Read icen 1 AYohana 5 Bible Online

1 AYohana 5 - icen bible

1 AYohana 5

¹Kaangan fɛ́ a nɔɔk atsak fok aYeso wu a yet Anet-Isheshek, a mi sot kutes Adakunom, ngma ayɔng fɛ́ a shim ada me, a shim nggon wu bà.

²Na ane fi in di rēn yit fok in shim yit nnon Adakunom, kin shim yit Adakunom, ni in nyes yit ikyɛng fɛ́ agbat ifɛ̀ wu fɛ̀ ni yit.

³Na ane fi in di tonong yit ishim yit sak na Adakunom: inyes yit ikyɛng fɛ́ agbat ifɛ̀ wu fɛ̀ ni yit. Agbat ifɛ̀ wu se diring awo,

⁴nek ngma ayɔng fɛ́ a mi sot kutes Adakunom, a sɛs awɛng naton kazatse. Iya awɛng naton kazatse se ne: inɔɔk atsak yit.

⁵Angan wu fɛ́ a ya awɛng na kazatse yɛ? Tit ayɔng fɛ́ a nɔɔk atsak fok aYeso yet Arim Adakunom.

⁶AYeso Kristi wu fɛ́ a bɛ́ azatse, ni irèn ashi nɛ nasok.[2] Da a kin bɛ́ ni irèn ashi kyɛk awo, tit ni irèn ashi nɛ nasok. Ayet Kabik wu ka nesek kanu icɛɛt, nek Kabik e yet atsak.

⁷Nek bataat ba fɛ̀ ba nesek kanu icɛɛt:

⁸Kabik, ashi, nɛ nasok, bataat e bɛ́ kanu kazining.

⁹In shashan yit kanu icɛɛt banet, awɛt kanu icɛɛt Adakunom se kashon, nek Adakunom wu a cɛɛt, a mi nɔɔk kanu icɛɛt naton Ari wu.

¹⁰Ngma ayɔng fɛ́ a nɔɔk atsak ne Arim Adakunom, a rēn tsɛngtsɛng fok aYeso yet angan ɛ. Ngma ayɔng fɛ́ a rawu inɔɔk atsak na Adakunom, a mi te Adakunom sot tɛ afi mbɔɔs, nek a rawu dang nɔɔk atsak ni kanu icɛɛt fɛ́ Adakunom fɛ̀ naton Ari wu.

¹¹Kanu icɛɛt ka fɛ́ a kin nye: Adakunom mi ki nɔɔk yit kutset vit igang, kutset e se ayɛt Ari wu.

¹²Ngma ayɔng fɛ́ a bɛ̀ Ari me, a bɛ̀ kutset; ngma ayɔng fɛ́ a se vit Arim Adakunom, vit iwu ni kutset.

¹³Imi tsin ki jɛk yin nkyɔrɔk nang, iyin bayɔng fi i mi nɔɔk yin atsak ni iyerek Arim Adakunom, nɔng i da rēn yin fok i bɛ̀ yin kutset vit igang.

¹⁴Iyɛ ting de fi in bɛ́ sak na Adakunom: ngma ikyɛng fi ki in rip yit kpaf ni ishim wu, a ki foos yit.

¹⁵Ki in rēn yit fok a ki foos, ngma ikyɛng fi in ku rip yit, in rēn yit fok in da sɛ yit.

¹⁶Ke akak di arunyining na tsin ra inɛn fi da itsa sak ni iku awo, won na a ra awon, Adakunom da ku nɔɔk kutset. In cɛɛt naton bayɔng fi inɛn ba tsa sak ni iku awo. Inɛn di se fi i tsas sak ni iku, in tsin fɛ̀ na a ra awon naton idɔng awo.

¹⁷Ngma nkyɔrɔk nmaane in yet inɛn, awɛt inɛn di se fi da itsa sak ni iku awo.

¹⁸In rēn yit fok ngma ayɔng fɛ́ a mi sot kutes Adakunom,[3] a ya kashon ni iras inɛn awo, nek Arim Adakunom ku berese, aShetan da kyem a ku man awo.

¹⁹In rēn yit fok, in yet yit nnon Adakunom, fok kazatse kang ngma kusum ka se nawop aShetan.

²⁰In ti in rēn yit fok Arim Adakunom mi bɛ́, a mi ki nɔɔk yit irēn, fi in di ki rēn yit Ayɔng fɛ́ a yet atsak. Iyit se yit ayɛt Ayɔng fɛ́ a yet atsak, in se yit ayɛt Ari wu aYeso Kristi. Iwu fɛ́ a yet Adakunom atsak e, a yet kutset vit igang e.

²¹Naban nnon in, sak yin ace yin yik-yik na nabannom.