Read icen AFilimon 1 Bible Online

AFilimon 1 - icen bible

AFilimon 1

¹Kufumung e ne ni imi aBulus, afi inyang mok Anet-Isheshek aYeso nɛ aTimoti aruneng yit, sak na aFilimon afidang yit nɛ afidang itomong yit,

²nɛ anganeng yit Afiya nɛ Akipus afidang yit ni itsom nɛ bafi ikuus fɛ́ ba nyiis ari ngɔn:

³Won itek ni kusot kukyang fi ku nes na Ada yit Adakunom nɛ aTisa aYeso Kristi ni ku se ni yin.

⁴In nesek Adakunom in ifeng ni izen fi in da yiring na awon,

⁵nek ni ifoos inɔɔk atsak ngɔn na aTisa aYeso, ni ishim fi ibɛ nek banet Adakunom kusum.

⁶In ra won, fok ni i ya kashon ayɛt inɔɔk atsak fi i ki moon yit, nɔng i da bin sɛ atsik irēn ngma nkyɔrɔk ntek fi in bɛ yit ayɛt Anet-Isheshek.

⁷Ishim fi ibɛ, mi di barang mo agap makiyi aruneng, i mi tɛrɛk banet Adakunom ayɛ.

⁸Nek anɔng, ngma ni kukyem fi in bɛ ayɛt Anet-Isheshek ni in fɛ̀ ni ngɔn ni i nye ikyɛng fi in fi in shim,

⁹ngma na anɔng, in tsin ra awon ni ngɔn nek ishim. Imi aBulus ni ikop in, ni kusot hom tɛ afi inyang Anet-Isheshek aYeso.

¹⁰In tsin ra awon ni ngɔn akuce ari hom aOnisimus. A sot ari hom ni imi ari inyang.

¹¹A tsang yet aduk anet ni ngɔn, awɛt yɔkɔnɔng a mi sot anet atek sak ni yit ngma.

¹²In tsin ku yirik ni ngɔn, ti icek iyɛ hom.

¹³Zɔng ki in ku won azeng ni imi, nɔng a di ki nyes ikyɛng fi ngɔn tsang di ras e, ni inyang deng fi in se ne nek ishara ifɛ̀ itek.

¹⁴Awɛt in shim in ra ikyikak dang irēn ngɔn awo, nɔng itek ngɔn nye da sot tɛ ba da te mo i inɛn awo tit ni ishim iyɛ ngɔn.

¹⁵Nyɛn ikyɛng fi i sak ba da kam ni wu nfi kizen gyet, nɔng a da tɛ bun ni ngɔn vit nkum e,

¹⁶da tɛ asam kong awo, tit tɛ anet atek, aruneng yit. A mi sot icek iyɛ ni mi, a da dung nye itek sak ni ngɔn, tɛ anet awe nɛ aruneng yit ni kuus Adakunom.

¹⁷Nek anɔng, ki ngɔn di sok tɛ afidang itomong ngɔn, ni ku shan ni mbɔk nfa, kpaf ti imi wu i tsin di shan.

¹⁸Kɛ a mang da nye inɛn ke i ku kuus ikyikak ayi, ni yirik kuta me ni mi.

¹⁹Imi aBulus wu in jɛk kufumung e kang ni kubɔk in. Imi da ka tarang. (I yet ikyɛng icɛɛt awo, ngɔn ice ngɔn bɛ kuta kutset kufas fi i sɛ ni mi.)

²⁰Nek anɔng aruneng, won ni in sɛ ikyikak ni bɔk ngɔn ayɛt aTisa; di terek iyɛ nek Anet-Isheshek.

²¹In tsin tɛ iyɛ fok i di ki fok, in tsin da jɛk e, in rēn fok i da nye kashon ni ikyɛng fi in fɛ̀ ni ngɔn.

²²Ikyɛng izining fi ikyɛk yet fok, di nye kutu batsen, nek in bi ite iyɛ fok in bin ki sɛ yin nek ishan awon yin.

²³Apafaras, afidang inyang hom ayɛt Anet-Isheshek aYeso, tsin da te show.

²⁴Ngma na aMarkus nɛ Aristakus, nɛ aDemas, nɛ aLuka, bafidang itomong in.

²⁵Won itek aTisa aYeso Kristi ni sot gung ni kabik yin.