Read icen ATitus 1 Bible Online

ATitus 1 - icen bible

ATitus 1

¹Kufumung kang ne ni mi aBulus, asam Adakunom nɛ atom aYeso Kristi. Ba di sak in sot atom nek in di gbingbing inɔɔk atsak bayɔng fɛ́ Adakunom kasa, nek in ka ba sɛs mo na ba rēn katsak fɛ́ a se yɛɛt na bafi ikuus Adakunom.

²Atsak e ni irēn e bɛ́s ni ite iyɛ fi i yet kutset vit igang. Adakunom fɛ́ da a tak mbɔɔs awo, a nye kushii wu neme ni tumung izen naton kutset vit igang e me.

³Wat na akpaf izen e, a nɔɔk itom wu, iyɔng fi imi yet anet ishara ifɛ̀ itek e me, fi in tin yet anet ibereng e, ni ifɛ̀ Adakunom Anet-Isheshek yit.

⁴Sak na atsitsak ari hom aTitus na afi ifiri inɔɔk atsak yit. Won itek ni kusot kukyang fi ku nes na Ada Adakunom nɛ Anet-Isheshek aYeso Anet-Isheshek yit ni ku se ni ngɔn.

⁵In da won na aKirit nɔng da gang ikyɛng fi ikyɛk, ni kasa bakɔk-ashon na kaakyɛ kuwɔp, kyɔn ti in da fɛ̀ ni ngɔn.

⁶I se gbing-gbing, akɔk-ashon na sot vit inɛn ashon banet, amatek abining azining, ayɔng fi nnon wu yet nafi ikuus, na bɛ́ aduk nggɔn ke na rana ifok ifɛ̀ awo.

⁷Kyɔn tɛ ba di nɔɔk afi iyere bafɛ́ ari Adakunom, kpaf anɔng, iwu na a se vit inɛn. A bi cheshek ice ke na bɛ́ iyɛ fulul awo, kɛ afi isɔ awo, kɛ afi itsɛt ifa awo, kɛ afi ishim itsɔm awo.

⁸Tit na a sot afi ishashang batsen, na afi ishim ikyɛng itek, na afi ibereng ice, na afi kusot kutabat, afɛ́ jɛrɛ, na afi ifoos itabak.

⁹I se gbing-gbing, akɔk-ashon na a bereng atsitsak ifɛ̀ Adakunom gak kpaf tɛ fɛ́ ba ku tees mo, nɔng a di gbinding bakak ayɛt ishara ifɛ̀ me ni itees atsak, na ma gyɔng bayɔng fɛ́ ba raba ifɛ̀ me bà.

¹⁰Nek bafi idoro nhwyɛ di se gaan, bafi ncɛɛt abap, bafi mbɔɔs, imakmak e bayɔng fɛ́ ba di tes inɛn fok ma ba ya katse.

¹¹I se gbing-gbing na ba ka ba sak na ba te yuu, nek ba beseng nasa ni itees fi da i sɛ gyat na ba tees awo, nɔng ba bin da tsɛt kurúm abap.

¹²Azining ayɛt batan ba mang fɛ̀ ye, “Banet aKiritan yet bafi mbɔɔs kaakyi izen, aduk ányam ayit, na karut ni kuyak makiyi.”

¹³Ifɛ̀ deng yet atsak, nek anɔng, i bi won dang ka ba kɔrɔk kuto awo, nɔng ba rēn atsak abik,

¹⁴na ba won ite nhwyɛ ba ni nggɔn baYahuda, tɛ ni ifɛ bayɔng fɛ́ ba raba atsak.

¹⁵Sak na bayɔng fɛ́ ba se cɛ́l, ngma nkyɔrɔk se cɛ́l, awɛt na bayɔng fɛ́ ba mi beseng ace bà, vit iba ni inɔɔk atsak, vit ikyɛng fi i se cɛ́l ni iba. Ngma kuyiring bà nɛ ayɛ bá mi beseng.

¹⁶Ba nye fok ba rēn Adakunom, awɛt nggɔn bá mi ku toon. Ba yet a bush e, gbɔrɔk ice, vit ikyɛng kak itek fɛ ba da kyem ba nye.