Read icen AYakubu 1 Bible Online

AYakubu 1 - icen bible

AYakubu 1

¹Kufumung kang ne ni bɔk aYakubu, asam Adakunom ne asam aTisa aYeso Kristi. Imi tsin jɛk iko sak ni icɛn kusɔk abe afaa bafi izɔrɔk baYahuda[1], yɔng fɛ́ ba se sharatat ni mben zizɛɛt. Show yin!

²Ábaruneng, nye yin iyɛ ikan, ngma izen fi i nyim yin ne kaakyi kuri imara,

³nek iyin rēn yin fok imara inɔɔk atsak yin, bang saas akabɔk yin rasak,

⁴nek anɔng, wosong yin akabɔk yin na a ya kashon nɔng i da sot yin gbagba, nɔng i da shining yin na kaakye abak vit ikyɛng fi ibit yin.

⁵Ke akak ayɛt yin bit kutsitsɛng kutsik, won na a ra awon na Adakunom nɔng a da ku nɔk. Nek Adakunom nesek kaangan ikyɛng fɛ́ a ra awon ni wu dang tsɛsɛk inɛn, a da ku nɔɔk.

⁶Awɛt izen fɛ́ anet tsin tsɛt ikyɛng, won na a nɔɔk atsak vit inye digit, nek ngma ayɔng fɛ́ a nye digit, a se tɛ kudúng ashi, fi kuwun fesem aze na aza.

⁷Anet tɛ ayɔng bi di tɛ a da kyem a sɛ ikikak ni bɔk aTisa awo;

⁸ayet anet fɛ́ a bɛ kuyiring asa afaa, a kyem a nyeseng ni ikyɛng izining awo.

⁹Won aruneng fɛ́ a yet akan, na a tsot kugwɔm nek Adakunom mi ku nɔk iratek.

¹⁰Won arum ba na tsot kugwɔm fok Adakunom mi tun ito ice ni wu, nek iwu tsin gosok tɛ agam.

¹¹Nek kunom ya gbɛrɛy, ku wat kakoot agam e, ne ato me kpas, ni kusas e wat ku gang. Kpaf anɔng fɛ́ arum bi ka na gang ayit kutsɛt wu.

¹²Adakunom da te awɛng na anet fɛ́ a te gbinding ni izen imara, nek ama fɛ́ a ya awɛng naton imara me, a da se izang kutset vit igang fɛ́ Adakunom kin fɛ̀ a bi nɔɔk bayɔng fɛ́ ba kushim.

¹³Ngma ayɔng fi imara ku bɛ́, anet e bi fɛ̀ ye, “Adakunom di ki mara awo.” Nek Adakunom nye akak anyas, ke na mara akak awo.

¹⁴Kaangan ses imara, nek ikɔk kuyiring wu, ni ku ku kɔk ma ku ku sak a ra iduk ikyɛng.

¹⁵Ama fi ikɔk e mi shining, ni i ma tes inɛn. Ama fi inɛn e mi rasak, ni i ma bɛ́ ni iku.

¹⁶Ábaruneng, ba bi ki bɔrɔk yin awo.

¹⁷Kaakyi kunang kutek ni kugyat, ku nes azanɛn, ku nes narɔ Ada fɛ́ a nye mgbey, ayɔng fɛ́ da a shesheng nse tɛ nawu fɛ́ na serese awo.

¹⁸A ki nɔɔk yit kutset nek inɔɔk atsak yit ni ifɛ̀ wu, a sak in sot yit bafi imɛsɛng, ayɛt nzam nkyɔrɔk fi iwu nye.

¹⁹Ábaruneng fi in ka ba shim makiyi, wes yin ato ni ikyɛng deng: Kaangan na a sot afi ifoos ziri ziri, a bi sot afi cɛɛt ni ibeseng iyɛ ziri ziri awo,

²⁰nek ibeseng iyɛ anet awe bes ni kusot kutek fɛ́ Adakunom shim awo.

²¹Nek anɔng, won yin iras nggɔn imaan e, ne kaakyi kuri ntomong anyas. Ayɛt kameneng iyɛ, shan yin ifɛ̀ fɛ́ ba mi tuus ayɛt in, fi i da kyem i ki sheshek yin.

²²Da i bi wɔrɔk yin ace yin awo, ni foos yin ifɛ̀ Adakunom kyɛk awo, ikyɛng ira yet, sot yin bafi ira me.

²³Nek ngma ayɔng fɛ́ a foos ifɛ̀ me kyɛk vit inye me, a se kpaf tɛ anet fɛ́ a yɛrɛ ice wu na amadubi,

²⁴ama fɛ́ a gang iyere me, na tseng, na ma te burum nse ayisi wu.

²⁵Awɛt ngma anet fɛ́ a nɔɔk nhwyɛ wu ni imɛɛs ntsi ntek, ntsi ntek fi in bes ni ibisik, ne ya kashon i nye nɔng, da a sot anet ifoos e kyɛk na nye burum awo, kɛ a sot afi i inyes e, ba da ku te itek naton ngma ikyɛng fɛ́ a se ni ira me.

²⁶Ngma anet fɛ́ a di fok iwu se ni kusot fɛ́ Adakunom shim, awɛt da a kyem ayit kanu wu awo, a tsin wɔrɔk ice wu kyɛk, irēn ikuus Adakunom wu yet ifɛ́ abap.

²⁷Kuri ikuus fɛ́ Ada Adakunom shan yet iyɔng fi i se vit karìk, ke ikyɛng icɛɛt ayi, iyɔng fɛ́ ba di gbingding bakumung nɛ nakpin ayɛt izot na, ni iyisik kurɔm vit imoon ice ayɛt ikyɛng fi i da ki beseng yit azatse kang.