Read icen 2 BaTesaloni 3 Bible Online

2 BaTesaloni 3 - icen bible

2 BaTesaloni 3

¹Ni gang e ábaruneng, ki ras yit awon, mok ifɛ̀ aTisa bin sɛ iya kashon ziri ziri, ni i sɛ iratek kyɔn ti fi i kin di te ni iyin.

²Ki ra yit awon nɔng ba ki tun yit ni bɔk áduk e nɛ ámaan ánet, nek da ngma banet fɛ́ ba mi nɔɔk atsak awo.

³Awɛt aTisa yet afi itak ni ishining, a di ki nɔɔk yin agap na ki bereng yin kɔn i bi kpa yin ni bɔk amaan e.

⁴Iyit bɛ̀ yit ite iyɛ na aTisa fok i tsin nye yin ikyɛng fi in ki tak yin, i da ya yin kashon na anɔng.

⁵Won aTisa na bang ki tonong yin ayɛt ayɛ, ishim Adakunom ni igbingding Anet-Isheshek.

⁶Ábaruneng, in ki tak yin ifɛ̀ ni iyerek aTisa yit aYeso Kristi, iba nye yin ikyi ikak na afɛ́ arut ayɛt yin awo, iwu yɔng fɛ́ da a nye kusot kpaf ni itees fi i sɛ yin ni yit awo.

⁷Nek iyin ice yin i rēn yin kusot fi ku se gyat ni di kuus yin ikyɛng fi imɛɛs yin ni yit. In yet yit bafɛ́ arut awo, ni izen fi in se yit gung ni yin,

⁸da in man ya yit ikyɛng akak dang in ku tarang yit awo. Ka ni kuro, iyit bɔrɔng yit itiri kunom nɛ katuk ni tomong, kɔn in bi sot yit acet na akak yin.

⁹Da fok inye yit anɔng, nek in kyem yit ni yin i ki sɛ yit mo awo, tit nek in shim in sot yit ikyɛng imɛɛs sak ni yin.

¹⁰Nek ni izen fi in resek yit gung ni yin, in kin ki tak yin fok, “Ngma anet fɛ́ da a shim ira kutomong awo, ba bi ku nɔk kuyak awo.”

¹¹In mi fok yit fok bakak ayɛt yin bɛ̀ karut. Ba shim iras kutomong awo; wɔn inɔs aze na aza kyɛk.

¹²Banet tɛ bayɔng, won in ki tak yin, in cɛɛt ni yin ni iyerek aTisa yit aYeso Kristi, won na ba men nhwyɛ bá, na ba tsɛt ikyɛng iya.

¹³Wat iyin ábaruneng, i bi rɔrɔng yin ni iras ikyɛng fi i se gyat awo.

¹⁴Ke akak rawu dang fok itabak fin in jɛk yit ni fumung kang, di te ayisi makiyi ni wu. I bi moon yin ice ni wu awo, nɔng a da fok nsum.

¹⁵Ngma na anɔng, i bi ku sok yin tɛ afi ifa yin awo, tit ku kɔrɔk yin kuto tɛ arunyining yin.

¹⁶Won aTisa ice wu fɛ́ a nesek kukyang, na a ki nɔk yin iko kaakyi izen, na kaakyi irèn. ATisa na se gung ni yin.

¹⁷Imi aBulus wu in tsin jɛk ashow yong ni kubɔk hom, anɔng wu a tonong fi in di tes, ijɛk hom yong i se anɔng.

¹⁸Won itek aTisa yit aYeso Kristi ni i sot gung ni yin ngma.