Read icen 1 ABitrus 1 Bible Online

1 ABitrus 1 - icen bible

1 ABitrus 1

¹Kufumung kang ne ni imi aBitrus, atom aYeso Kristi. Sak na bayɔng fɛ́ Adakunom kasa, fɛ́ ba yet batsen azatse kang, fɛ́ ba se sharatat ni mben aPɔntus, na aGalati, na aKapadokiya, na Asiya, nɛ aBitiniya[1],

²bayɔng fɛ́ ayɛt irēn gyam Ada Adakunom a ka ba kasa ni irèn ikanang fɛ́ Kabik, nek ifok ifɛ̀ ba na aYeso Kristi ni iwaat nasok wu: Won itek ni kusot kukyang ni ku se ni yin sherek.

³Won itere ni i sot ifɛ́ Adakunom, Ada aTisa yit aYeso Kristi! Nek kudot angmishish wu a mi ki nɔɔk yit kutset kufas ni ite iyɛ makiyi fi i ne ayɛt idorok ifaben aYeso Kristi ni irɛk,

⁴sak ni isɛ iya itekari fɛ́ ba ki sak yin ne azanɛn, fi ise cɛ́l, vit ibeseng, fi da in bush awo,

⁵fɛ́ ba mi ki nyiit yit ayɛt abik nɛ agap Adakunom, sak ma kubɛ́ isheshek yit fi i bi bɛ́ atuk igang e.

⁶Fi i sak i di nye yin iyɛ ikan, ngma ni nzam-nzam mgbang fi ki sot gbing ni i sɔ yin yɔkɔnɔng nfi kizen gyet.

⁷Ikyɛng e tsin te anɔng, nɔng ba di ki mara inɔɔk atsak yin fi i wat atsɔm-aseng ni kusas, ina fɛ́ a nye kpedek ngma ni ikanang ina fɛ́ ba nye ni kurong. Anɔng e da sak ba di rēn atitup inɔɔk atsak yin fi i bi ki bɛ yin ni itere, ni ízɔk, ni iratek ni izen fɛ́ aYeso Kristi bi bɛ́ wu.

⁸Ngma ne fi imang ku di yin awo, i kushim yin; ngma na fi i tsin ku yere yin yɔkɔnɔng awo, i di nɔɔk yin atsak ni wu, ibɛ yin ifeng fi i wat agap icɛɛt,

⁹nek i tsin sɛs yin izang inɔɔk atsak yin, isheshek kutset yin.

¹⁰Naton isheshek e yeng fɛ́ batan kin tsɛt tsik ayɛt nhwyɛ, ba ma tak ibes itek Adakunom fi i da bɛ́ ni yin.

¹¹Kabik Anet-Isheshek ayɛt ayɛ bá kin tsang ka ba tak fok, Anet-Isheshek me da sɔ izot ninyɛn, a da ma sɛ iratek. Nek anɔng, ba shim ba rēn izen ni irén fi ikyɛng e bi te.

¹²Ba kin ka ba tonong ide fok, da ba kin se kutomong ice bà awo, tit iyin ba. Ni izen fɛ́ ba kin cɛɛt naton nkyɔrɔk nang fɛ́ bayɔng fɛ́ ba kin ki shara yin ifɛ̀ itek ni irèn Kabik aJɛrɛ fɛ́ ka ne azanɛn. Batomaza ice bà kin tsɛt ku di nkyɔrɔk e nang.

¹³Nek anɔng, ka na nye yin nek kutomong, tekap yin ace yin; te yin iyɛ nek isɛ yin itek fɛ́ ba bi ki nɔɔk yin ni izen ibɛ aYeso Kristi.

¹⁴Ti nnon fɛ́ na foos ifɛ̀, i bi ti inɔ yin ni amaan ikɔk irɔm fi i tsang bɛ̀ yin ni izen fi i se yin ni idun awo,

¹⁵tit tɛ ayɔng fɛ́ a ki yes yin di se jɛrɛ, won iyin ace yin ni i sot yin jɛrɛ na akaakyi fi i da nye yin.

¹⁶Nek i se ni ijɛk ye, “Sot yin jɛrɛ, nek imi se jɛrɛ.”

¹⁷Ayet fok iyin yes Ada fɛ́ a ras ishɔt kutomong akaakyɛ anet vit ishim ice, nye yin kusot yin tɛ batsen azeng ayɛt nnyim Adakunom.

¹⁸Nek iyin rēn yin fok da ni nkyɔrɔk fi in nye kpedek tɛ atsɔm-aseng wu fɛ́ ba kin ki shan yin mo awo, ayɛt irèn kusot ibeseng fɛ́ badakop yin kin ki nabak yin ne awo,

¹⁹tit na nasok natek nafɛ́ aKristi, kitsamang fɛ́ ka se vit karìk ke ibeseng ayi.

²⁰Ba kin ku myak neme dang na ba tumung kazatse, awɛt ba nɛ ba ku tonong ni nnom igang e nang mok iyin.

²¹Ni wu fi iyin di nɔɔk yin atsak na Adakunom, fɛ́ a ku donong ni irɛk, a ku nɔɔk iratek, nek anɔng atsak yin ni ite iyɛ yin se ne Adakunom.

²²Yɔkɔnɔng fi i mi kanang yin ace yin, nek ifok ifɛ̀ na atsak, fi i sak ibɛ yin atitup ishim sak na bafidang, tonoso yin bafidang ishim itsik fi ines ayɛt ayɛ yin.

²³Nek ba mi tɛ ba ki tes yin, da ni ica fi i mi ku awo, tit ni ifɛ̀ Adakunom itsɛt, fi i di nak.

²⁴Nek, “Ngma banet se tɛ agam, iratek bá gaas tɛ ashoy agam ayit. Agam e koot nɛ ashoy e kpas,

²⁵awɛt ifɛ̀ Adakunom da nak ayɛ nɛ ayɛ.” Ifɛ̀ me deng, fɛ́ ba kin ki shara yin e.