Read icen 1 BaTesaloni 4 Bible Online

1 BaTesaloni 4 - icen bible

1 BaTesaloni 4

¹Ni gang e, ábaruneng, in tsin ki nɔɔk yin itabak irèn fi i da nye yin kusot fi ku da tɛrɛk Adakunom iyɛ, kyɔn ti kusot fi i se yin ne. Yɔkɔnɔng in fɛ̀ ni yin, in tsin ki tak yin ni yerek aTisa yit aYeso ni i ya yin kashon na anɔng.

²Iyin rēn yin itabak fi in man ki nɔk yin ne na aTisa yit aYeso.

³Ayet ishim Adakunom fok ni se yin cɛ́l, fok ni teng yin kujang;

⁴fok kaangan yin na a tekap kurɔm wu ni irèn fi i se jɛrɛ fɛ́ Adakunom shim,

⁵da i bi won yin kurɔm ki kɔk yin ti Ícɛn-iduk fɛ́ da ba rēn Adakunom awo;

⁶azaton ifɛ̀ deng, won akak bi beseng kɛ na mɔɔt arunyining awo. Adakunom bi tabak ngma banet fɛ́ ba nyes kuri anɛn nang, kyɔn ti in kin di fɛ̀ yit ni yin, in ki kɔrɔk yin kuto.

⁷Nek Adakunom ki yes yit ni nyes yit nggɔn nsum awo tit sak ni kusot ku jɛrɛ me.

⁸Nek anɔng, ngma ayɔng fɛ́ a rawu itabak yeng, a rawu itabak anet awe awo tit ifɛ́ Adakunom, iwu fɛ́ a ki nɔk yin Kabik aJɛrɛ wu.

⁹Naton ishim bafidiin, da ma in ti in jɛk yin ne awo, nek iyin ice yin mi sɛ yin itees Adakunom.

¹⁰Atsak e yet, iyin tsin tonoso yin ishim sak na barunyining fɛ́ ba se kaakɛ na aMasedoniya. Ngma na anɔng, in tsin bang ki tak yin fok ni ya yin kashon na anɔng ábaruneng.

¹¹Won nggɔn yin ni in sot nfi nhwyɛ, sak nhwyɛ ni ira ikyɛng ibɔk ngɔn, ra kutomong ni mbɔk ngɔn, kyɔn ti fi in kin di fɛ̀ ni yin,

¹²nɔng kusot atut na katson yin ni ku yet ikyɛng itere na ba fɛ̀ amatse, kɔn i bi sot yin kunanang na bakak awo.

¹³Ábaruneng, iyit shim ni sot yin vit irēn azaton bayɔng fɛ́ ba mi men nda awo, ki ni nye yin kafa kawe ti nshɛrɛp banet fɛ́ ba se vit ite iyɛ awo.

¹⁴Iyit nɔɔk yit atsak fok aYeso ku a tɛ dorok na anɔng in bɛ̀ yit atsak fok Adakunom bi bɛ́ na bayɔng fɛ́ ba se ni nda gung na aYeso.

¹⁵Kpaf ti ifɛ̀ aTisa, won in ki tak yin, iyit fi in se yit ni kutset, fi in bi resek yit sak izen kubɛ́ aTisa, ko ni kuro, in bi ya yit kashon bayɔng fɛ́ ba mi men nda awo.

¹⁶Nek aTisa ice wu, bi ne azanɛn, ni kukun ku gbɛrɛy, ni kutɔ agbat atomaza ni kugba Adakunom, bayɔng fɛ́ ba ku ayɛt Anet-Isheshek bi tin dorok.

¹⁷Ama anɔng, iyit fi in se ni kutset, fi in resek yit, ba bi ki sok yit gung ni ba sak ayɛt anɔk ni in nyim yit na aTisa naton aza. Na anɔng, in bi sot yit gung na aTisa ayɛ na ayɛ.

¹⁸Nek anɔng, nye gbinding yin bafidang ni ifɛ̀ deng.