Read icen 2 ABitrus 1 Bible Online

2 ABitrus 1 - icen bible

2 ABitrus 1

¹Kufumung kang ne ni bɔk hom, imi aSiman Bitrus, asam aYeso Kristi, nɛ atom wu bà. Sak na bayɔng fɛ́ nek kusot kutabat Adakunom, nɛ Anet-Isheshek yit aYeso Kristi Anet-Isheshek yit, ba mi shan atsak kpaf tɛ afiit.

²Won Adakunom na ki te yin itek, na tɛ a ki nɔk yin kusonong kukyang shɛrɛk ayɛt irēn Adakunom nɛ aYeso, aTisa yit.

³Adakunom ayɛt kukyem wu a mi ki nɔk yit kaaki ikyɛng fi in shim yit nek in di nye yit kusot kutabat ni kurēn ayɔng fɛ́ a ki yes yit ni ízɔk ni tek wu.

⁴Ni irèn e ye, a ki nɔk yit nkyɔrɔk ntek makiyi, nek kushii wu fɛ́ a nye, a ki nɔk yit ina, nɔng in di ki sot yit ni nggɔn kuri nfɛ́ Adakunom, ni ma hwyet yit ni nkyɔrɔk nmaane nfɛ́ azatse fi in nes nek ikɔk irɔm.

⁵Nek anɔng, nye yin nyɛk i di barang yin naton inɔɔk atsak yin nggɔn ntek. Naton nggɔn ntek e, irēn;

⁶Naton irēn e, itekap ice; naton itekap ice me, iniri; naton iniri me, anyɛk ni ikuus Adakunom;

⁷naton anyɛk ikuus Adakunom e, bɛ̀ yin ishim sak na bafidang; naton ishim sak na bafidang e, ishim banet ngma.

⁸Ki i bɛ̀ yin kuri nggɔn nang dot, ni irēn aTisa yit aYeso Kristi, i da ki sak yin ni isot yin vit ita ice na vit ite nyɛk ni ikuus aYeso.

⁹Nek ngma ayɔng fɛ́ da a bɛ̀ nggɔn nang awo, isot a mak yɛrɛ yɛɛt awo, a yet akpatɔn. A mi te burum ni ifuut anɛn wu afɛ́ yame, fɛ́ ba mi ku fuut e.

¹⁰Nek anɔng, ábaruneng, ban te yin nyɛk i di tonong yin fok, iyes ni ikasa yin yet ifɛ́ tsak. Nek ki i nye yin nkyɔrɔk nang, i da kpa yin awo,

¹¹i da sɛ yin ishan itek ayɛt igwɔm aTisa yit aYeso Kristi, Anet-Isheshek yit fi ise vit nkum.

¹²Nek anɔng, in da ya kashon ni in ki yiring yin nkyɔrɔk nang, ngma ne fi iyin rēn ina, nɛ aney fi i mi te yin ayɛt atsak fi i mi sɛ yin.

¹³Imi di i se gyat ni in ki yiring yin ni nkyɔrɔk nang ni in ren resek ni kubut irɔm kang,

¹⁴nek in rēn fok ngmash ni in nabak atak, kyɔn tɛ fɛ́ aTisa yit aYeso Kristi mi di tonong wɛshɛk.

¹⁵In da te nyɛk in da di fok, ama fi in mi tseng, i da ya yin kashon ni iyiring yin nkyɔrɔk nang.

¹⁶Iyit kin ra yit kutomong ni kutsitsɛng imonoso nkyɛng-ashon ashon ni izen fi in kin cɛɛt yit ni iyin azaton agap ni kubɛ́ aTisa yit aYeso Kristi awo, tit in cɛɛt yit azaton ízɔk wu fi in kin di yit.

¹⁷Nek a kin shan iratek na Ada Adakunom ni izen fi kutɔ kin ne ni ízɔk agwɔm sak ni wu fok, “Ari hom yong, fi in shim makiyi, a di sas iyɛ ikan gyet awo.”

¹⁸Iyit ice yit in fok yit kutɔ me ni izen fi in se yit gung ni wu naton ihwyanang ajɛrɛ.

¹⁹Iyit mi sɛ yit atsak ifɛ̀ batan, i da se gyat i di te yin nhwyɛ ni ide, ti mgbey fi in tsin ron na hwyi ma kadiding te gbey ma àdat isɛng adiding ta mgbey na yɛ yin.

²⁰Agbat icɛɛt e yet fok, i se kpaf ni i rēn yin fok, vit itak ibes ikak fi i se ni fumung ajɛrɛ fi ines ayɛt kuyiring atan e.

²¹Nek itak ibes ki mang ne ayɛt kushim anet awe awo, tit banet tas kucɛɛt Adakunom ni irèn fɛ́ Kabik aJɛrɛ ka ba kɔk mo.