Read icen AYakubu 3 Bible Online

AYakubu 3 - icen bible

AYakubu 3

¹Ábaruneng, banet dot ayɛt yin bi sot bafi itees awo, nek iyin rēn yin, iyit bayɔng fi in tees yit bakak, ba bi ki ra yit ishɔt fi iwat ifi nshɛrɛp banet.

²Nek ngma yit in yet yit bafi irat. Ke akak di se fɛ́ da a rasak ni icɛɛt awo, anet yɔng mi se kushining, a da kyem a bereng kurɔm wu ngma kusum.

³In tes yit itsaap iguk nanu ye, nɔng i da ki fok yit, nɔng in di ki tiri yit iye sak narɔ fi in shim yit.

⁴Di yin ányin akyɛ-ashi, ngma ni kurasak na, ni kuri awun fɛ́ yirik ina, ngma na anɔng anet ikɔk e tiri iko ni kabi ishɛn sak narɔ fi iwu shim ku di tseng.

⁵I se anɔng, ilem yet ikyɛng ibaane ayɛt nkap irɔm anet awe, ngma na anɔng i bɛ̀ ito ice makiyi. Di yin kica irong, ka ya kayit burang.

⁶Ilem yet kurong ice de, kazatse iduk e ayɛt nkap irɔm ngma, ilem de imak yet iduk e. Ibeseng anet awe kusum, ilem e de ibeseng nse ni nggɔn anet ni kurong, na ba sak ide naton kurong ari irong.

⁷Ngma nzam-nzam nkye awum, ne nanon aton aza, ni nkyɔrɔk fi in ngu aben, ni ìzos ayɛt ashi, ba kyem ba yɛbɛk ina, anet awe kyem a yɛbɛk ina,

⁸awɛt vit anet fɛ́ a mang kyem a yɛbɛk ilem wu. Ilem yet aduk ikyɛng fi da irɔɔn awo, ama anɔng, i bɛ̀ nadɔm fɛ́ i da kyem isok kutset.

⁹Ni ilem fi in di tere yit aTisa ne Ada yit, ni ide me fi in ti in di tosong yit banet fɛ́ Adakunom nye nabik wu.

¹⁰Kanu kazining ka fɛ́ ka turung itere ni tok. Ábaruneng, i se kpaf anɔng awo.

¹¹Ibong icɛbɛt izining, kyem i nesek ashi atek na ashi ntɔk ɛ?

¹²Ábaruneng, kakon atafo kyem ka tes ica ifat ɛ? Ke kakon anap tes ica atafo ɛ? Ba da kyem ba sɛ ashi ntɔk ni bong ashi atek awo.

¹³Angan ayɛt yin fɛ́ a bɛ̀ kutsitsɛng ni irēn ɛ? Won na a tonong ayɛt nggɔn ntek fɛ́ a bɛ̀, na ba di kuri ntomong nggɔn kuhwyɛ fi ku ses ni kutsitsɛng e.

¹⁴Awɛt ke aduk naman ni ishim ice ye fi i se ayɛt ayɛ yin, won yin itsot agwɔm ni nyɔ yin atsak.

¹⁵Kuri kutsitsɛng kuyɔng nes narɔ Adakunom awo tit kufe azatse, ku yet kufe kabik Adakunom awo, ku yet kufe aShetan.

¹⁶Nek karɔ fi imak ni ishim ice di se, i se gbing-gbing na ba sɛ idoro kuhwyɛ ni ntomong anyas azɔng.

¹⁷Awɛt kutsitsɛng fi ku nes narɔ Adakunom, ni imɛsɛng e, ku se jɛrɛ, ama anɔng, ku bes ni kusot kukyang, ku bɛ̀ nhwyɛ, ku bɛ̀ ice ikyang, na angmishish, ku ras ntomong ntek. Vit iko ni ikasa bakak tit atsak.

¹⁸Banet fɛ́ ba bɛ̀ kusot kukyang, na ba tees bakak kusot kukyang, ba da se izang kutomong kutek ba.