Read icen 1 ABitrus 3 Bible Online

1 ABitrus 3 - icen bible

1 ABitrus 3

¹Banyining, ni irèn izining e, nabak yin ace yin sak na bamatek yin, nɔng ke akak bà nɔɔk atsak ni ifɛ̀ Adakunom me awo, ba da kyem ba ka ba tirik vit ifɛ̀ Adakunom me, ni nggɔn banyining bà ntek,

²ke ba di kusot kucɛ́l yin, ni kusot nhwyɛ yin.

³Da kusas yin bi ne ni nzem nrɔm fɛ́ ba yɛrɛ ti ibat ice, ni ites itsɔm ato ata asɛng, nɛ ares itsɔm awo,

⁴tit, kusas fi ku nes ayɛt ayɛ yin, kusas fi da ku se tɔlɔt awo, tit imen iyɛ nɛ kabik nhwyɛ fi itek ko wat ashon Adakunom.

⁵Nek irèn e yeng fɛ́ banyining ajɛrɛ ayame fɛ́ ba te iyɛ bá na Adakunom di sɛs kusas bá. Ba kin nasap ace bà sak na bamatek bà,

⁶tɛ aSara, fɛ́ a foos ifɛ̀ aIbrahim, a ku yes atisa wu. Iyin yet yin bangas wu, ki i nye yin ikyɛng itek, da itarak yin irèn ni inyim awo.

⁷Bamatek, ni irèn izining yɔng bà, bereng yin banyining ni hwyɛ, ka ba nesek yin iratek tɛ bayɔng fɛ́ agap bá sɛ te afiin awo, tɛ bafi iya itekari gung ni iyin nfi kunang kutset kutek, nɔng vit ikyɛng fi i da ro na awon yin.

⁸Ni igang e, won ngma yin ni moon yin ace na bafidang; foos yin angmishish bafidang, shim yin bafidang, sot yin ne angmishish nɛ imen ice.

⁹I bi tarang anyas nɛ anyas awo, ke itok ni itok awo, tit ka ba tes yin awɛng, nek ba ki yes yin mok iya itekari awɛng,

¹⁰nek, “Ngma ayɔng, fɛ́ a shim kutset wu, a shim a di nnom ntek, i se gbing-gbing na a rosom ilem wu ni ncɛɛt anyas, nɛ kanu wu wosong ncɛɛt mbɔɔs.

¹¹I se gbing-gbing, na a won anyas, na a ras itek. I se gbing-gbing, na tsɛt kusot kukyang na di kuus iko.

¹²Nek ayisi aTisa se naton bafi kusot kutabat, ato wu tsin foos awon bá. Awɛt ayisi aTisa ra na bayɔng fɛ́ ba ras anyas.”

¹³Angan da a kyem a da man ki ifoos ikɔk i nye itek ɛ?

¹⁴Awɛt ki i sot gbing ni i sɔ izot nek ikyɛng itek fi ira, ibɛ yin awɛng. “I bi fok yin nnyim ikyɛng fi iba foos nnyim e awo; i bi te beke yin awo.”

¹⁵Tit te myak yin Anet-Isheshek aziwu ni yɛ yin tɛ aTisa yin. Kana nye yin nek itak akaangan fɛ́ a ki rip yin, ite iyɛ fi ibɛ yin. Awɛt nye yin anɔng ayɛt nhwyɛ, ni inesek iratek,

¹⁶bereng yin kuyiring kutek, nɔng bayɔng fɛ́ ba nyes ncɛɛt nduk e azaton nggɔn ntek yin ayɛt Anet-Isheshek da sɔ nsum mbɔɔs bá.

¹⁷I da dung se gyat ki i yet kushim Adakunom, ni i sɔ mgbang nek inye ikyɛng itek aza mgbang naton i nye anyas.

¹⁸Nek Anet-Isheshek kin ku nek bafi inɛn ite kazizining pɛɛt, anet kusot kutabat nek bafi nhwyi, a ki kɔrɔk yin sak na Adakunom. Ba kin ku fɛt ni irɔm, awɛt ba ku te atset na Kabik,

¹⁹na anɔng fɛ́ a tse a shara sak na nabik fɛ́ na se ni inyang,

²⁰fɛ́ na kin ra na ifok ifɛ̀ neme fɛ́ Adakunom kin woso tot na akabɔk ni nnom aNuhu na ba tsin nye kukyɛ ashi me. Ni ko banet gyeet, nkara kyɛk, fɛ́ ba kin hwyet ayɛt ashi me,

²¹ashi me nang yet nawu abatisma fɛ́ a tsin ki sheshek yin bá, da ifi turung arik ni rɔm awo, tit ifi kushi inabak kuyiring kutek sak na Adakunom. I ki sheshek yin ni irèn idorok ifaben aYeso Kristi.

²²Iwu fɛ́ a mi ngarak sak azanɛn, a se ni bɔk iyak Adakunom, nɛ batomaza, nɛ bafi kukyem, nɛ bafi agap fɛ́ ba se aben ni wu.