Read icen 1 AYohana 4 Bible Online

1 AYohana 4 - icen bible

1 AYohana 4

¹Bafidang in, i bi nesek yin atsak na kaakye kabik awo, awɛt mara yin nabik e ninyɛn da di ke ka ne na Adakunom ɛ, nek batan mbɔɔs dot mi nɔ azatse.

²Na ane fi i da rēn yin Kabik Adakunom: kaakye kabik fɛ́ ka fɛ̀ ey fok aYeso Kristi mi bɛ́ ayɛt irɔm, ka ne na Adakunom,

³awɛt kaakye kabik fɛ́ da ka shan atsak naton aYeso awo, ka ne na Adakunom awo. Kabik e yɔng ka ka yet ka fɛ́ anet ifa aKristi, fi i kin fok yin fok ka bi bɛ́, yɔkɔnɔng ana ka mi nɔ azatse.

⁴Iyin naban nnon, iyin ne yin na Adakunom, i mi ya yin awɛng naton ba, nek ayɔng fɛ́ a se ayɛt yin, a wat ayɔng fɛ́ a se azatse.

⁵Iba yet bafɛ́ azatse, nek anɔng, ba cɛɛt kuri kucɛɛt banet azatse, ne kazatse ka ba foos.

⁶Iyit ne yit na Adakunom, ngma ayɔng fɛ́ a rēn Adakunom, ki foos yit; awɛt ngma ayɔng fɛ́ da a yet afɛ́ Adakunom awo, wes ato ni iyit awo. Na ane fi in di rēn yit Kabik atsak ne kabik mbɔɔs.

⁷Bafidang in, won ni in shim bafidang yit, nek ishim nes na Adakunom. Ngma ayɔng fɛ́ a tonoso ishim, a yet kutes Adakunom, a rēn Adakunom.

⁸Ngma ayɔng fɛ́ da a tonoso ishim awo, a rēn Adakunom awo, nek Adakunom yet ishim.

⁹Na ane fɛ́ Adakunom ki tonong yit ishim wu: a tom azizɛɛt Ari wu kyɛk sak azatse, nɔng in da sɛ yit kutset ni wu.

¹⁰Ishim e se ane: da iyit ba fi in kin shim yit Adakunom awo, tit Adakunom iwu fɛ́ a ki shim yit, a tom na Ari wu ti kunang itarang anɛn yit.

¹¹Bafidang in, nek ishim fɛ́ Adakunom ki tonong yit, i se gyat iyit ni in tonong yit bafidang yit ishim bà.

¹²Vit anet fɛ́ a kin man di Adakunom; awɛt ki in tonoso yit bafidang yit ishim, Adakunom se ayɛt yit, ishim wu mi shining ayɛt yit.

¹³Iyit rēn yit fok in se yit ayɛt wu, iwu se ayɛt yit, nek iwu mi ki nɔɔk yit Kabik wu.

¹⁴Iyit ice yit, in mi di yit, in mi ti tas yit ne nanu yit fok, aDa mi tom Ari wu, na a sot Anet-Isheshek kazatse.

¹⁵Ngma ayɔng fɛ́ a fɛ̀ ey fok aYeso yet Arim Adakunom, Adakunom se ayɛt wu, iwu se ayɛt Adakunom.

¹⁶Nek anɔng fi in di rēn yit, in di te yit yɛndɛng ni ishim fɛ́ Adakunom bɛ̀ nek iyit. Adakunom yet ishim. Ngma ayɔng fɛ́ a se ayɛt ishim e, a se ayɛt Adakunom, Adakunom se ayɛt wu.

¹⁷Na anɔng wu, fi ishim di shining ayɛt yit, nɔng in da bin sot yit ni iyɛ ting atuk ishɔt igang azatse, nek azeng azatse, in se yit ti iwu.

¹⁸Ishim bi nnyim awo. Ishim atsak ro nnyim, nek nnyim bɛ́s nek kuyiring itabak. Anet fɛ́ a bi nnyim, ishim wu mi shining yɛɛt-yɛɛt awo.

¹⁹Iyit tonoso yit ishim, nek iwu tun ki tonong yit ishim.

²⁰Ngma ayɔng fɛ́ a fɛ̀, “Imi shim Adakunom,” awɛt na rawu arunyining, a yet anet mbɔɔs. Nek ngma ayɔng fɛ́ a rawu dang shim arunyining, ayɔng fi iwu tsin yɛrɛ, a da kyem a shim Adakunom fi iwu kin man di awo.

²¹Ni igang e, iwu mi ki nɔɔk yit agbat ifɛ̀ deng: ngma ayɔng fɛ́ a shim Adakunom, i se gbing-gbing na a shim arunyining bà.