Read icen BaYahuda 8 Bible Online

BaYahuda 8 - icen bible

BaYahuda 8

¹Ngma itin ikyɛng fi in tsin di cɛɛt yit deng yet; In bɛ̀ yit Agbat àware ayɔng fɛ́ a se ni isonong ni bɔk iyak ni kuta igwɔm Azɔk azanɛn.

²Ayɔng fɛ́ a ra kutomong wu ayɛt Kutɔmɔng Iya Adakunom Ntong, na atsak kutɔmɔng fɛ́ aTisa ni ice wu a nok, da anet awe awo.

³Kaakye agbat àware, ba ku te mok inasap nnang ngma nɛ ashosh. I se gbing-gbing Agbat àware yit na a bɛ̀ ikyɛng fɛ́ a da nabak ide bà.

⁴Ki iwu kin yet afɛ́ kazatse kang, ke a kin yet àware ngma ni ngane awo, nek banet tsang di se fi ntsi aMusa ka ba te mo ni inasap nnang e.

⁵Kutomong fɛ́ áware me ras ayɛt itu iya Adakunom ntong e, kuyɔng fi ku yet nawu ikyɛng fi i se azanɛn. I se kpaf ni ikyɛng fi ite ne aMusa, ni izen fɛ́ a shim a nok kutɔmɔng e, Adakunom fɛ̀ ni wu ye, “Rēn tsɛngtsɛng fok, i da nok kaakyi ikyɛng kpaf ti kuyɔng fɛ́ ba kin da tonong nawu me, ni izen fi ngɔn se naton ihwyanang e.”

⁶Awɛt yɔkɔnɔng, ba mi nɔɔk aYeso kutomong iware fi kuwaat kufuba, nek iwu se nate irosom kushii Adakunom nɛ banet wu, fi kuwaat kuzen e. Kushii kunang e waat ni kusas, nek ba ta iko naton nkyɔrɔk ntek.

⁷Nek ki i fi yet fok, kushii kufi imɛsɛng e kin se vit inye, ke ba tɛ ba te kukak kufɛ́ afaa awo.

⁸Awɛt Adakunom kin sɛ banet e ni kurat, nek anɔng, a di fɛ̀, “ATisa fɛ̀, izen bi bɛ́, fi in bi rosom kushii kufas ne banet aIsrela ne banet aYahuda.

⁹I bi se ti irosom kushii fi in ki nye ne badakop bá awo. Ni izen yɔng fi in kin ka ba sok ni bɔk in ka ba tun ni mben aMasat, nek da ba bereng irosom kushii hom na katsak awo. In ma ka ba tirik kama, aTisa tak anɔng.

¹⁰Irosom kushii me kang fi in da nye ne banet aIsrela. In bi te ifɛ́ hom ni kuyiring bá ni in tin jɛk ide na ayɛ bá ama izen e yɔng, aTisa tak anɔng. In da sot Adakunom bá, ni iba sot banet hom.

¹¹Da ma akak tɛ tees afidang isot wu awo, kɛ anet na tees arunyining ye, ‘Rēn aTisa me.’ Nek ba bi di rēn ngma ba, i bi tumung e na a wosong bá sak na akoo bá.

¹²Nek in bi ka ba fuut anyas bá in bi tin yiring na anɛn bá kong awo.”

¹³Ni izen fɛ́ ba yes irosom kushii ku kang “kufas” Iwu mi sak kufi imɛsɛng e kusot kuzen. Ngma ikyɛng fɛ́ ba mi yes ide izén, i sot i mi kop, idɔng i mi bɛ́ bakat iwey.