Read icen BaYahuda 13 Bible Online

BaYahuda 13 - icen bible

BaYahuda 13

¹Ya yin kashon ni itonoso ishim sak na bafidang tɛ baruneng.

²I bi te burum yin dang shashang yin batsen awo, nek ishashang batsen, bakak mi ya na batomaza dang rēn.

³Yiring yin ne bayɔng fɛ́ ba se na nasa-inyang, ti iyin se yin gung ni iba azɔng, nɛ bayɔng fɛ́ ba ka ba nesek iyɔm, ti i tsin sɔ yin mgbang gung ni iba.

⁴Won kaangan na nesek kuweneng iratek de, won kameneng iweneng na ka sot cɛ́l, nek Adakunom bi ra bafi iras irɔs nɛ bafi iras kubi ishɔt.

⁵Won nggɔn yin bi sot in fi ishim itsɔm awo, won ikyɛng fi i bɛ̀ yin i ki kyem yin, nek Adakunom fɛ̀ ye, “Imi bi ki wosong yin awo, jɛm-jɛm; imi bi ki tirik yin kama awo, jɛm-jɛm.”

⁶Nek anɔng in cɛɛt yit na agap iyɛ, “ATisa wu a di sɛs mo; In da fok inyim awo. Akyɛ fɛ́ anet kyem a di ki nye ne yɛ?”

⁷Yiring yin na bakɔk-ashon yin, bayɔng fɛ́ ba ki tees yin ifɛ̀ Adakunom. Di yin nggɔn isot bá, ni mɛɛs yin inɔɔk atsak bá.

⁸AYeso Kristi mi shesheng awo, a se tɛ a di se ni ire, atut, na katson.

⁹I bi wosong yin ndiri-ndiri itees ni in ki tiri yin awo. I se gyat ayɛ yin na a sɛs agap ni itek fi ines na Adakunom, da naton ntsi amok iyak awo, fɛ́ da a bi itek ikyi ikak sak na bayɔng fɛ́ ba ya ina awo.

¹⁰In bɛ̀ yit kuta ashosh kukak fɛ́ bayɔng fɛ́ ba ra kutomong ni kutɔmɔng e, ba bi irèn iyak ni ko awo.

¹¹Nek agbat-agbat àware, a tses na nos nasok inyam ari me sak na Karɔ aJɛrɛ me, nek inabak kunang ifuut anɛn, awɛt ba shosh inam e amatse karɔ inyis.

¹²Nek anɔng aYeso sɔ izot ama iwɔp bà, nɔng a di sak banet ba di sot jɛrɛ nek nasok wu.

¹³Nek anɔng, won in tse yit ni wu ama wɔp, nɔng in bin di sɔ yit nsum gung ni iwu.

¹⁴Nek azeng azatse, in bɛ̀ yit kuwɔp fi ku di ki nak awo, in tsin tsɛt yit kuwɔp fi ku bi bɛ́.

¹⁵Won ni in ya yit kashon inabasa kunang itere sak na Adakunom ayɛt aYeso. Kucɛɛt anu yit fi ku nesek kanu sak ni iyerek Adakunom.

¹⁶I bi te burum yin inye itek, ni kabasa yin ikyɛng fi i bɛ̀ yin na bakak awo, nek kuri kunang kuyɔng ko ku tɛrɛk Adakunom iyɛ.

¹⁷Foos yin bakɔk-ashon yin, nye yin ikyɛng fɛ́ igwɔm fɛ̀. Iba ba ba tsin ki yɛrɛ yin tɛ bayɔng fɛ́ ba bi nɔɔk ifɛ̀ naton yin. Ka ba foos yin nɔng kutomong bá bin se ni itɛrɛk iyɛ, da ni ku sot kunanang awo, nek anɔng e da ki bɛ́ yin ni itek awo.

¹⁸Ki ras yit awon. Iyit rēn yit fok ayɛ yit yet akan, in shim nye yit kusot kutek na akaakyi irèn.

¹⁹In tsin ra awon ni yin fok, ni ra yin awon nɔng ba bin bun ni imi ni yin ayɛt izen.

²⁰Won Adakunom fɛ́ a shim kusot kukyang, iwu fɛ́ a donong aTisa yit aYeso ni iku, agbat anek ítsamang, na anɔng wu fɛ́ ba di rosom kushii ayɛ vit nkum ne nagang nasok wu.

²¹Won na a ki nɔɔk yin kaakyi itek fi i da sak ni i nye yin kushim iyɛ wu, won iwu na a nye ngma ikyɛng fɛ́ a shim ayɛt yit, fi i da ne na aYeso Kristi, iwu fɛ́ ba da ku tere ayɛ vit nkum. Anɔng.

²²Ábaruneng, in tsin ra awon ni yin fok, nye yin akabɔk ni itabak hom, nek in mi ki jɛk yin kaban fumung kang.

²³In shim ni i rēn yin fok, ba mi bisik aruneng yit aTimoti ari inyang. Ke a wat bɛ́s wu, in bi bɛ́ in ki di yin gung ni iwu.

²⁴Te show yin ngma bakɔk-ashon yin, ni nshɛrɛp banet Adakunom. Baruneng fɛ́ ba ne na aItaliya tsin ki tom yin ashow bà.

²⁵Won itek Adakunom ni se gung ni iyin ngma.