Read icen 1 ATimoti 1 Bible Online

1 ATimoti 1 - icen bible

1 ATimoti 1

¹Kufumung e ne na aBulus atom aYeso Kristi, ni itak Adakunom, Anet-Isheshek yit nɛ aYeso Kristi, fɛ́ a yet ite iyɛ yit,

²sak ni ngɔn aTimoti, fi i yet nggon in ka fɛ́ atsak na abik: Won itek, angmishish ni kusonong kukyang fi ku nes na Ada yit Adakunom nɛ Anet-Isheshek aYeso Kristi na aTisa yit, ni ku sot ni ngɔn.

³Kpaf ti in kin di fɛ̀ ni ngɔn ni izen fi in kin se ni irèn sak na aMasedoniya, ye ni in sot na Afisa nɔng i da tak banet bakak fok da ba bi tɛ ba ya kashon ni fok itees fi iyet in fi mbɔɔs awo,

⁴da ba nɔɔk ice bá ni nkyɛng-ashon ashon ni ifa ayerek bashɔn ari fɛ́ a se vit nkum awo. Inye anɔng e bes na nanan aza kutomong Adakunom fɛ́ ba rèn iko nabik.

⁵Isak iyɛ kucɛɛt kang yet, ishim fi ines ayɛt iyɛ fi i se cɛ́l ni kuyiring kutek nɛ kabik atsak.

⁶Banet bakak mi te rɛɛt ni ikuus nkyɔrɔk nang, ba mi tirik sak iras ncɛɛt abap.

⁷Ba shim ba sot bafi itees ntsi, awɛt da ba ne ba rēn ikyɛng fɛ́ ba cɛɛt naton e awo, ngma na anɔng na ba di fit tɛ ba rēn ide gyet awo.

⁸In rēn yit fok ntsi se gyat, ke anet ra kutomong ni ina ni irèn itek.

⁹In ti in rēn yit fok, da ba te ntsi nek bayɔng fɛ́ ba nye kusot kutabat awo, tit nek bayɔng fɛ́ ba se gbakasak nɛ bafi idoro nhwyɛ, nɛ bayɔng fɛ́ vit iba ni nnyim Adakunom nɛ bafi inɛn, nɛ bayɔng fɛ́ vit iba na ajɛrɛ nɛ bayɔng fɛ́ vit iba ni irèn ikuus; nɛ bafi ifɛɛs bada ni binggɔ, nɛ bafi ifɛɛs banet.

¹⁰Na bafi iras irɔs, nɛ batek fɛ́ ba mereng na batek, nɛ banet fɛ́ ba yising nɛ ba rɛɛs banet, nɛ bafi mbɔɔs, nɛ bafi inesek kanu mbɔɔs nɛ ngma ikyɛng fi i se zɛɛt ni itees atsak

¹¹fi i se kpaf ni ishara ifɛ̀ itek, ifɛ́ azɔk Adakunom, fi iwu di nabak e.

¹²Ifeng hom sak na aKristi Yeso aTisa yit, fɛ́ a di nɔɔk agap, a di fok imi kyem, a di kasa ni in ra kutomong wu.

¹³Ngma ni fi imi tsang yet afi ibeseng iyerek wu, afi inesek izot nɛ anet ifa, ngma na anɔng, a di tonong angmishish nek imi ras nkyɔrɔk e yɔng ni idun nɛ avit atsak.

¹⁴ATisa yit di shining ni itek wu makiyi, ngma ni inɔɔk atsak, ni ishim fi i se ayɛt Anet-Isheshek aYeso.

¹⁵Ifɛ̀ de yet atsak, i se gyat na ba shan ide ni iyɛ izining: Ifɛ̀ me se ane: Anet-Isheshek aYeso bɛ azatse nek isheshek bafi inɛn, ayɛt bá imi wu in dung ka ba wat ni inɛn.

¹⁶Awɛt ngma na anɔng, a di tonong angmishish nɔng ayɛt in, imi fi in ka ba wat ni inɛn, Anet-Isheshek aYeso di ki tonong akabɔk wu fɛ́ a se vit nkum, nek a di sot ikyɛng itees sak na bayɔng fɛ́ ba bi nɔɔk atsak ni wu, na ba di sɛ kutset vit igang.

¹⁷Won iratek ni ízɔk ni i sot AGwɔm bágwɔm fɛ́ da a ku awo, ba ku di awo, azizɛɛt Adakunom ayɛ ne ayɛ. Anɔng.

¹⁸Ari hom aTimoti, in tsin da won itabak yeng, kpaf ni itaas-ibes fɛ́ ba kin nye naton ngɔn, nɔng ki i di kuus iye, i da sɛ agap ira itsom itek.

¹⁹Nyeseng gak ayɛt inɔɔk atsak ni kuyiring kutek. Bakak mi raba ifok itabak iyɛ bá, nek anɔng ba mi beseng inɔɔk atsak bá.

²⁰Ayɛt ba yet aHimeniyus, nɛ Alekzanda, fi in mi nabak aShetan ne, a ka ba tees ba bi beseng iyerek Adakunom awo.