Read icen 1 ATimoti 2 Bible Online

1 ATimoti 2 - icen bible

1 ATimoti 2

¹Ni itumung e, in shim fɛ̀ ni yin, i se gbing-gbing ni rip yin, ni ras yin awon, ni nyeseng yin nate ayɛt awon ni nesek yin ifeng akuce banet ngma kusum,

²akuce bágwɔm nɛ bayɔng fɛ́ ba bɛ kukyem, nɔng in di sɛ yit kusot kukyang ni imen iyɛ ayɛt ikuus Kunom ni kusot kutek kaakyi izen.

³Anɔng e se gyat, i terek Adakunom Anet-Isheshek yit iyɛ,

⁴iwu fɛ́ a ishim banet ngma na ba sɛ isheshek, nɛ ba sɛ irēn atsak e.

⁵Nek Adakunom yet azining, anet fɛ́ a nyeseng nate Adakunom nɛ banet yet azining, anet e yet Anet-Isheshek aYeso,

⁶iwu wu fɛ́ a nɔɔk ice wu ti itarang ibisik banet ngma. Anɔng e tonong dɛdɛt fok Adakunom shim a shan banet ngma.

⁷Nek anɔng wu fɛ́ ba di kasa mo ni sot anet itom nɛ atom aYeso. In tsin ki tas yin katsak, In tsin ki tas yin abɔɔs awo, imi yet anet itees atitup inɔɔk atsak sak ni Ícɛn-iduk.

⁸Imi shim batek kaakɛ na ba nasap mbɔk in jɛrɛ ayɛt awon, vit ibeseng iyɛ ke nanan awo.

⁹Imi ti in shim banyining na ba tes ares ni irèn fi i se gyat, ni nkpin fi in se gyatgyat, da na a bat ice ke na ata itsɔm asɛng ke na ata itsɔm akan ke na ares itsɔm awo,

¹⁰tit na ba sot bafi ntomong ntek, nyɔng fi in se gyat na banyining fɛ́ ba nesek iratek na Adakunom na ba ku ya ntong.

¹¹Won abining na a sot afi-imɛɛs nkyɔrɔk ayɛt imen nhwyɛ ni inabak ice.

¹²Da imi nɔɔk irèn abining na a tees, ke na a bi ice naton amatek awo; won na te yuu.

¹³Nek ba kin tun nye Adamu, ama anɔng aHauwa.

¹⁴Da ayet Adamu wu fɛ́ ba kin ku wɔrɔk awo, a kin yet abining e wu fɛ́ ba kin ku wɔrɔk, fɛ́ a kpa ni inɛn.

¹⁵Ngma na anɔng, banyining da sɛ isheshek nek kutes nnon, kɛ ba ya kashon ayɛt inɔɔk atsak, ni ishim, ni kusot ajɛrɛ, ni itot ice.