Read icen 2 ATimoti 4 Bible Online

2 ATimoti 4 - icen bible

2 ATimoti 4

¹In tsin da nɔk agbat ifɛ̀ deng na anu shon Adakunom nɛ aYeso Kristi, ayɔng fɛ́ a bi ra bayɔng fɛ́ ba se ni kutset ni nkom ishɔt, a bi tɛ bun na ya igwɔm.

²Te nyɛk ni ishara Ifɛ̀ Adakunom, kɛ na kawat a, ke vit kawat ayi. Ka ba tonong iburuk bá, ka ba gyɔng, ka ba tabak ayɛt kuhwyɛ, ni itees.

³Nek izen bi bɛ́ fɛ́ banet da shim iwees ato ni itees atsak awo, tit ikyɛng fɛ́ ayɛ bá shim kyɛk, ni ikyɛng fɛ́ ato bá hwyaan ni ifoos e. Nek anɔng, ba tusung ace bà na banet itees fɛ́ ba da ka ba taas ikyɛng fɛ́ iba shim ifoos e.

⁴Banet bi raba ikuus atsak, ba bi wees ato ni nkyɛng-ashon.

⁵Awɛt ingɔn, tekap ice ngɔn ayɛt akaakyɛ ikyɛng, te gbinding ayɛt izoot, ra kutomong anet ishara ifɛ̀ itek, ra kaakyɛ kuri kutomong isam na Adakunom.

⁶Awɛt imi, izen hom mi nye fɛ́ ba da ki nabak tɛ inabak-akuce anu shon Adakunom. Nek izen fi in da won kutset kang mi bɛ́ bakat.

⁷In mi ra itsom hom itek, in mi gang i tsi hom yɛɛt, in mi gang i tsi hom gyat, in bereng inɔɔk atsak hom gyat sak ni igang e.

⁸Yɔkɔnɔng ana, izang kusot kutabat hom tsin di tot fɛ́ aTisa, anet ishɔt atsak ba di nɔk ni kunom e yɔng. Da imi azi hom kyɛk awo, awɛt ngma na bayɔng fɛ́ ba bi iya iyɛ ni tot kubun wu.

⁹Te nyɛk da bɛ́ ni imi ziri,

¹⁰nek aDemas mi di wobok nek ishim nkyɔrɔk azatse nang, a tseng sak na aTesaloni, na aKirzens tseng sak na aGalati, na aTitus tseng sak na aDalmatiya.

¹¹ALuka wu kyɛk fɛ́ a se gung ni imi. Tsɛt aMarkus da bɛ́ yin gung, nek a di sɛs mo ni kutomong.

¹²In tom aTikikus sak na Afisa.

¹³Izen fi i da bɛ́ ni i di bereng mo kutukusuk kukpin hom fi in won ni bɔk aKabus na aTorowas, na afumung ifa hom, imakmak e kufi ijɛk yɔng fɛ́ ba nye iko na akpa.

¹⁴Alekzanda fɛ́ a yet atu di nye anyas gyet awo, aTisa bi ku tarang izang ikyɛng fɛ́ a di nye ne.

¹⁵Ngɔn bà, nye hwyɛ ni wu, nek a ra ifup ni ifɛ̀ yit gyet awo.

¹⁶Ni imɛsɛng e fi in da tɛnɛng ice hom na anu shon ishɔt, vit anet fɛ́ a run kama hom, ngma bá ba di wobok. Won Adakunom na a fa nkyɔrɔk nang naton ace bá awo.

¹⁷Awɛt aTisa di sɛ mo, a di nɔk agap, in kyɛm in shara Ifɛ̀ wu yɛɛt sak ni Ícɛn-iduk, na ba fok Ifɛ̀ me bà. A tɛ di sheshek nanu akukum.

¹⁸ATisa di ki sheshek ayɛt kaakyɛ kuri imaan e, a da tseng ni imi kyang sak ni igwɔm wu na azanɛn. Won iratek ni sot ifuu ayɛ na ayɛ! Anɔng.

¹⁹Di nye show aPrisila na Akwila, na bafɛ́ asa aOnesiforus.

²⁰Arastus rēn resek mo na aKorinti, in won aTurofimus ni rɔk na aMiletus.

²¹Te nyɛk i da bɛ́ gyam dang abolosh na nye. AYubulus, nɛ aPudins, nɛ aLayinus, nɛ aKalayudiya, ni nshɛrɛp baruneng da nye show.

²²Won aTisa na se gung na kabik ngɔn. Won itek wu ni se gung ni yin.