Read icen Nabos Abik AYohana 11 Bible Online

Nabos Abik AYohana 11 - icen bible

Nabos Abik AYohana 11

¹Ba di nɔk ikyɛng kak ti ishɛn imaas, ba fɛ̀ ni mi, “Tsi maas kutu iya Adakunom ntong ni kuta ashosh e, fa banet iya ntong fɛ́ ba se azɔng.

²Awɛt won katasa me, da i bi maas ika awo, nek ba mi nɔɔk bafi Ícɛn-iduk ika. Ba da shesh kuwɔp ajɛrɛ me kufi nfɛn nsɔk nnaas ina faa (42).

³Ama anɔng, in bi nɔɔk bafi icɛɛt akuce hom bafaa agap itaas ifɛ́ hom, nfi nnom agup azining nɛ anakat afaa ni nsɔk karataat (1,260), ba da te alusuk áres.”

⁴Batan bafaa me, ba se tɛ atin ifat afaa nɛ ishɛn isaas agaramun afaa fɛ́ a nyeseng ashon aTisa azatse.

⁵Ke akak tsɛt a ka ba man, ni kurong nes na nu bá, ni ku hɛlɛm bafidang ifa bá me. Anɔng wu ngma bayɔng fɛ́ ba ka ba tsɛsɛk ni ifa di kus.

⁶Banet e yɔng bɛ́ agap ifaam kazanɛn, ba di ro ni iza ni izen fɛ́ ba se ni itaas ifɛ́ Adakunom; ba tɛ ba bɛ́ kukyem itirik ashi na a sot nasok, na ba rus kazatse na kaakyi kuri izot, ngma izen fɛ́ ba shim.

⁷Ama fɛ́ ba gang ncɛɛt bá, kunyam fi ku nes kubong fi kutsik ku se vit nkum, ku bi ra itsom ni ba, ni ku ka ba ya ni itsom e, ni ku ka ba fɛɛs.

⁸Ni nkom bá, di wey naton irèn agbat iwɔp e, kuwɔp e tonong ti kusot aSodom nɛ aMasat, karɔ fɛ́ ba di tekak aTisa bá.

⁹Ba sot azɔng nkɔs ntaat ni ibit, banet nes ni mben, nɛ alem, ni icɛ́n, ni ízɔrɔk, ba bɛ ba di ta ayisi ni nkom me, ba ro ni kunɛt ba.

¹⁰Banet azatse bi feng na ba ra amok, ne ba nesek nnang nek iku bá me, nek batan bafaa me tang banet iyɔm azatse.

¹¹Awɛt ama nkɔs ntaat ni ibit e, nsong fi in ne na Adakunom nɔ ayɛt ba, ba tɛ ba dorok natak bá, nnyim kpa bayɔng fɛ́ ba ka ba di.

¹²Ama anɔng, batan bafaa me fok kutɔ ne azanɛn, ku fɛ̀ ni iba, “Ngarak yin aze!” Ba ma ngarak sak azanɛn ayɛt anɔk, na ayisi bafidang ifa bá.

¹³Ni izen e yɔng, ba nye agbat izuut mben makiyi, kabak kazining ayɛt kusɔk afi kuwɔp e kpa. Banet agup kanakataat kus ni izuut mben e, nnyim yit ishɛrɛp e, ba nɔɔk Adakunom azanɛn iratek.

¹⁴Izot ifɛ́ afaa mi got yɔng; izot ifɛ́ ataat ngmash.

¹⁵Atomaza afɛ́ kanakataat fɛɛp igba wu, ba fok ntɔ gbɛrɛy na azanɛn fi i nye, “Igwɔm azatse kang mi sot ifɛ́ aTisa yit ni iwu Anet-Isheshek, iwu da ya igwɔm e ayɛ nɛ ayɛ.”

¹⁶Bashɔn nsɔk nfaa ina naas, fɛ́ ba sosok ni ata igwɔm anu shon Adakunom, ba te gup ayisi bá, ba ku ya ntong.

¹⁷Na ba nye, “Iyit da tere yit, Ada Adakunom Azɔk, ngɔn fi i se yɔkɔnɔng, i tsang se yame, nek i mi sok kukyem ngɔn, i mi kpa ya igwɔm.

¹⁸Banet icɛ́n azatse mi tsang kana shining na naman, awɛt yɔkɔnɔng izen naman ngɔn mi bɛ́. Izen mi nye fi i da ra bayɔng fɛ́ ba mi kus ishɔt, ni ma nɔɔk basam ngɔn, na batan ngɔn izang bá, na banet Adakunom, nɛ ngma bayɔng fɛ́ ba foos inyim ngɔn, babane, na baratek. Izen mi nye fɛ́ ba da wey ngma bayɔng fɛ́ ba wey na kazatse.”

¹⁹Ama anɔng, ba tarak kutu iya Adakunom ntong azanɛn, ayɛt itu me, ba di akwɔti irosom kushi me. Wat kaza kpa nye dɛbɛt, ni ntɔ, ni iza rus, ni mben zuut nɛ anyin aca-tarang kpas.