Read icen Nabos Abik AYohana 15 Bible Online

Nabos Abik AYohana 15 - icen bible

Nabos Abik AYohana 15

¹In di ikyɛng ayɔɔt ikak azanɛn, i yet iratek, ikyɛng ayɔɔt. Batomaza kanakataat da bɛ ni izot kanakataat ifi igang e, nek ni bɔk bá wu fɛ́ Adakunom di ki shining namaan wu na fi igang e.

²In ti di ikyɛng ikak ti izek fɛ́ ba di moon e fi i gyɛs tɛ agyilas, ni kurong. Bayɔng fɛ́ ba nyeseng bakat ni izek e, yet bayɔng fɛ́ ba ya awɛng naton kukyɛng ashi e, nɛ kubannom e, nɛ naton iyerek ko. Ba berese izóm fɛ́ Adakunom ka ba nesek,

³ba di ras abom aMusa asam Adakunom, nɛ afi Kitsamang e. Ba nye, “ATisa, Ada, Adakunom, agbat ntomong ngɔn, yet ikyɛng ayɔɔt makiyi. AGwɔm mben azatse ngma! Irén ngɔn se tabat, i yet ifɛ́ atsak.

⁴“Wo aTisa, angan fɛ́ a da fok nnyim ngɔn awɛ? Angan fɛ́ a da nɔɔk iyerek ngɔn iratek awɛ? Ngɔn azingɔn wu fi i se jɛrɛ. Ngma icɛ́n banet azatse da bɛ́ ashon ngɔn na ba da ya ntong, nek ngma banet mi di ntomong ngɔn fi in se tabat.”

⁵Ama nnang, in di ba mi tarak kubut inɔɔk kanu ifɛ̀ fi iyet karɔ iya Adakunom ntong nazanɛn.

⁶Batomaza kanakataat e fɛ́ ba bɛ́ ni izoot kanakataat e wuruk ayɛt Kutu Iya Adakunom Ntong. Ba tes nkpin alinen akan fin nɛp, ba rosom agwɔm bá na atoro atsɔm-aseng.

⁷Wat akak ayɛt nkyɔrɔk ntset nnaas yaame, nɔɔk batomaza kanakataat e ítsɛ́n atsɔm-aseng na fi izoot kanakataat fɛ́ na da ba shining ina ne naman Adakunom, fɛ́ a se ayɛ na ayɛ.

⁸Kutu Iya Adakunom Ntong e wat ku shining nɛ atseng fɛ́ a ni ízɔk Adakunom, ni kukyem wu. Vit akak fɛ́ a kyɛm a nɔ ni Kutu Iya Adakunom Ntong e, ma ama fi izoot kanakataat ka fɛ́ batomaza kanakataat e mi gang.