Read icen 2 BaTesaloni 2 Bible Online

2 BaTesaloni 2 - icen bible

2 BaTesaloni 2

¹Azaton kubɛ́ aTisa yit aYeso Kristi, ni itusung fɛ́ ba bi ki nye yit ne, ábaruneng in ra yit awon ni yin,

²i bi bɛ́ yin ayɛ gak kɛ ayɛt nnyim fok kunom aTisa mi got awo, bakak mi ki nye yin ncɛɛt abes ni itom nɛ afumung naton anɔng yɛ fok a ne ni yit.

³I bi won yin akak ki wɔrɔk yin na kaakyi irèn awo, nek kunom e yɔng bi tsang nye awo ma idorok nhwyɛ tun bɛ́, ma anet ibeseng ntsi ne ninyɛn, iwu fɛ́ ba mi sak ba da wey ni wu.

⁴Iwu bi tɛnɛng na ceshek ice wu naton ni nkyɔrɔk fɛ́ ba yes ina nfɛ́ Adakunom kɛ nyɔng fɛ́ ba da ku ya mo ntong ayi, a bi tsɛ a sonong nitu iya Adakunom ntong fok iwu wu a yet Adakunom.

⁵I mi yiring yin awɛ, ni izen fi in kin se ni iyin, in ma ni in ki taas yin nkyɔrɔk nang awɛ?

⁶Yɔkɔnɔng, iyin rēn yin ikyɛng fi i rēn ku tɛnɛsɛ, kɔn a bi wuruk dang izen wu ni i nye.

⁷Nek yɔkɔnɔng ba se ni kutomong inɛt ibeseng ntsi; awɛt ayɔng fɛ́ a ku tɛnɛsɛ, da ya kashon ni tɛnɛsɛ wu sak izen fɛ́ ba bi ku serek ni irèn.

⁸Ama anɔng, anet ibeseng ntsi me bi ne tun ice wu, iwu fɛ́ aTisa yit aYeso fɛt ni nsong fi in bi nes nanu wu, a bi wey ni wu ni mgbey kubɛ́ wu.

⁹Ba bi rēn kubɛ́ anet iraye ntsi me ni rèn ntomong abes, nkyɔrɔk ayɔɔt mbɔɔs fɛ́ aShetan bi ras,

¹⁰ni ntomong anyas fi in bi wɔrɔsɔ bayɔng fɛ́ ba tsin wɛɛs. Ba wɛɛs nek ba raba ishim atsak fɛ́ a da ka ba sheshek.

¹¹Nek anɔng, Adakunom da kaba tom ni iwɔrɔsɔ agap, nɔng ba di ki nɔɔk atsak ni mbɔɔs e,

¹²nɔng ngma bayɔng fɛ́ ba raba ishan atsak, na ba dun tere anyas, ba bi ka ba ya ni ishɔt.

¹³Ábaruneng, i se gbing-gbing ni in feng yit Adakunom kaakyi izen mok iyin, nek ishim fɛ́ a ki nye yin ne, fɛ́ a ki kasa yin ni imɛsɛng, a ki sheshek yin ayɛt kutomong ikanang fɛ́ Kabik nyes, ni rèn ishan atsak.

¹⁴A ki yes yin ni ye ni irèn ishara ifɛ̀ itek fi in ki nye yin ne, nɔng i da bin sɛ yin kanu kafiin ni ízɔk aTisa yit aYeso Kristi.

¹⁵Nek anɔng ábaruneng, nyeseng yin gak, bereng yin itees fi in kin ki nabak yin ne, iyɔng fi in kin ki nye yit ne kanu ni ifi ijɛk.

¹⁶Won aTisa yit aYeso Kristi ice wu, nɛ Ada Adakunom, fɛ́ a ki tonong yit ishim, ayɛt itek wu, a tɛ ki nɔɔk yit agap iyɛ fɛ́ a bi nkum e awo, ni ite iyɛ itek,

¹⁷a ki nɔk yin agap iyɛ, a ki gbinding yin na kaakyi kutomong ni kucɛɛt kutek.