Read icen BaYahuda 9 Bible Online

BaYahuda 9 - icen bible

BaYahuda 9

¹Irosom kushii kufi imɛsɛng e bi ntsi irèn iya ntong, ni Kutɔmɔng Iya Adakunom Ntong kufɛ́ azatse bà.

²Ba kin nok kutɔmɔng e, na kayɛt kafi imɛsɛng e, ba yes ika Karɔ aJɛrɛ. Ayɛt ka, ba di sak ikyɛng isaas agaramun, nɛ atebul fɛ́ ba di saas akpam fɛ́ ba tun zɛɛt nek Adakunom.

³Ama kupɛt ikpin itɛnɛng kutu ayɛɛt e kufɛ́ afaa, ba yes iko Karɔ aJɛrɛ ka fɛ́ Jɛrɛ.

⁴Na yɛɛt ko, ba sak kuta ashosh, ashosh nkɔn ntek, nɛ akwɔti irosom kushii. Ngma nkyɔrɔk nfaa nang, ba nye ina ni kutsɔm kuseng. Ayɛt akwɔti irosom kushii me yong, a bi itsɛn fɛ́ ba nye ni kuta kuseng nɛ amanna ayɛɛt e, ni ishɛn aHaruna fi iturup atap, nɛ áfak ata afaa afi irosom kushii.

⁵Naton akwɔti me yong, akerubim afi ízɔk Adakunom te gip ibo me fi iyet kuta igwɔm angmishish. Awɛt yɔkɔnɔng, in da kyem in cɛɛt yit nyɛk-nyɛk azaton nkyɔrɔk nang awo.

⁶Izen fɛ́ ba mi nye nkyɔrɔk nang anɔng, áware me nɔɔs iras ntomong bá na kayɛt itu imɛsɛng e, kaakyi kunom.

⁷Awɛt agbat-agbat àware wu aziwu kyɛk fɛ́ a nɔ ayɛt kayɛt itu kufɛ́ afaa me ite kazining kaakyi iyɛ. A nɔ azɔng awo, ma na nasok fɛ́ a da nabak nek inɛn ice wu, nɛ nek anɛn fɛ́ banet mi ras dang irēn bá.

⁸Ne anɔng, Kabik aJɛrɛ tonong fok irèn inɔ sak na Karɔ aJɛrɛ ka fɛ́ aJɛrɛ, mi tarak ninyɛn awo, ki izen fi Kutɔmɔng Iya Adakunom Ntong imɛsɛng e tsin rēn resek mo tsìk ni inyeseng.

⁹Ikyɛng ideng se tɛ nawu kuzam ayɔkɔnɔng, fi itonong fok, nnang nɛ ashosh fɛ́ ba man na ba nesek ina, da i kyem ni i karak kuyiring iyɛ anet yɔng fɛ́ a ya Adakunom ntong e awo.

¹⁰Nkyɔrɔk nang e se naton iyak, ni isɔ, ni ndiri-ndiri amok ikus afi nggɔn banet. Nkyɔrɔk e nang ngma in yet nfi irɔm kyɛk, fɛ́ ba di ras kutomong ni ina ninyen, tit izen inye nkyɔrɔk ni irèn ifas bɛ́.

¹¹Izen fɛ́ Anet-Isheshek bɛ́ tɛ Abgat-àware afi nkyɔrɔk ntek fi in se yɔkɔnɔng azeng. A nɔ ayɛt kutɔmɔng iya ntong fi ku wat ni iratek nɛ kusas gyat makiyi, fɛ́ da ku yet inye ni mbɔk anet awe awo. Idɔng e ti itonong fok, ku yet ikyɛng fɛ́ ba nye ni nkyɔrɔk azatse nang awo.

¹²Izen fɛ́ Anet-Isheshek kin nɔ ayɛt itu Karɔ aJɛrɛ ka fɛ́ aJɛrɛ me, a nɔ ite kazining pɛɛt. Da a nɔ na nasok ibón kɛ naban amúng awo, tit na nasok wu, na yɔng fɛ́ na sak in di sɛ yit ibisik ifi iyɛ vit nkum.

¹³Nasok ibón nɛ amúng ni intongkan kabi ishép inyak fɛ́ ba fim ina na bayɔng fɛ́ ba se gbiridik, nek i te cɛl nrɔm bá, kpaf ti nggɔn bá di se.

¹⁴Na anɛ fɛ́ ba da moon nasok aKristi? Iwu fɛ́ ayɛt kabik fɛ́ ka se vit nkum, a nabak ice wu vit inɛn sak na Adakunom, a di yɛs kuyiring yit ni nyes nkyɔrɔk fi in bes ni iku, nɔng in di ki ya yit Adakunom atset ntong.

¹⁵Nek anɔng, Anet-Isheshek wu a yet anet a te afi irosom kushii kufas e, nɔng bayɔng fɛ́ ba ka ba yes, da shan kushii iya itekari fi i se vit nkum. Ana ke yɔkɔnɔng fɛ́ a mi iku, a sot itarang fi i ka ba bisik, ba sot washak ne na anɛn fɛ́ ba mi tsang ra ni izen irosom kushii imɛsɛng e me.

¹⁶Azaton ifɛ̀ kushii inɔɔk iya itekari, i se gbing-gbing na ba tonong fok, anet fɛ́ a nye kushii me kang mi iku ninyɛn.

¹⁷Nek kushii inɔɔk iya itekari kpa kutomong ko ke anet inɔɔk e mi ku, awɛt ba da kyem ba ra kutomong ni iko awo, ke anet e rēn resek mo ni kutset.

¹⁸Ikyɛng e dɔng fi i sak irosom kushii imɛsɛng e di sɛ ku ya ngma ni in gaan e, dang nasok awo.

¹⁹Ama fɛ́ aMusa kin taas banet ngma kusum kaakyi agbat-ifɛ̀ fi i se ni ijɛk ntsi, a sok nasok ishép inyak nɛ na fi ibón, a kyere na ashi. A ma sok kadus ahisop nɛ awulu asɛng, a di fim nasok e naton kufumung ijɛk ntsi me nɛ naton banet ngma.

²⁰A da nɛ a fɛ̀, “Nasok nang yet na fi irosom kushii me, fɛ́ Adakunom te ni ibereng yin agbat ifɛ̀ me.”

²¹Kpaf anɔng, aMusa kin fim nasok e naton kutɔmɔng nɛ na akaakyi ikyɛng fɛ́ ba di ra kutomong ni ina ni itu iya Adakunom ntong e.

²²Na atsak e, Ntsi me fɛ̀ i se gbing-gbing na ba kusu bakat kaakyi ikyɛng ni irèn ifim nasok. Nek ke vit inosong nasok, i sot vit ifuut anɛn yɔng.

²³I sot gbing-gbing na ba kusu cɛ́l nkyɔrɔk nang na fɛ́ azatse fi in yet nawu nkyɔrɔk azanɛn. Awɛt ashosh nkyɔrɔk azanɛn iwaat se yɛɛt aza ifi imɛsɛng e.

²⁴Nek da Anet-Isheshek kin nɔ karɔ ajɛrɛ fɛ́ banet nye ni mbɔk awo, fi ka kin yet nawu atsak e kyɛk. A yet kazanɛn ka fɛ́ a kin di nɔ, yɔkɔnɔng ana, a se ashon Adakunom akuce yit.

²⁵Da Anet-Isheshek nɔ azanɛn nɔng a da bin tobok inasap ice wu, tɛ agbat àware me fɛ́ a mi di mɛɛ na nɔɔs na Karɔ aJɛrɛ kafɛ́ aJɛrɛ kaakyi iyɛ, na nasok fɛ́ da na yet nafuu awo.

²⁶Nek ke Anet-Isheshek yɔng a sot ni isɔ izot ni izen dot, neme ni inye azatse. Awɛt yɔkɔnɔng, na ayɛ igang e nang, a mi tonong ice wu ite kazining pɛɛt, nɔng a da bin di tun anɛn ni irèn inabak-akuce fɛ́ a nɔɔk ice wu.

²⁷Kyɔn ti fi i di se, ba te fok anet awe da ku kazining pɛɛt, ama anɔng, na tot ishɔt Adakunom.

²⁸I se anɔng bà, ba kin nabak Anet-Isheshek tɛ inabak-akuce sɔk kazining pɛɛt nek a di sok anɛn banet dot. A bi tɛ bɛ́, ibɛ́ ifɛ́ afaa, da nek i sok anɛn kong awo, tit na bɛ́ ni isheshek sak na bayɔng fɛ́ ba se ni itot wu.