Read icen BaYahuda 5 Bible Online

BaYahuda 5 - icen bible

BaYahuda 5

¹Kaakye agbat àware ba ku myak ayɛt banet, nɔng a bin ra Adakunom kutomong ami ma banet e. A nesek nnang ni inabak-akuce sak na Adakunom nek ikusu anɛn banet e.

²Nek iwu ikyɛng wu a bɛ̀ kurat wu, nek anɔng a kyem a bereng bayɔng fɛ́ ba se vit irēn awo, nɛ bayɔng fɛ́ ba dun irèn yɛlɛl.

³Ikyɛng e dɔng fi i sak, i se gbing-gbing iwu na teng nabak ashosh nek anɛn ice wu, a da ne tɛ a nabak nek anɛn banet.

⁴Vit anet fɛ́ a nɔɔk ice wu kutomong kuratek kang. Anet kyem a sot agbat àware awo, tit ma Adakunom ku yes mo, kyɔn tɛ a kin yes aHaruna.

⁵Idɔng kpaf anɔng na Anet-Isheshek, da a sok ice wu ni iratek ifi i sot agbat àware awo. Awɛt Adakunom kin fɛ̀ ni wu, “Atut! Ngɔn yet Arim hom, imi mi sot Ada ngɔn.”

⁶A tɛ fɛ̀ narɔ kakak ye, “Ngɔn yet àware gbakgbak, ni irèn fɛ́ aMelkizedek kin di se.”

⁷Ni izen fɛ́ aYeso se ni kusot azatse, a ra awon ni irisim, na tos kanak na nayisi, na ta kutɔ gbɛrɛy sak na ayɔng fɛ́ a da kyem na ku sheshek ni iku. Adakunom ma fok kanak wu, nek iwu foos ifɛ̀ wu.

⁸Ngma ne anɔng, iwu yet Arim Adakunom, a mɛɛs ifoos ifɛ̀ ni izot yɔng fɛ́ a sɔ.

⁹Ni izen fɛ́ ba mi ku shining gyat, a sot itis isheshek vit nkum sak ngma na bayɔng fɛ́ ba foos ifɛ̀ wu.

¹⁰Adakunom ku te a sot Agbat-agbat àware ni irèn fɛ́ aMelkizedek kin di se.

¹¹In bɛ̀ yit nkyɔrɔk dot fi in shim in ki tak yin, awɛt i ki se yit gbang ni in ki tonong yin, nek i se yin kpɛt-kpɛt ni mɛɛs ni irēn.

¹²Atsak e yet, ki iyin mi kyem isot yin bafi itees bakak yɔkɔnɔng, awɛt i ni rēn resek yin itsɛt ba tɛ ba ki tees yin naban nkyɔrɔk ifɛ̀ katsak Adakunom nfi imɛsɛng e kong bà. Ke naban nnon, itsɛt yin ingasa nabasang kyɛk, da kuyak kukpakarak e awo.

¹³Ngma ayɔng fɛ́ a rēn sot na nabasang kyɛk, a rēn resek kaban nggon, a da kyem a rēn kusot kutek ni kuduk e awo.

¹⁴Awɛt kuyak kukpakarak e yet kufɛ́ banet bako. Bayɔng fɛ́ kaakyi izen ba tabak ace bá, na ba kyem ba kaba ikyɛng itek ni iduk e.