Read icen 2 ABitrus 2 Bible Online

2 ABitrus 2 - icen bible

2 ABitrus 2

¹Awɛt batan mbɔɔs kin se nate banet e, kyɔn tɛ fɛ́ bafi itees mbɔɔs bi se nate yin. Ba bi nɔɔs ni itees mbɔɔs ni nɛt, ba bi ton ni iratek Adakunom iwu yɔng fɛ́ a ka ba shan. Ba da bɛ na kawɛy ziri ziri naton ace bá.

²Banet dot bi di kuus irèn nsum bá, ba bi sak bakak na ba nye aduk ncɛɛt azaton irèn atsak.

³Ayɛt kuhwye bà, bafi itees mbɔɔs e bi ki yisik yin ni nkyɛng-ashon ashon fɛ́ ba mi monoso. Ba mi sak ishɔt bà i tsin ka ba tot, kawɛy bá tsin ka ba yɛrɛ.

⁴Nek ke Adakunom kin kyem a won batomaza fɛ́ ba kin nye inɛn awo, tit a kin yirik iba sak ari irong.[1] A sak iba ni kubong kuhwyining, na ba sot itot ishɔt azɔng,

⁵ke da a kin kyem a won kazatse ashon awo, a kin korok akpolol ashi naton banet fɛ́ ba kin se vit Adakunom. Awɛt a bereng anet ishara kusot kutabat, aNuhu nɛ bakak kanakataat;

⁶ke Adakunom kin gang nwɔp aSodom nɛ aGomora ni kurong, in sot ntong irong. A sak ina na na sot ikyɛng itees naton ikyɛng fi i bi te na bayɔng fɛ́ ba se vit Adakunom.

⁷Ke Adakunom kin hwyet na aLotu anet kusot kutabat, fɛ́ i mi rɔɔn ni nggɔn anyas ágadiring ánet.

⁸Nek anet e kin se nate ba atut na katson, ni ikyɛng e ku tusup kabik ajɛrɛ wu nek kuri nggɔn ibeseng ntsi fɛ́ a yɛrɛ na foos.

⁹Ki i se anɔng, i sot Adakunom rēn irèn iturung bafi nnyim wu ayɛt izot na yit bafi nhwyi ayɛt izot na ba tsin di tot kunom ishɔt bà.

¹⁰Ishɔt e bi dung risik naton bayɔng fɛ́ ba di kuus aduk ikɔk ishim irɔm, fɛ́ ba byɛs bafɛ́ ashon bà. Nek ikok ice ni ibun ice bà, banet bang foos nnyim ibɔs mbɔɔs naton batomaza awo,

¹¹ngma ne anɔng, batomaza me, ngma fɛ́ agap bà wat afɛ́ bafi itees mbɔɔs e, da ba te kukun imonoso ncɛɛt naton ba ashon Adakunom awo.

¹²Awɛt banet e beseng iyerek azaton nkyɔrɔk fi da ba rēn awo. Ba se ti inyam ayit fi i se vit kuyiring, in yɔng fi in nyes ikyɛng fi nrɔm bà tsesek kyek, ba tes ide nek na ba yisik nɛ ba fɛɛs ide, kpaf ti in yame, ba bi ka ba fɛɛs bá.

¹³Kyɔn ti iba kin di man banet, itarang bà bi se anɔng bà. Ikyɛng fi iyet nta ni ba yet ikyɛng iduk e nate inom. Kusot ba nate yin yet ikyɛng nsum, i ti yet ikyɛng awey, ba yas na ba sɔs ni iyin na ba nyes ikyɛng fɛ́ ba shim ama ikɔt yin.

¹⁴Ayisi bà kaakyi izen yet afi itsɛsɛk kujang, ba kyem ba won inɛn awo; ba wɔrɔsɔ bayɔng fɛ́ ba se vit agap, ba mi tees ayɛ bà imak, kawɛy Adakunom tsin ka ba tot.

¹⁵Ba mi won irèn i tabat e, ba mi nɔ ayit ba tsin di kuus irèn aBalaam arim aBeyo, yɔng fɛ́ a shim itarang kutomong anyas.

¹⁶Awɛt ijaki ye i kin ku gyɔng naton aduk nggɔn wu, ikyɛng fi da icɛɛt awo, icɛɛt ni kutɔ anet, iroyin na atan e irèn ira kutomong iririm.

¹⁷Kuri banet bang se tɛ ikang fi ise vit ashi, ti itsutsun iza fi itsombos kok. Aduk ahwyi tsin ka ba tot.

¹⁸Ba ka ka tsot nanu ni ncɛɛt fi in se vit ice, ba ras kutomong ni nrɔm bà fi in tsɛsɛk inɛn ni ites agunung na bayɔng fɛ́ ba mi kpa hwyet ni kusot bafi mbɔs.

¹⁹Ba nye ni iba fok ba da sɛ ihwet, ni iba bafi icɛɛt e mo basam ni nggɔn ibeseng, nek anet yet asam naton ikyɛng fi i mi ku te nawop.

²⁰Ke ba man hwet ayɛt ibeseng azatse kang nek irēn aTisa yit nɛ Anet-Isheshek yit aYeso Kristi, awɛt ba tɛ ba yit ice bà ayɛt ka, ba tɛ ba ya awɛng ni ba, a sot kudaam bà kufɛ́ ayɔkɔnɔng wat kufi imɛsɛng ba kumaan e.

²¹Ki i kin dung ka ba wat e na ba sot vit irēn kusot kutabat, aza na ba na ba rēn iko, na ba ma tirik itees ntsi fɛ́ ba kin ka ba nabak e kama.

²²Kucɛɛt ama ikɔt kang yet atsak, “AKabu tɛ bun ni ikos wu,” nɛ “Aza yɔng fɛ́ ba mi so wu, tɛ a nɔ ayɛt afɔm.”