Read icen 2 ATimoti 2 Bible Online

2 ATimoti 2 - icen bible

2 ATimoti 2

¹Di, arim hom, nyeseng gak nek itek fi in bɛ̀ yit ayɛt aYeso Kristi.

²Ngma nkyɔrɔk fi ngɔn mi foos in cɛɛt ashon banet dot, naban ina na bayɔng fɛ́ ba di ki te iyɛ ni ba, fɛ́ ba da tees bakak e bà.

³Sok kabak kafɔɔn kafi mgbang e sot atsom atek afɛ́ aYeso Kristi.

⁴Vit atsom fɛ́ a se na kabung kutomong wu, fɛ́ a kana yising na tse na ras kusot kukak zɛɛt, tit na nye ikyɛng fi i da tɛrɛk atekari wu iyɛ.

⁵Kpaf anɔng bà, vit anet fɛ́ a se ayɛt kuro itsi, fɛ́ a da kyɛm a ya kunang e, tit ma a kuus ntsi kuro me.

⁶I se yɛɛt anet ikap fɛ́ a kana bung ayɛt kutomong wu, na tun ya kutsin mbɔk wu.

⁷Yiring ni ikyɛng fi in tsin da taas, nek aTisa da ka nɔɔk ice irēn naton nkyɔrɔk e ngma.

⁸Yiring na aYeso Kristi fɛ́ ba ku donong ni rɛk, afi izit agwɔm aDauda. Nek anɔng fi in di shara ifɛ̀ itek deng.

⁹I yet nek ishara ifɛ̀ itek e deng fi i sak in tsin sɔ izoot, in di se ari inyang tɛ anet inɛn. Awɛt Ifɛ̀ Adakunom da ba kyɛm ba rosom ide ni inyang awo.

¹⁰Nek anɔng fi in di te gbinding na kaaki ikyɛng nek bayɔng fɛ́ Adakunom mi kasa. Nɔng ba bin sɛ kutset vit igang nek aYeso Kristi, ni inɔ ayɛt ízɔk fi i se avit nkum.

¹¹Ifɛ̀ deng yet atsak ye, Ki in ku yit gung ni wu, in da sot yit batset gung ni wu bà.

¹²Ki in te gbinding yit, in bi ya yit igwɔm gung ni wu. Ki in ku toon yit, a bi ki toon yit bà.

¹³Ki iyit shinishi yit ikyɛng fi in taas yit awo, iwu shinishi ikyɛng fɛ́ a taas, nek iwu kyɛm a toone ni ice wu awo.

¹⁴Man ni ka ba yiring e nkyɔrɔk nang, ni ka ba kɔrɔk kuto nanu shon Adakunom fok, da ba bi ras nanan abap naton Ifɛ̀ awo, nek da i bɛ́ ni itek awo, tit ni beseng bafi foos e kyɛk.

¹⁵Te nyɛk nɔng i da bin sɛ ishan nanu shon Adakunom, tɛ anet itomong fɛ́ da a fok nsum kutomong wu awo, na tees Ifɛ̀ atsak kpaf.

¹⁶I bi te ice ngɔn ni ncɛɛt abap in fi ibyɛs sak na Adakunom awo, nek anɔng e bang sas banet e na ba wey hwyii ni irèn ikuus.

¹⁷Itees ba me se tɛ agbɛng-nkanang fi kuya kurɔm ngma kusum. Ayɛt ba yet aHimeniyus nɛ aPiletus,

¹⁸iba fɛ́ ba mi won irèn ikuus ba, nek ba nye na banet fok idoro bafaben e mi tsang got. Anɔng e mi buruk bakak ni inɔɔk atsak bá.

¹⁹Awɛt itis fɛ́ Adakunom ta ide, vit ikyɛng fi i da kyɛm i te digit ide awo. I se ni jɛk ye, “ATisa rēn bayɔng fɛ́ ba yet bafuu,” nɛ, “Won ngma ayɔng fɛ́ a nye fok, iwu yet afɛ́ aTisa, won na wosong iras nkyɔrɔk nmaane.”

²⁰Ari karatek ba sɛs nkyɔrɔk zizɛɛt: nkak yet nfɛ́ atsɔm asɛng, akak yet nfɛ́ atsɔm akan, akak yet nfɛ́ ákon, akak yet nfi irɔp, akak yet afi ntomong ibyɛs, nɛ akak yet afi ntomong ntek.

²¹Ngma anet fɛ́ a kanang ice wu yik-yik ni ikyɛng ibyɛs, a da sot ti ikyɛng fɛ́ ba di ki ra kutomong kutek ni wu, ba mi ku sak jɛrɛ, ikyɛng fɛ́ atekari tsɛt, a mi kana nye nek ira kaakyi kutomong kutek.

²²Teng ngɔn imaan ikɔk fɛ́ bacam tsɛt, di kuus kusot kutabat, ni kusot abik, ni ishim, ni imen nhwyɛ na bayɔng fɛ́ ba yes aTisa ni iyɛ ikan.

²³Da ikyikak bi da moon ni nggɔn ishɔp nɛ nanan fɛ́ na se vit ice me awo, nek ngɔn rēn na bes ni ifa.

²⁴I se gyat na ba sɛ asam Adakunom ayɛt ifa awo; tit, na a bɛ́ nggɔn ntek sak na banet ngma, na a kyem itees banet, na a sot anet akabɔk.

²⁵Bayɔng fɛ́ ba ku raba, na a ka ba tees hwyɛ, ni ite iyɛ fok Adakunom bi ka ba sak na ba won anɛn bà na ba tirik sak irēn atsak,

²⁶nɔng na ba bi nɔ ni in nhwyɛ bà na ba wuruk ayɛt agunung aShetan fɛ́ a mi ka ba tekap nɔng ba da nye kushim wu.