Read icen BaYahuda 3 Bible Online

BaYahuda 3 - icen bible

BaYahuda 3

¹Nek anɔng, ábaruneng fi i se yin jɛrɛ, iyin fi i mi sɛ yin kanu kafiin ni iyes sak azanɛn. Sak yin kuyiring yin naton aYeso fɛ́ a yet atom nɛ Agbat àware, ayɔng fi in ma fɛ̀ yin, in nɔɔk yit atsak ni wu.

²AYeso ra kutomong wu na katsak sak na ayɔng fɛ́ a ku myak, kyɔn tɛ fɛ́ aMusa kin ra kutomong wu na katsak ayɛt banet Adakunom.

³AYeso kyem na ba ku nɔk iratek fi i naat ifɛ́ aMusa makiyi, kyɔn tɛ anet inok kutu a waat kutu me ikyɛng ko ni iratek.

⁴Kaakye kari bɛ̀ anet inok ka, awɛt Adakunom wu a yet anet inok akaakyi ikyɛng.

⁵AMusa ra kutomong wu na katsak tɛ asam ayɛt banet Adakunom. A tonong ifɛ̀ fɛ́ Adakunom bi tak ide sak ashon.

⁶Awɛt Anet-Isheshek ra kutomong wu na katsak tɛ Arim e, fɛ́ a bi ice azaton ngma banet Adakunom. Iyit ba in yet yit banet wu me, ki in sot yit ni iyɛ ting, ni ite iyɛ fi in di ki tsot yit kugwɔm.

⁷Nek anɔng, kyɔn tɛ fɛ́ Kabik aJɛrɛ fɛ̀, “Atut, ki ngɔn fok kutɔ wu,

⁸i bi sot yin ni kugbarak iyɛ awo, kyɔn tɛ banet fɛ́ ba kin dorok nhwyɛ awo, ni izen fɛ́ ba kin di imara natse,

⁹azɔng wu fɛ́ badakop yin kin di mara, ba tɛ ba di bamang mo, ngma ne fɛ́ ba kin di ntomong hom fi in kin ras ina ayɛ nsɔk nnaas.

¹⁰Nek anɔng fi in kin beseng iyɛ hom na bafi kuzam kuyɔng, wat in fɛ̀, ‘Kaakyi izen kuyiring bá se kpɛɛ ni imi, ba rēn irén hom awo.’

¹¹Ayɛt ibeseng iyɛ hom, in nye kushii ye, ‘Jɛm-jɛm, ba bi nɔ na nawu hom awo.’ ”

¹²Nye yin yɛɛt ábaruneng, iba sot yin ne ayɛ anyas ni iraye ishan atsak ayɛt ayɛ yin awo, fɛ́ i da ki sak yin ni tirik yin Adakunom atset kama.

¹³Tit ni i gbinding yin bafidang kaakyi izen. Ra yin kutomong na kaakyi kawat fi i sɛ yin, fɛ́ ba yes “Atut”, kɔn akak ayɛt yin bi se gbarak ni irèn fi inɛn di wɔrɔsɔ anet awo.

¹⁴Iyit bɛ̀ yit kanu kafiit na Anet-Isheshek, ki in bereng yit gak sak ni igang e, idɔng fi in tsang di te yit agap ni imɛsɛng e.

¹⁵Kyɔn tɛ fɛ́ ba tsin mɛsɛng fɛ̀, “Atut, ki ngɔn fok kutɔ wu, i bi sot gbarak awo, kyɔn ti fi i kin te ni izen idorok nhwyɛ yame.”

¹⁶A yet bangan ba fɛ̀ ba kin fok kutɔ Adakunom, ba ma dorok ni kuhwyɛ yɛ? Ngma ba, ba kin yet bayɔng fɛ́ aMusa kin wuruk ni ba ni mben aMasat awɛ?

¹⁷A yet bangan ba fɛ̀ Adakunom kin di beseng iyɛ ayɛ nsɔk nnaas ni ba yɛ? Ba yet bayɔng fɛ́ ba ra inɛn, fi nkom bá kin kpas natse awɛ?

¹⁸A kin yet bangan ba fɛ̀ Adakunom kin di shiwu jɛm-jɛm a bi nɔ na nawu wu awo yɛ? A kin yet iba me yɔng fɛ́ ba raba dang fok ifɛ̀ wu awɛ?

¹⁹Nek anɔng, in mi di yit, nek iraba ishan atsak bá ye fi i sak da ba kyem ba nɔ na nawu wu awo.