Read icen BaYahuda 12 Bible Online

BaYahuda 12 - icen bible

BaYahuda 12

¹Nek anɔng, in bɛ̀ yit kudyɛng banet anu icɛɛt fɛ́ ba ki te yit nate, won in barak yit kaakyi ikyɛng fi i ki tɛnɛsɛ yit nɛ anɛn fɛ́ a sot agunung yit kaakyi izen. Won ni in te yit nyɛk ni i tsi fɛ́ ba mi sak ashon yit.

²Won ni in ta yit ayisi yit naton aYeso, iwu yɔng fɛ́ a yet itumung ni igang inɔɔk atsak yit. Iwu fɛ́ nek itɛrɛk iyɛ fɛ́ ba mi sak ashon wu, a te gbinding ni mgbang itekak, a daam ni nsum e awo. A sonong ni bɔk iyak kuta igwɔm Adakunom.

³Yiring yin ni wu yɔng fɛ́ a te gbinding ni iraye ni bɔk bafi inɛn, kɔn i bi rɔrɔng yin na ki te yin gbɛrɛk.

⁴Ayɛt igigashang yin na anɛn, igigashang yin mi kyem sak inosong nasok awo.

⁵Iyin mi te burum yin ni kucɛɛt ite gbagba fok iyin yet yin nnon hom ɛ: “Arim hom, i bi byɛs itabak aTisa awo. I bi te gbɛrɛk ni izen fɛ́ ba da kɔn awo.

⁶Nek aTisa me nye bayɔng fɛ́ a ka ba shim anɔng, iwu tabak bayɔng fɛ́ a ka ba shan ba sot nnon wu.”

⁷Nye yin gbinding ayɛt mgbang, sok yin ina ti itabak fɛ́ Adakunom nyes nnon wu ne, nek akyi nggon fɛ́ da ada ka won dang ka ka tabak ɛ?

⁸Ke da ba ki tabak yin tɛ ba di tabak ngma nnon awo, idɔng tonong fok, iyin yet yin ashaam nnon, da natitup nnon awo.

⁹Ama anɔng, in bɛ̀ yit bada yit ni irɔm fɛ́ ba ki tabasa yit, ni in ka ba foos yit ifɛ̀, i da wat se yɛɛt ni in shan yit itabak Ada yit afɛ́ abik nek ni di sɛ yit kutset awɛ?

¹⁰Bada yit ni irɔm ki tabasa yit in fi kizen hyiit, gyat ni ku di bá, awɛt Adakunom ki tabasa yit nek itek yit, nɔng in sɛ yit kanu kafiit ayɛt kusot ajɛrɛ wu.

¹¹Vit itabak fi i ta ni izen fɛ́ ba se ne, tit ibeseng iyɛ kyɛk, awɛt ama anɔng, ni ki bɛ́ yit ni imen iyɛ ni kusot kutabat sak na bayɔng fɛ́ ba shan itabak e.

¹²Nek anɔng, sok yin mbɔk yin fi in mi rɔrɔng, nɛ akuut yin fɛ́ a mi te gbɛrɛk.

¹³“Nye yin irén tɛlɛl fi i di ki gosok yin,” kɔng ámɛrɛk bi ka na tsip mo, aza i sɛ kukyang.

¹⁴Nye nyɛk yin, sot yin kyang na akaangan, sot yin jɛrɛ, nek vit anet fɛ́ a da kyem a di aTisa ke da a se jɛrɛ awo.

¹⁵Nye yin yɛɛt, kɔng akak bi ki tirik yin ni i won yin itek Adakunom. Kɔng akak bi sot tɛ kukpashak kuney fi ki ku rasak ni ku bɛ́s ni ndaam ni ibeseng nshɛrɛp banet dot.

¹⁶Nye yin yɛɛt, kɔng akak bi beseng ice ni kubi, kɛ na a sot vit ntsi Adakunom ti aIsuwa, fɛ́ a rɛp iya itekari wu ti nggon imɛsɛng e nek kuyak iya kazining kyɛk.

¹⁷Ama anɔng, kyɔn ti i di rēn yin, ni izen fɛ́ a tsɛt a ya itekari itek e, ba kin ku rone ni ide. Nek a kyem a shesheng ikyɛng fɛ́ a tsang nye me awo, ngma na nayisi fɛ́ a wosong korok ina.

¹⁸Nek iyin mi bɛ́ yin tɛ bafi aIsrela kin tse awo, ni ikyɛng fi da kyem ira yin, ni ihwyanang aSinay, fi i tsin ron na abelem árong, ni kurin hwyining, ni itsombos,

¹⁹ni ifɛsɛm igba, ni ifoos kutɔ. Izen fɛ́ banet fok kutɔ me, na ba kpa tsot akabɔk ye da ba shim ba tɛ ba fok iko awo,

²⁰nek iba da kyem ba nye ikyɛng fi ifɛ̀ me fɛ̀ na ba nye awo, ye, “Ke ni iyet inyam fi ira ihwyanang e ayi, ba da woro iye na ata.”

²¹Karɔ me kin yet ikyɛng inyim makiyi, fi i sak aMusa di fɛ̀, “Kurɔm hom tiim nek inyim.”

²²Awɛt iyin mi bɛ́ yin ni ihwyanang aSihiyona, sak na aRushelima azanɛn, kuwɔp Adakunom atset. I mi bɛ́ yin sak narɔ fɛ́ kudyɛng batomaza di nyim ni iyɛ ikan,

²³I mi bɛ́ yin sak ni inyim iyɛ ikan ifi nnon imɛsɛng Adakunom, na yɔng fɛ́ ayerek bá se ni ijɛk azanɛn. I mi bɛ́ yin sak na Adakunom anet ishɔt banet kusum, i mi bɛ́ yin sak na nabik banet batek fɛ́ ba mi ka ba nye tabat,

²⁴i mi bɛ́ yin narɔ aYeso fɛ́ a yet anet inyeseng nate irosom kushii kufas, i mi bɛ́ yin sak ni ifim nasok fɛ́ na cɛɛt ifɛ̀ fi iwaat nasok aHabila.

²⁵Nye yin yɛɛt, kɔng i bi rayin ayɔng fɛ́ a cɛɛt. Ke bayɔng fɛ́ ba kin raba ifok itabak wu azeng azatse, kin kyem ba hwyet awo, na akyɛ kuri irèn fi iyit da hwyet yit ɛ? Ki iyit tirik yit kama na ayɔng fɛ́ a se azanɛn fɛ́ a ki tabat yit ɛ?

²⁶Ni izen yɔng, kutɔ wu kin zuut kazatse, awɛt yɔkɔnɔng a mi nye kushii, “In bi tin zuut kazatse azika awo, tit ngma na kazanɛn.”

²⁷Ifɛ̀ me deng, “in bi tin” tonong fok, ba bi ngaat ngma nkyɔrɔk yɔng fi in zuut, nɔng in yɔng fi da in zuut awo, bi di nak.

²⁸Nek anɔng, a yet iyit tsin shan yit igwɔm fi da izuut awo, i se gyat ni in tere yit Adakunom, ni in ku ya yit ntong ayɛt ishim iyɛ iratek ayɛt itiim irɔm,

²⁹nek “Adakunom yit yet kurong fi ku ya.”