Read icen BaYahuda 2 Bible Online

BaYahuda 2 - icen bible

BaYahuda 2

¹Nek anɔng, i se gbing-gbing ni in ka na nye yit yɛɛt naton ifɛ̀ fi in ma fok yit ide, kɔn in ba sot yit kpɛɛ awo.

²Ki ifɛ̀ deng fi ne na batomaza yet atsitsak ifɛ̀, nek anɔng, ngma ayɔng fɛ́ a rawu ishan itabak de, kɛ na sot gbarak, a da shan itabak fi ikyɛm kpaf ni wu,

³in da tsang anɛ ni in hwyet yit, ki in rayit agbat-ifɛ̀ isheshek yeng ɛ? Ifɛ̀ isheshek deng fɛ́ aTisa kin man tumung taas e, ba mi ki tonong yit ide wɛshɛk nanu bayɔng fɛ́ ba kin tin fok ide ni wu.

⁴Adakunom tɛ a ban tonong ifɛ̀ wu naton ifɛ̀ bá me, ni irèn ikyɛng idi, ni nkyɔrɔk ayɔɔt, ni ndiri ntomong abes, ni nnang fɛ́ Kabik aJɛrɛ kabasa ina kpaf ni shim wu.

⁵Igwɔm fi i bi bɛ́ me, idɔng fi in tsin di cɛɛt yit yɔkɔnɔng, da Adakunom nɔɔk batomaza iya igwɔm e awo.

⁶Awɛt ayɛt kufumung Ifɛ̀ Adakunom, anet akak kin cɛɛt ye, “Wo Adakunom! Anet awe yet akyɛ fi ngɔn ka daam ni iwu yɛ? Kɛ, arim anet yet akyɛ fi i tsin ku bereng gyat anɔng ɛ?

⁷I ku sak a sot lɛɛ na batomaza nfi ki izen gyeet. Awɛt ama me, i ti ku nɔk ízɔk ni iratek,

⁸i ti i ku nɔk ice iya igwɔm azaton nkyɔrɔk ngma kusum.” Izen fɛ́ ba fɛ̀, Adakunom ku sak ice iya igwɔm azaton akaakyi ikyɛng, idɔng itonong fok, vit ikyi ikak fɛ́ a won ide ama. Ngma ne anɔng, yɔkɔnɔng ana, in ma kyem in di yit ice iya igwɔm anet e ni nkyɔrɔk e ngma awo.

⁹Awɛt yɔkɔnɔng, in di yit aYeso fɛ́ ba ku sak a sot lee na batomaza nfi ki izen gyeet. Awɛt ama anɔng, ba ku nɔk ízɔk ni iratek, nek iku izot fɛ́ a sɔ. A yet nek itek Adakunom wu fi i sak a di sɛ iku me nek akaangan.

¹⁰A yet Adakunom wu nek ice wu ni nek iwu fɛ́ a nye kaakyi ikyɛng. Nek anɔng, a di i ku se yɛɛt a sak aYeso a shining gyat ni irèn isɔ izot, nɔng a bin di bɛ́ ni nnon dot na ba sɛ kanu kafuba ni ízɔk wu. Nek a yet aYeso wu fɛ́ a yet itis fɛ́ a da ka ba tsaa sak i sɛ isheshek.

¹¹Iwu fɛ́ a kus banet jɛrɛ na anɛn bá, iwu ni ba fɛ̀ ba mi sot jɛrɛ me, ba bɛ̀ Ada azining. Nek anɔng, da aYeso tɛ fok nsum na ka ba yes baruneng awo.

¹²A fɛ̀ na Adakunom, “In da taas baruneng iyerek ngɔn, nate bafi ikuus ngɔn, in da ka tere.”

¹³A tɛ a fɛ̀, “In da te yɛndɛng ni wu.” A tɛ a fɛ̀ bà, “Di, Imi yo ni nnon fɛ́ Adakunom ma di nɔk.”

¹⁴Ana ke fi nnon anet awe di se ni kurɔm na nasok, aYeso ikyɛng wu a sot nagbɔng ti iba. A ra anɔng e, nɔng nek ni irèn iku wu, a bi di wey ne aShetan fɛ́ a bi ice naton iku.

¹⁵A yet ni irèn iyeng e ye, nɔng a di bisik washak bayɔng fɛ́ ngma kusum kusot bá se ni isam nek inyim iku.

¹⁶I se wɛshɛk fok, da batomaza ba fɛ̀ a ka ba sɛ mo awo, tit bafi izit aIbrahim ba.

¹⁷Nek anɔng, fɛ́ ba ku sak mo na sot tɛ baruneng wu ayɛt akaakyi irèn, nɔng a da bin di sot Anet angmishish nɛ atsitsak Agbat-áware afi kutomong Adakunom, nɔng a di ki sok anɛn banet e.

¹⁸Nek iwu ice wu a mi bamang izot ni izen imara wu, nek anɔng a da kyem a gbinding bayɔng fɛ́ ba se ayɛt imara.