Read icen 1 ATimoti 3 Bible Online

1 ATimoti 3 - icen bible

1 ATimoti 3

¹Ifɛ̀ deng yet atsak: ke akak mi te iyɛ wu a shim a sot anet iyere bafi ikuus, a tsin tsɛt kutomong kutek.

²I se gbing-gbing afi iyere bafi ikuus na sot vit ikyɛng icɛɛt azaton wu. Anet fɛ́ a bereng abining wu na atsak, anet nhwyɛ, afi itekap kurɔm. Ayɔng fɛ́ ba ku nesek iratek, afi ishashang batsen. Ayɔng fɛ́ a kyem a tees bakak.

³Da na a yet ayɔng fɛ́ a nɔɔk ice ni isɔ awo, da ayɔng fɛ́ a tsɛsɛk ifa awo tit afi nhwyɛ, da ayɔng fɛ́ a mak iwɔng awo, da afi ishim itsɔm awo.

⁴I se gbing-gbing na yet ayɔng fɛ́ a kyem a bɛrɛng kari wu gyat, ayɔng fi nnon wu ku foos ifɛ̀ na ba ku nesek iratek.

⁵(Ke da anet da kyem bɛrɛng kari wu awo, a da nye nɛ na bɛrɛng banet Adakunom ɛ?)

⁶Da a bi yet anet yɔng fɛ́ a mɛsɛng shan atsak awo, kɔng a bi kpa kok ice, na bɛ na kpa ni ishɔt kyɔn tɛ aShetan kin di kpa.

⁷I se gbing-gbing banet amatse na ba tere nggɔn wu, kɔng a bi kpa ayɛt nsum, na kpa ayɛt agunung aShetan.

⁸Kpaf anɔng, won bashɔn bafi ikuus na ba sot bayɔng fɛ́ banet ka ba nesek iratek, bafɛ́ atsak, da banet fɛ́ ba dung sɔ ashi anap awo, ke na ba sot bayɔng fɛ́ ba dung tsɛsɛk itsɔm awo.

⁹I se gbing-gbing na bereng atsak atsik afi inɔɔk atsak ni kuyiring fok ishɔt mi ka ba ya awo.

¹⁰I se gbing-gbing na ba tun ka ba mara ninyɛn; ke ba sɛ vit inɛn, won na ba sot bashɔn bafi ikuus e.

¹¹Kpaf anɔng ba, won banyining, ne ba sot banyining fɛ́ ba nyes nggɔn fi in kyem ba ka ba nesek mo iratek, da ba bi sot bafi ncɛɛt abap awo, tit bafi nhwyɛ, bayɔng fɛ́ ba kyem na ba di te iyɛ ni ba.

¹²I se gbing-gbing ashɔn bafi ikuus na a yet amatek abining azining, i se gbing-gbing na a kyem a bereng nnon wu, na kunung kari wu yɛɛt.

¹³Bayɔng fɛ́ ba ra kutomong ishɔn bafi ikuus gyat, ba sɛs iyerek itek, ba cɛɛt ni iyɛ izining naton isɛ atsak bà na Anet-Isheshek aYeso.

¹⁴Ayet fok ngmash ni in bɛ azɔng, in tsin da jɛk nkyɔrɔk ira nang nɔng,

¹⁵ki in beseng izen, ni ngɔn rēn irèn fɛ́ banet di ki nye kusot ari Adakunom, fi in yet atsok ni itis atsak.

¹⁶Nkyɔrɔk yɔng fi in tsang se ni nɛt yet nratek ni irèn ikuus yit in se ane, Anet-Isheshek aYeso a bɛ azatse ni nse anet, Kabik Adakunom tonong, fok a se tabat, batomaza kin ku di, ba shara ifɛ̀ wu sak na banet ngma, banet azatse nɔɔk atsak ni wu, ba kin ku sok sak azanɛn ayɛt ízɔk.