Read icen BaYahuda 6 Bible Online

BaYahuda 6 - icen bible

BaYahuda 6

¹Nek anɔng, won ni in ya yit kashon naton itees yeng ifi imɛsɛng e fi in ma shan yit azaton Anet-Isheshek, nɔng in bin sot yit ni irēn ifɛ́ banet bako. Da in da ti in bun yit ni itis itees naton iwosong anɛn sak itirik na Adakunom kyɛk awo, ni ifi inɔɔk atsak sak na Adakunom kyɛk bà awo,

²ni ifɛ́ ira abatisma, ni isaas mbɔk naton ace banet, ni ifɛ́ idoro bafaben, ni itsɛɛt ishɔt igang azatse.

³Won nin in ya yit kashon! A yet ikyɛng dɔng fi in da ra yit yɔng, Ke Adakunom shim.

⁴I da se gbang na ba tɛ ba tɛ tirik bayɔng fɛ́ ba mi barak inɔɔk atsak bá, na ba tɛ ba ka ba tirik sak ni ishan atsak. A yet iba me yɔng fɛ́ ba man se ayɛt mgbey Adakunom, ba mi bamang nta nnang kuri nfɛ́ azanɛn, ba mi sɛ kanu kafuba ayɛt Kabik aJɛrɛ,

⁵bayɔng fɛ́ ba mi tɛ ba bamang kusas Ifɛ̀ Adakunom, ni i sɛ ice irēn izen fi i bi bɛ́,

⁶Ngma ne anɔng, bayɔng fɛ́ ba mi barak ishan atsak bá, itonong ba da kyem ba tɛ ba bun ni ba sak ni ishan atsak e kong bà awo. Nek anɔng, ba tsin tɛ ba tekak Arim Adakunom, itekak ifɛ́ afaa. Ba tsin ku tes nsum ni idɛt yɔng bà.

⁷Won in sok yit ane; Adakunom tes awɛng wu sak ni mben yɔng fi in saas ashi iza fi i irɔsɔp kaakyi izen, ni ikorok ica nayak natek fi in se yɛɛt sak na atek ikap e.

⁸Awɛt mben e yɔng fi in tang itsitsan ni kutsi, ikyi ikak itek ta ice ni na awo. In se na wey, kawɛy Adakunom. Ni igang e, ba bi di te kurong ni ina kyɛk.

⁹Ábaruneng, ki in tsin cɛɛt yit anɔng, in rēn yit tsɛngtsɛng i bɛ̀ yin awɛng ni nkyɔrɔk fi in waat ni kusas. Iyɔng fi in tonong irèn isheshek yin.

¹⁰Adakunom yet afi mbɔɔs awo. A da te burum ni ntomong fi iras yin awo, ni ishim fi i bɛ̀ yin sak ni wu, iyɔng fi i di sɛs yin mo bafi ikuus, ya yin kashon ne anɔng e.

¹¹In shim yit kaangan yin na te nyɛk anɔng sak ni igang e, nɔng i da bi sɛ yin nkyɔrɔk yɔng fi i mi tsang di te yin iyɛ ni ina.

¹²Da in shim yit ni i sot yin bafɛ́ arut awo, tit ni mɛɛs yin na bayɔng fɛ́ ba mi tsang shan atsak, ni kusot akabɔk, Adakunom ma ka ba nɔk iya itekari fɛ́ a tsang shiwu a da ka ba nɔk.

¹³Izen fɛ́ Adakunom nye kushi wu sak ne aIbrahim, a nye kushi me ni iyerek wu, nek vit anet fɛ́ a ku naat ni iratek fɛ́ a di ki nye kushi me ni wu.

¹⁴A fɛ̀, “Na tsak e, In da ka te mo awɛng, in da fuush izit ngɔn makiyi.”

¹⁵Ama fi aIbrahim mi tot na akabɔk, a da nɛ shan kushi me fɛ́ Adakunom mi tsang ku nye ne.

¹⁶Banet nyes kushi ni iyerek anet fɛ́ a ka ba naat ni iratek, ni nkyɔrɔk fi in se ayɛt kushi me sot atutup ifɛ̀, ni ti bɛ́ ni nkum ikaba kaakyɛ kuri nanan.

¹⁷Na anɔng bà, Adakunom shim a tonong bayɔng fɛ́ ba shan kushi wu me wɛshɛk fok, atsak atsitsak, kuyiring wu bi ishesheng awo, nek anɔng, a di barang ni kushi.

¹⁸Adakunom nye anɔng, nɔng nek nkyɔrɔk nfaa fɛ́ da ba kyem ba shesheng ina awo. Jɛm-jɛm Adakunom da kyem a ra mbɔɔs awo. Iyit ba bang fi in mi sɛ yit ihwyet ni wu, anɔng e ki nɔk yit igbingding fi in di ki bereng yit ite iyɛ yit gak, fɛ́ a mi sak iye ashon yit.

¹⁹In bɛ̀ yit ite iyɛ fi i se ti igɔk agap fi ibereng kutset yit gak, nɔng in bin di sot yit ni iyɛ ting. Ite iyɛ me ye fi i ki tsaas yit ni in got yit kutaà sak ayɛt kayɛt itu iya Adakunom ntong kufɛ́ azanɛn.[3]

²⁰AYeso mi teng tse a nɔ aza yit, a nɔ azɔng e ashon yit. Azɔng e me fɛ́ a di sot Agbat-agbat àware afɛ́ ayɛ vit nkum e, ni irèn fɛ́ aMelkizedek kin di se.