɛng wu, nɛ aTisa yit aYeso, na ki tarak yit irèn ibɛ́ azɔng ni yin.

¹²Won aTisa na sak itonoso ishim yin ni bang di barasa juut-juut sak na bafidang, ni nshɛrɛp banet, kyɔn ti fi ifiit di tsees ni yin.

¹³Won na bang ki barang yin mo agap iyɛ nɔng in da sot yit vit inɛn, nɛ aJɛrɛ nanu ashon Adakunom nɛ Ada nizen fɛ́ aTisa aYeso bi bɛ́s wu nɛ bafɛ́ aJɛrɛ wu. Anɔng!