Read icen Nabos Abik AYohana 2 Bible Online

Nabos Abik AYohana 2 - icen bible

Nabos Abik AYohana 2

¹“Jɛk sak na atomaza afi bafi ikuus aYeso fɛ́ ba se na Afisa fok: Kucɛɛt kang yet kufɛ́ aYɔng fɛ́ a bereng ádat kanakataat ni bɔk iyak wu, fɛ́ a tsees nate ishɛn agaramun kanakataat:

²Imi rēn ntomong ngɔn, kugbagba ni inye nyɛk ngɔn. Imi rēn fok i da kyem iya kashon na ámaan ánet awo, ngɔn mi mara bayɔng fɛ́ ba nye fok iba yet batom aYeso awɛt ba yet awo, ngɔn mi di mbɔɔs bá.

³Ngɔn mi te nyɛk, imi nye akabɔk ni izot nek iyerek hom, i rangɔn dan te nwaa.

⁴Ngma na anɔng, in bi ikyɛng fi in da fɛ̀ naton ngɔn: Ngɔn mi wosong ishim fi i tsang di shim mo ni imɛsɛng e.

⁵Yiring ni ishim fi i tsang bɛ́, dan ni i kpa! Tirik wosong anɛn ngɔn, kpa nyes nkyɔrɔk fi i man ni ras ni imɛsɛng. Ki da i ti tirik i wosong anɛn ngɔn awo, imi da bi in da sɛ, in da tun agaramun ngɔn narɔ fɛ́ a di se.

⁶Awɛt nkyɔrɔk ntek na fi i nye: I rangɔn nggɔn baNikolaitiyan, kpaf kyɔn ti imi di ramin ina.

⁷Ngma ayɔng fɛ́ a bɛ́ ato, won na a wes ina ni ikyɛng fɛ́ Kabik Adakunom cɛɛt sak na bafi ikuus aYeso. Ngma ayɔng fɛ́ a ya imara me, imi bi ku nɔk irèn iya ica akon kakon fɛ́ ka nesek kutset, fɛ́ ka se ni igɔɔt Adakunom.

⁸“Jɛk sak na atomaza banet ikuus aYeso fɛ́ a se na aSimirna: Ifɛ̀ deng yet ifɛ́ aYɔng fɛ́ a yet afi imɛsɛng, a tɛ yet afi igang e, aYɔng fɛ́ a kin ku, a tɛ dorok ni kutset.

⁹Imi rēn izot ngɔn, ni kukpɛt-kpɛt ngɔn, ngma na anɔng ngɔn yet arum! Imi rēn mbɔɔs bayɔng fɛ́ ba nye fok iba yet baYahuda, ba yet awo, ba yet karɔ iya ntong aShetan.

¹⁰Ngɔn bi fok nnyim mgbang fi i da sɔ awo, won in da tak, aMaan e da te bakak yin ari inyang nek a ki mara yin, i da sɔ yin izot nfi nkɔs kusɔk. Nyeseng yin na atsak sak ni iku, imi da ka nɔk itarang iya imara me.

¹¹Won ayɔng fɛ́ a bɛ́ kuto, won na a fok ikyɛng fɛ́ Kabik Adakunom tsin taas bafi ikuus aYeso. Ngma ayɔng fɛ́ a ya imara me, vit kufot fi ku bi ku sɛ ni iku ifɛ́ afaa.

¹²“Jɛk sak na atomaza bafi ikuus aYeso fɛ́ a se na aPagamum: Ifɛ̀ deng yet ifɛ́ aYɔng fɛ́ a bereng awal fɛ́ a ya votot nabak nafaa.

¹³Imi rēn karɔ isot ngɔn, karɔ fi kuta igwɔm aShetan di se. Ngma na anɔng, ngɔn nyeseng na atsak ni iyerek hom. Ngɔn nyeseng na tsak ngɔn, sak ni nnom fɛ́ ba kin di fɛt Antipas atitup asam hom ama iwɔp, karɔ fɛ́ aShetan di se.

¹⁴Ngma na anɔng, in bi ikyɛng fi i di daam ni ngɔn: Ngɔn bɛ́ banet azɔng fɛ́ ba yit itees aBalaam, iwu fɛ́ a kin tees aBalak na wɔrɔk banet aIsrela sak ni ira inɛn iya nayak fɛ́ ba mi nabak-akuce sak na nabannom e, ni ras kujang.

¹⁵Ngɔn ti i bɛ́ banet fɛ́ ba bereng itees baNikolaitiyan fɛ́ ba bɛ́ ni itees mbɔɔs.

¹⁶Tirik won anɛn ngɔn! Ke da anɔng awo, ngmash ni in bɛ́ azɔng, in da kɔn ni iba ni kutsot fi ku se na nu hom.

¹⁷Won ngma ayɔng fɛ́ a bɛ́ kuto, na a fok ikyɛng fɛ́ Kabik Adakunom tsin taas bafi ikuus. Ngma ayɔng fɛ́ a ya imara, in da ku nɔk akpam fɛ́ a ne azanɛn. In da ti in ku nɔk kuta kukan ni iyerek ifas fɛ́ ba di jɛk ni ko, idɔng fɛ́ ma ayɔng fɛ́ a bereng iko kyɛk fɛ́ a da rēn ide.

¹⁸“Jɛk sak na atomaza banet ikuus aYeso fɛ́ a se na aTayatira: Ifɛ̀ deng yet ifi Nggon Adakunom, aYɔng fɛ́ aca-yisi wu se ti mgbey kurong, aYɔng fɛ́ atak wu se tɛ kutsɔm kukan fi ku ron.

¹⁹Imi rēn ntomong ngɔn, ni ishim ngɔn, nɛ atsak ngɔn, ni ikyɛng fi ngɔn raas, nɛ akabɔk ngɔn. Imi rēn ikyɛng fi i di se ne yɔkɔnɔng, iwat idɔng fi i tsang raas ni imɛsɛng e.

²⁰Ngma na anɔng, imi bi ikyɛng fi i di daam ni ngɔn: Ngɔn nɔɔk abining yɔng fɛ́ ba ku yes aJezebel kawat, ayɔng fɛ́ a nye fok iwu yet atan Adakunom. Nek itees wu, a mi tes basam hom na tse, ni iras kujang ni iya nayak fɛ́ ba nasap-akuce sak na nabannom e.

²¹In mi ku nɔɔk izen nek na tirik na won anɛn kujang wu, awɛt a shim awo.

²²Nek anɔng, in da ku barak na meneng mgbang, in da sak bayɔng fɛ́ ba ras kujang ni wu na ba sɔ izot gyet awo, tit ma ba tirik ba wosong ikyɛng fɛ́ ba ras ni wu.

²³Imi da carak nnon ikuus wu na na kus ni nrɔk. Na anɔng, ngma itusung bafi ikuus aYeso da rēn fok imi wu in yere ayɛ ni iyiring banet, in da tarang kaangan ayɛt yin kpaf ni ntomong fɛ́ a ras.

²⁴Sak ni nshɛrɛp yin fi i se yin na aTayatira, iyin fi da ishan yin itees wu awo, da ishan yin itees aShetan fɛ́ ba yes iye ikyɛng inɛt awo, imi da ti in ki te yin kunanang kukak awo,

²⁵tit, yit yin atsak yin gyat ma kubɛ́ hom.

²⁶Ngma ayɔng fɛ́ a ya imara me, na nye ikyɛng fi iyet kushim hom sak ni gang e, in bi ku nɔk kukyem azaton icɛn azatse.

²⁷A bi ya igwɔm naton ba ni ishɛn kutsɔm; a bi ka ba fo abak-abak e tɛ nadonong,[3] kyɔn ti imi di shan kukyem na Ada min.

²⁸In bi ti in ku nɔk àdat isɛng atson.

²⁹Won ayɔng fɛ́ a bɛ́ kuto, na a fok ikyɛng fɛ́ Kabik Adakunom tsin taas bafi ikuus aYeso!