Read icen 2 BaTesaloni 1 Bible Online

2 BaTesaloni 1 - icen bible

2 BaTesaloni 1

¹Kufumung kang ne ni bɔk aBulus, nɛ aSilas nɛ aTimoti, sak na bafi ikuus fɛ́ ba se na BaTesaloni, iba fɛ́ ba yet bafɛ́ Ada Adakunom nɛ aTisa yit aYeso Kristi:

²Won itek ni kukyang fi ku nes na Ada Adakunom nɛ aTisa yit aYeso Kristi ni ku sot gung ni yin.

³Ábaruneng, a yet agbing-gbing ni feng yit Adakunom nek iyin kaakyi izen, i se gyat anɔng, nek i tsin rasak yin makiyi ni inɔɔk atsak yin, ni ishim fi ibang rasak nate yin.

⁴Nek anɔng wu fi in di tsot kugwɔm ni iyin nate banet ikuus Adakunom nek ite nyɛk ni inesek atsak fi itonoso yin ni izen izot ni imara fɛ́ ba ki nesek yin.

⁵Ngma anɔng e tonoso fok ishɔt Adakunom se gyat, nek anɔng wu fɛ́ ba bi ki fa fok ikyɛm yin kunɔ ni igwɔm Adakunom, idɔng fi i tsin bɔrɔng yin nek ide.

⁶Adakunom ras ishɔt atsak: a bi tarang bayɔng fɛ́ ba tsin ki tang yin izot ni izot,

⁷na nɔk ifɔɔn sak ni yin fi i tsin bɔrɔng yin, ni iyit bà. Anɔng e bi te ni izen fɛ́ aTisa yit aYeso bi ne azanɛn na ábere árong nɛ batomaza wu fɛ́ ba kyem makiyi.

⁸A bi tang izot sak na bayɔng fɛ́ da ba rēn Adakunom awo, fɛ́ ba raba ifok ifɛ̀ itek ifɛ́ aTisa yit aYeso.

⁹Ba bi sɔ mgbang fi in se vit nkum, ba bi ka ba ro ashon aTisa nɛ karɔ kukyem ízɔk wu.

¹⁰Atuk fɛ́ a bi bɛ́ me, banet ajɛrɛ bi ku nesek iratek, a bi te ngma banet fɛ́ ba nɔɔk atsak yɔɔt atuk e yɔng, ngma ni iyin nek iyin nɔɔk yin atsak ni kucɛɛt fi in ki tak yin.

¹¹Nek anɔng e wu fɛ́ a sak kaakyi izen in ki ras yin awon, nɔng Adakunom yit da ki fa yin fok i kyem yin ni kasa fi iwu ki nye yin ne, ni kukyem wu, na a ki sak yin ni i kyem iras yin kaakyi ikyɛng itek fi i shim ira yin nek inɔɔk atsak yin ni wu.

¹²In ras yit awon nɔng iyerek aTisa yit aYeso da sɛs itere nate yin, ni wu sak ni i sɛs yin itere bá, i da te anɔng nek itek Adakunom nɛ aTisa yit aYeso Kristi.