Read icen Nabos Abik AYohana 16 Bible Online

Nabos Abik AYohana 16 - icen bible

Nabos Abik AYohana 16

¹In fok kutɔ gbɛrɛy fi ku ne narɔ iya Adakunom ntong, ku fɛ́ na batomaza kanakataat e ye, “Tseng in, ni ítsɛ́n fi i shining na naman Adakunom kanakataat e, korok yin ina azatse.”

²Atomaza afi imɛsɛng e, tse a korok ikyɛng fi i se ni itsen ifuu azatse. Áduk ánot akak wuru na banet fɛ́ ba bɛ́ izizɔ kukyɛng ashi me, fɛ́ ba ku ko ya ntong.

³Atomaza afɛ́ afaa, tse a korok ikyɛng fi i se ni itsɛn ifuu ayet izek. Izek e tirik isot nasok tɛ anet fɛ́ ba fɛt, kaakyi ikyɛng fi i se ayɛt izek e kus.

⁴Atomaza afɛ́ ataat, tse a korok ikyɛng fi i se ni itsɛn ifuu naton ákyɛk nɛ ákang ashi, a tirik a sot nasok.

⁵Wat in fok atomaza fɛ́ a bi ice naton ashi, a fɛ̀, “Ngɔn aJɛrɛ Mɛɛ, fi iras ishɔt atsak, ngɔn fi i se yɔkɔnɔng, fi i kin se neme, nek ngɔn ras ishɔt anɔng.

⁶Nek iba mi nos nasok banet Adakunom anɔng nɛ batan, ngɔn mi kaba nɔk nasok e ba sɔ ina kpaf ti kushim ba.”

⁷Wat in fok kutɔ ne kuta ashosh e, ku fɛ́, “Ey, aTisa Ada Adakunom, ishɔt ngɔn se tabat na atsak.”

⁸Atomaza afɛ́ anaas, a tse a korok ikyɛng fi i se ni itsɛn ifuu naton kunom. Ba ma nɔɔk kunom e agap ni ku ta na banet vɛt ni kurong.

⁹Nvɛɛt kurong e kaba shosh makiyi, fi i sak ba tosong iyerek Adakunom, iwu fɛ́ a bi ice naton izot e. Ngma na anɔng, ba raba dang tirik ba wosong anɛn bá, ba ku nɔk mo iratek wu.

¹⁰Atomaza afɛ́ atoon, a tse a korok ikyɛng fi i se ni itsɛn ifuu ni kuta igwɔm kukyɛng ashi me, igwɔm ko wat i sot hwyining. Banet ros alem bá nek mgbang.

¹¹Ba tosong Adakunom azanɛn nek mgbang bá nɛ ánot bá, awɛt ba raba dang tirik ba wosong nduk nkyɔrɔk fɛ́ ba ras.

¹²Atomaza afɛ́ karataat, a tse a korok ikyɛng fi i se ni itsɛn ifuu naton kugbat kukyɛk aYuferetis. Ashi kukyɛk me wat a te jɔng, nɔng ku da nye irèn fɛ́ bágwɔm abace bi di got.

¹³Ama anɔng, in di itséng itaat fi se tɛ ábót, a wuru na anu kunyin kuhwyen e, nɛ na nu kukyɛng ashi e, nɛ na nu atan mbɔɔs e.

¹⁴Ayet nabik ítseng, fi iras ntomong ajingjing. Ni itsees sak na bágwɔm azatse kang ngma kusum, nek i ka ba tusung mok itsom, agbat inom Ada, Adakunom fɛ́ a wat kaakyɛ.

¹⁵“Fok yin, imi yɔng in wuruk tɛ akpatang! Awɛng se gung ne ayɔng fɛ́ a di wey dang nda, na ares wu dang tun, kɔng a bi se kpiip ni nsum kudaam.”

¹⁶Itséng e tusung bágwɔm e narɔ fɛ́ ba yes ika ni ilem baYahuda, Amagedon.

¹⁷Atomaza afɛ́ kanakataat, a korok ikyɛng fi i se ni itsɛn ifuu ni wun. Wat kutɔ kukak kuratek ne narɔ iya Adakunom ntong, ni kuta igwɔm Adakunom, ku fɛ̀, “Ba mi gang!”

¹⁸Wat alem aca-rong tang dɛbɛt, nɛ awɔng, ni izá tasak, ni mben izuut makiyi. Neme fɛ́ ba di nye anet awe, ba ma nye kuri izuut mben ti iyeng awo. Izuut iyeng iyet iduk-iduk e ngma.

¹⁹Agbat kuwɔp aBabila kana kam asa ataat, ni nwɔp azatse ngma kusum kpas. Adakunom yiring na agbat iwɔp aBabila, a sak ba sɔ ashi anap ayɛt aridɛ aduk naman wu ma ba gang ina.

²⁰Kaakyɛ mben nate izek te bit, ngma ahwyanang te wɛrɛng.

²¹Anyin ica itarang fi kunanang e se bakat ápang anakat azining,[4] a nes azanɛn, na a kpas naton banet, i sak banet e tosong Adakunom nek izot ica itarang e, kin yet iduk e.