Read icen 1 BaTesaloni 5 Bible Online

1 BaTesaloni 5 - icen bible

1 BaTesaloni 5

¹Yɔkɔnɔng ábaruneng, naton izen ni nkɔs nnom, fi nkyɔrɔk nang bi te, i se gbing ma in ki jɛk yin ne awo,

²nek iyin rēn yin tsɛngtsɛng fok kunom Adakunom bi bɛ tɛ akpatang di bes natuk.

³Ni izen fɛ́ banet tsin nye, “Kukyang ni imen iyɛ,” wat gobok ni imaan e ka ba kpa, kpaf tɛ mgbang ites di kpa abin afa, ni ihwyet ka ba gaat.

⁴Awɛt ábaruneng iyin se yin ayɛt idun e, fi kunom e da ki sok yin amakɔt tɛ akpatang di bɛ́s banet awo.

⁵Ngma yin i yet yin nnon mgbey ni nnon kunom. Iyit yet yit bafɛ́ atuk kɛ bafɛ́ ahwyi awo.

⁶Nek anɔng, won in bi sot yit ti nshɛrɛp e yɔng fɛ́ ba se ni nda awo, tit ni in kana nye yit, in tekap yit kurɔm yit.

⁷Nek bayɔng fɛ́ ba se ni nda, ba mereng natuk, bayɔng fɛ́ ba sɔs na ba feng, ba feng na atuk.

⁸Awɛt iyit yet yit bafi inom, won ni in tekap yit nrɔm yit, won atsak ni ishim ni i sot tɛ akpara-gwɔm yit, ni ite iyɛ isɛ isheshek sot tɛ abong ni ice yit,

⁹Nek Adakunom ki sak yit mok iyɔm nɛ kafa kawe wu awo tit nek in sɛ yit isheshek ni bɔk aTisa yit aYeso Kristi.

¹⁰Iwu ku nek iyit nɔng kɛ ni in se yit ni ishemeng kɛ ni nda ayi, ni in se yit gung ni iwu.

¹¹Nek anɔng, kana gbinding yin ni kana nok yin kpaf ti fi i se yin ne.

¹²Yɔkɔnɔng in shim in fɛ̀ ni yin ane ábaruneng, nesek yin bayɔng fɛ́ ba tsin bɔrɔng ni kutomong nate yin iratek, iba fɛ́ aTisa ka ba sak iyɛrɛ yin na ba ki gyɔs yin.

¹³Kaba bereng yin ayɛt iratek makiyi, ni ka ba tonoso yin ishim nek kutomong bá. Sot yin kyang na bafidang.

¹⁴Won in ki tak yin ábaruneng, tabak yin bafɛ́ arut, gbinding yin bafi nnyim, di sɛs yin bafi kurat, nye yin akabɔk na akaangan.

¹⁵Da akak na a tarang akak na anyas awo, tit na a nye nyɛk, nye yin itek sak na bafidang ni nshɛrɛp banet.

¹⁶Nye yin kafa kakan kaakyi izen;

¹⁷ya yin kashon na awon;

¹⁸nesek yin ifeng na akaakyi ikyɛng, nek anɔng wu fɛ́ Adakunom shim ni yin fi i se yin na Anet-Isheshek aYeso.

¹⁹I bi fɛt yin kurong abik awo;

²⁰i bi byɛs yin itaas-ibes awo.

²¹Mara yin kaakye. Bereng yin ikyɛng fi i yet itek.

²²Rayin kaakye fi i yet imaan e.

²³Won Adakunom ice wu, ki sak yin ni sot yin jɛrɛ, na a ya kashon a ki tes yin jɛrɛ. Won kabik yin ngma kusum ni kutset yin ni kurɔm yin ni in sot vit ibeseng sak ni izen ibɛ́ aTisa yit aYeso Kristi.

²⁴Nek iwu yɔng fɛ́ a ki yes yin, yet afi ifɛ̀ ni ishining, a da shining ifɛ̀ wu.

²⁵Ábaruneng, ki ras yit awon.

²⁶Te show ngma bafi ikuus ni kuri ishim bafi ikuus.

²⁷In ra awon ni yin ni iyerek aTisa, sak yin na ba fa kufumung kang sak na baruneng ngma kusum.

²⁸Won itek aTisa yit aYeso Kristi ni i sot gung ni yin.