Read icen 1 ABitrus 2 Bible Online

1 ABitrus 2 - icen bible

1 ABitrus 2

¹Nek anɔng, sak yin ace yin yik-yik na kaakyɛ kuri imaan e, ni mbɔɔs, ni kutomong ayisi, ni ifup, ni itok.

²Ti nnon nafas fɛ́ ba tes, tsɛsɛk yin nabasang abik natek fɛ́ na da sak isheshek yin ni i rasak,

³yɔkɔnɔng fi i mi bamang yin fok aTisa yet atek.

⁴Bɛ́ yin sak ni wu, iwu fɛ́ a yet kuta kutset, kuyɔng fɛ́ banet raba iko awɛt iko fɛ́ Adakunom myak, fi ku dung sas ashon wu,

⁵iyin tɛ ata atset e bà, ba tsin ki nok yin tɛ kari abik, nɔng i da ra yin ntomong tɛ baware, i da nesek yin kunang abik fɛ́ Adakunom shim ni irèn aYeso Kristi.

⁶Nek i se ni ijɛk ni Kufumung aJɛrɛ ye, “Di, in mi te kuta na aSihiyona, kuta fɛ́ ba myak, kuta itsok itu kutek, Ngma ayɔng fɛ́ a di te iyɛ ni wu, a da sɔ nsum awo.”

⁷Ni iyin fi i nɔɔk atsak fok, kutá me kang yet kutek. Awɛt sak na bayɔng fɛ́ ba raba inɔɔk atsak, “Kutá fɛ́ bafi inok raba iko, ku mi sot kuta fi ku dung sas.”

⁸I ti se ni jɛk fok, bayɔng fɛ́ ba raba inɔɔk atsak, “Kutá fi ku saas banet di tu atak, kutá fi ku ka ba tes ikpas.” Bayɔng fɛ́ ba raba me, ba nye kambush. Anɔng e wu ba mi sak nek iba.

⁹Awɛt iyin yet yin banet fɛ́ ba mi kasa, bafɛ́ ari baware, banet ajɛrɛ, banet fɛ́ ba yet bafɛ́ Adakunom, nɔng i da taas yin itere ayɔng fɛ́ a ki tun yin ni nhwyi sak ni mgbey abes.

¹⁰Iyin kin tsang yet yin banet awo, yɔkɔnɔng i yet yin banet, i kin se yin vit isɛ angmishish awɛt yɔkɔnɔng i mi sɛ yin angmishish.

¹¹Bafidang yin, in shim in fɛ̀ ni yin fok, tɛ batsen nɛ bafɛ́ amatse azeng azatse, teng yin imaan ikɔk, fi i se ni itsom ni kutset yin.

¹²Nye yin kusot kutek nate bafi nhwyi nɔng, ngma ni ncɛɛt fɛ́ ba nye fok iras yin inɛn, ba da di ntomong ntek yin ne ba di nɔɔk Adakunom iratek ni izen i bɛ́ wu.

¹³Nabak yin ace yin nek aTisa na akaakyi igwɔm fi ba te ide nate banet: ke na bágwɔm, nɛ agbat agwɔm,

¹⁴ke sak na bagwɔmna, nek agbat agwɔm ka ba yirik nek itabak bafi inɛn nɛ ba tere bayɔng fɛ́ ba ras itek.

¹⁵Nek i yet kushim Adakunom fok ayɛt kusot kutek yin, i da fam yin na nu bayɔng fɛ́ ba cɛɛt ni idun.

¹⁶Nye yin kusot tɛ banet fɛ́ ba se washak, awɛt kusot iwashak yin bi ni ku sot ikyɛng ifamasa anyas awo; nye yin kusot tɛ basam Adakunom.

¹⁷Nɔɔk yin akaangan iratek wu gyat; Tonoso yin ishim sak na bafidin bafi ikuus, foos yin nnyim Adakunom, nesek yin aGbat agwɔm iratek.

¹⁸Basam, nabak yin ace yin sak na batek ari yin, ni iratek ayɛt akaakyɛ, da sak na bayɔng fɛ́ ba bɛ̀ nggɔn ntek ni nhwyɛ kyɛk awo, tit ngma ne bafi iyɛ ife.

¹⁹Nek i se gyat ke anet te gbinding ayɛt mgbang naton inɛn fi da iwu ra awo, a sɔ mgbang e nek kuyiring fɛ́ a bɛ na Adakunom.

²⁰Awɛt na anɛ fi ngɔn da sɛ izang ki ngɔn sɔ itsot nek inɛn ni igbingding fi i nye yɛ? Awɛt ki ngɔn sɔ mgbang, i gbinding nek i nye ikyɛng itek, anɔng se gyat ashon Adakunom.

²¹Nek anɔng wu fɛ́ ba da yes, nek Anet-Isheshek sɔ mgbang nek iyin, a ki won yin mo ikyɛng imɛɛs, nɔng i da kuus yin ane wu.

²²“A kin ra inɛn awo, ba kin sɛ mbɔɔs na nu wu awo.”

²³Ni izen fɛ́ ba kin di korok itok ni wu, a ka ba bun ni itok awo; ni izen fɛ́ a kin sɔ mgbang, da a fɛ̀ a da ka ba bun ne awo. Tit, a te iyɛ wu na ayɔng fɛ́ a ras ishɔt atsak.

²⁴Iwu ice wu sok anɛn yit ni irɔm wu a ku ni ina naton ákon, nɔng in di ki kus yit na anɛn yit, ni in nye yit kusot kutabat; nek nfot wu, ba mi ki te yin kyang.

²⁵Nek iyin tsang se yin ti itsamang fi i tseng sak ayit, awɛt yɔkɔnɔng, i mi bun yin sak na Anek e nɛ Anet iyɛrɛ ntset yin.