Read icen Nabos Abik AYohana 13 Bible Online

Nabos Abik AYohana 13 - icen bible

Nabos Abik AYohana 13

¹Anɔng bà, in ti in di kukyɛng ashi fi ku wuruk ni izek e. Ku bɛ̀ átom kusɔk, nɛ ice kanakataat, kaakyi kutom bɛ́ abong igwɔm, nɛ kaakyi ice bɛ́ iyerek de, fi i yet ifi byɛs Adakunom.

²Kukyɛng ashi fi in di me tas agantuk, awɛt atak e se tɛ afɛ abuwa, na akpwɛrɛ asɔp, kanu me se tɛ ka fɛ́ akukum. Kunyin kuhwyen e kin nɔɔk kukyɛng ashi me agap ko, ni kuta igwɔm ko, ni kukyem ko makiyi.

³Ice kukyɛng ashi me izining kin bɛ̀ kufot kumaan e fi ku kyem ni ku wey ni ko, awɛt ku te kyang. Ikyɛng e te banet azatse ngma kpɔrɔk, ba kpa di kuus kukyɛng ashi me.

⁴Banet e ya kunyin kuhwyen e ntong, nek iko ko ku nɔɔk kukyɛng ashi me agap ice. Banet tɛ ba ya kukyɛng ashi me ntong bà, nɛ ba nye, “Angan wu a se nagbɔng ti kukyɛng ashi me yɛ? Angan da kyem a ra itsom ni ko yɛ?”

⁵Ba nɔɔk kukyɛng ashi me kawat itsot kukaa, ni itonoso ibyɛs sak na Adakunom, ni iya igwɔm nfi nfɛn nsɔk nnaas na nfaa.

⁶Ku tarak kanu ku kpa tosong Adakunom, ni ku beseng iyerek wu, na karɔ isot wu, na bayɔng fɛ́ ba se ni kusot azanɛn.

⁷Ba kin kuku nɔk kawat itsom na banet Adakunom, ni ku ka ba ya mo ni itsom. Ba tɛ ba kuku nɔk kukyem azaton kaakyi mben, ni kaakyi ilem, ni ícɛ́n, ni ízɔrɔk.

⁸Ngma banet azatse ya kukyɛng ashi me ntong, ba yet bayɔng fɛ́ da ba jɛk ayerek bá ni kufumung kutset neme dang na ba nye kazatse awo, kufumung e yet kufi kitsamang e fɛ́ ba kin tsɛɛt.

⁹Ngma ayɔng fɛ́ a bɛ̀ kuto, won na a fok.

¹⁰Ngma ayɔng fɛ́ ba mi sak a da tse ari inyang, a da ya inyang e. Ngma ayɔng fɛ́ ba mi sak fok a da ku ni itsot, a da ku ni itsot e. Nek anɔng, i se gbingbing banet Adakunom na ba nye kabɔk ayɛt isɔ izot, ni kusot atsak bá.

¹¹Ama anɔng, in ti in di kukyɛng kak, fi ku ne aben. Ku bɛ̀ atom afaa tɛ afi itsamang, awɛt kucɛɛt ti kuhwyen.

¹²Ku ras kutomong ni kukyem kukyɛng ashi imɛsɛng e akuce ko. Ku sak kazatse nɛ banet fɛ́ ba se ayɛɛt ka, na ba ya kukyɛng kufi imɛsɛng e ntong, kuyɔng fɛ́ ba te kufot ko kyang.

¹³Ku ras ntomong ajingjing makiyi, na ayisi banet ngma, ku saas kurong nes naton aza ni ku kpas aben.

¹⁴Ku wɔrɔk banet azatse, nek ice fɛ́ ba ku ko nɔk fi ku di ras ntomong ajingjing na kuce kukyɛng ashi kufi imɛsɛng e me. Ku ka ba sak, na ba nok kubannom fi ku tas kukyɛng ashi me, fɛ́ ba kin maan iko ni kutsot, ngma na anɔng kuren se ni kutset, nɔng ba bin ku ko nesek iratek.

¹⁵Ba nɔk kukyɛng kufɛ́ afaa me ice fi ku di fɛɛp nsong kutset ayɛɛt kukyɛng fɛ́ ba nok e tɛ kukyɛng imɛsɛng e me, nɔng ku da kyɛm kucɛɛt, ni ku fɛɛs ngma bayɔng fɛ́ ba raba dang na ba ku ko ya ntong.

¹⁶Ku tɛ ku sak na ba jɛk akaangan izizɔ ni bɔk iyak wu ke natii wu ayi, ke na ayet abaan e, ke agbat e, ke arum, ke akan, ke awashak, ke asam.

¹⁷Vit ayɔng fɛ́ a da kyɛm na shan kɛ na rɛp ikyikak tit a bɛ̀ izizɔ me yɔng, fi i yet iyerek kukyɛng e kɛ alamba iyerek ko ayi.

¹⁸Ideng ikyɛng tsɛt kutsitsɛng. Won ayɔng fɛ́ a bɛ̀ irēn, na a fa ifa kukyɛng e, nek iyet alamba anet awe, alamba ko me yet anakat karataat ni nsɔk karataat na karataat (666).