Read icen 1 ATimoti 5 Bible Online

1 ATimoti 5 - icen bible

1 ATimoti 5

¹I bi gyɔng ashɔn awo, tit ku tabak tɛ a yet ada ngɔn. Nye na bacam tɛ barunyining,

²ni nye na banyining bako ti binggɔ ngɔn, ni nye na banyining bawosong tɛ banganyining ayɛt irèn gyat makiyi.

³Te nhwyɛ ngɔn na bakuma fɛ́ ba bɛ atitup kudaam.

⁴Awɛt ke akuma bi nnon ke babon wu ayi, won na ba kpa mara nggɔn ikuus bà ni igbingding kari bà, na anɔng wu fɛ́ ba di ki tarang báték nɛ badakop bà, nek anɔng e terek Adakunom iyɛ.

⁵Akuma fɛ́ a bɛ atitup kudaam, vit anet fɛ́ a da ku gbingding, a te iyɛ wu na Adakunom, na ya kashon na awon kunom na katuk, nek Adakunom ku sɛ mo.

⁶Awɛt akuma fi a tsɛsɛk nta kyek, a mi ku, ngma na fɛ́ a resek mo ni kutset.

⁷Nesek banet e itabak yeng, kɔn ba bi cɛɛt naton ba.

⁸Ngma anet fɛ́ da a kyɛm a nesek bafi izit wu awo, amak e bafɛ́ ari wu, a mi tone ni inɔɔk atsak wu, ibeseng wu wat ifi nhwyi.

⁹Vit akuma fi iyerek wu da nɔ ayɛt ayerek bakuma, ma ayɛ wu tsa nsɔk karataat ninyɛn, a kin se ayɛt kusot kutek na amatek mo ni kutset,

¹⁰ba ku rēn ni nggɔn ntek, ti ita nnon, ishashang batsen, ikus atak batsen, igbingding bafi mgbang ni inabak ice ni iras kaakyi ntomong ntek.

¹¹I bi te ayerek bakuma bawosong ayɛt kufumung e awo, nek izen fi ikɔk irɔm bà nyɔrɔk inabak ice bà ni ikuus Anet-Isheshek, ba da shim kuweneng.

¹²Na anɔng, na ba di kɔrɔk ice bá ishɔt, na ba beseng kushi fɛ́ ba kin tsang sok.

¹³Na anɔng, na ba nɔ ayɛt kusosok arut, na ba teng ba kuus nasa. Da kusosok arut kyek awo, wɛt na ba nɔ iteng anu, ni nrɔm bá hwyan, na ba tas nkyɔrɔk fi in se kpaf awo.

¹⁴Nek anɔng, imi nesek bakuma bawosong itabak, na ba ras nweneng, na ba tes nnon, na ba bereng nasa bá gyat, kɔn ba bi nɔɔk afi ifaa yit kawat ncɛɛt nmaane.

¹⁵Bakak ayɛt bà mi tirik kama ba won irèn sak ikuus aShetan.

¹⁶Ke abining akak fɛ́ a yet afi ikuus, bɛ akuma ari wu, na a ku sɛ mo, a bi won bafi ikuus ni kunanang ni iba awo, nɔng bafi ikuus di ki sɛ bayɔng fɛ́ da ba bɛ anet awo.

¹⁷Bashɔn bafi ikuus fɛ́ ba ras kutomong nate bafi ikuus gyat, ba kyem na ba ka ba nɔɔk iratek makiyi, amak e bayɔng fi kutomong bà yet ishara ifɛ̀ ni itees banet.

¹⁸Nek kufumung ajɛrɛ fɛ̀ ye, “Ba bi faam kanu amung ni i tsin ra kutomong awo.” Nɛ, “Anet itomong kyem na ba ku nɔɔk itarang wu.”

¹⁹I bi wes ato ni kucɛɛt fɛ́ ba bene naton ashɔn awo tit ma banet tsa bafaa sak bataat fɛ́ ba bene.

²⁰Bayɔng fɛ́ ba nye inɛn, won na ba ka ba tabak nate banet, nɔng nshɛrɛp banet di ki fok nnyim.

²¹In tsin cɛɛt ni ngɔn ashon Adakunom, nɛ Anet-Isheshek aYeso, nɛ ashon batomaza fɛ́ ba mi kasa, bereng itabak yeng vit ishim ice, i bi nye ikikak ayɛt ikasa awo.

²²I bi saas mbɔk naton banet ziri ziri awo, i bi sɔɔn ice ngɔn na anɛn bakak awo. Bereng ice ngɔn cɛ́l.

²³Won isɔ ashi wɔɔn na, di moon na ashi anap gyet nek kafa irɔk ngɔn, ni kurɔm ngɔn fi ku doro kaakyi izen.

²⁴Anɛn banet bakak mi wuruk dɛdɛt, a mi ta narɔ ishɔt ashon ba; anɛn afɛ́ banet bakak ne a nes ama bà.

²⁵Kpaf anɔng, ntomong ntek se wɛshɛk, ngma ni nyɔng fɛ́ ba nyes ni nɛt, ba da kyem ba nɛt ina awo.